Read Southern Rengma Naga 2 SAMUEL 6 Bible Online

2 SAMUEL 6 - Southern Rengma Naga bible

2 SAMUEL 6

¹David le Israel nyu shüpahü kegwatsin yie shenryü ko kequen nishüo,

²Kekvutsin Npugü Cherubim soge dun kebin gü zan le kebin Kejozenkelo Khinpha gü senryü nrün genyu anyugun zen Juda kazü Baalah ki gü.

³Anyugun le rincho ki Abinadab kanyu tsü pen pe gari keshün nme ge shülo. Lo Abinadab nyu hvu Uzzah lo Ahio au le gari gü mhundyü ri.

⁴Ahio le rio tsonchü.

⁵David lo Israel nyu aphu anyugun kekvuthyü dathyüo lüthyü pe Npugü rühvu bin. Anyugun le harp, lyre, bhin, rattle lo cymbals sen lü thyü.

⁶Anyugun le Nakon shyekenyuh bin nyu ryü kelo ka methu tse gü le a-pha nsüla, tsontsin Uzzah le a-ben keta pe Kejozenkelo Khinpha gü nmhushü.

⁷Tsonshü nyemhun Npugü Sunggigü le a-vüshü a-le tsü rühvu kemvu genyu, tson-o Uzzah le Kejozenkelo Khinpha khoka sila,

⁸tsügerho bin tsügü pe Perez Uzzah tse ko tinla. NPugü le a-nyuntao shaja pe Uzzah tsükela genyu David le a-nyunta la.

⁹Tsüselo David le Npugü nshvuo zoshü, “Dihontse ntsoka ale Kejozenkelo Khinpha gü khilo tila?”

¹⁰Tson-o a-le tsü sen Jerusalem nyu ryü mvule tse rüchün lo-o sen rani gü Gath nyu Phenyü nyu nme Edom temi Obed kanyu shüla.

¹¹Tsüle shye shen tsüka bin, lo Npugü le jochü pe Edom nyu Obed lo a-kami nyu tsüshü.

¹²Kejozenkelo Khinpha gü genyu Npugü le jochü pe Obed Edom nyu gü kami lo a-hon aphu so shü kebin rüla Raja David le nyülo; tsügenyu a-le shekerhün thyüo Kejozenkelo Khinpha gü senryü Jerusalem nyu shülo.

¹³Kejozenkelo Khinpha kepen jule kenkvu tsero gükelo sika David le methu tse nme lo tanyü phu kegwa nme tse pe kerüshvu thyüshü.

¹⁴David le linen phi nme nti pe a-senphin pfüo a-kekvu aphu sen dathyü pe Npugü rühvu.

¹⁵Tson-o David lo Israel nyu aphu shekerhün thyü sen lo shukhun tse Kejozenkelo Khinpha gü pen-o Jerusalem ki nsin.

¹⁶Khinpha gü pen-o nyida günyu yüryü kelo ka Saul nyugi Mikal le kafüphe ka penshü laryü raja David le kenshün nyu dathyü lo nchweo hokebin hyuo, a-dü ngwa la.

¹⁷Anyugun le Khinpha gü pen ryüo David le tsügenyu thyü kenjü phika günyu a-bin ka shüla. Tson-o a-le rope kerüshvu lo kepvüshe kerüshvu thyü pe Npugü tsüshü.

¹⁸A-le kerüshvu dan thyü penla njüo Kekvutsin Npugü zan nyu jochü pe temi dan tsüshü,

¹⁹lo ketyüketsü pe anyugun aphu kenjün shü. A-le tensü thünme, thyü sime lo vainsha kenko peha tse pe Israel nyu peche tenu nmeme tse tsüküshü. Tson-o aphu a-ka ki gunla.

²⁰Tsontseo David le a-kami nyu kelushü titse kaki ryü, tsüka Mikal le a-teno chwiryüo, a-le zoshü, “Israel nyu raja güle nthu a-zan thyü ngon sa laso! A-le a-hensin kedanyu ju gogi dan mhundyü nyu kenunyu nme hontse pe mehi laso!”

²¹David le zoshü, “Ale dathyü pe npvü lo a-kami nyu sunka a kejü pe Israel nyu temi sharhi thyü kelo gü Npugü rühvu hü nle. Lo ale dathyü Npugü rühvu hüti,

²²lo ale athyü pe hinyeki kemeni ti, Nle ale thakon mvu letse rüchün logwa, ai lünyu tsüdan le arüchün tetso sati!”

²³Saul nyugi Mikal le nyu nme-e zenmvu.