Read Southern Rengma Naga 2 SAMUEL 8 Bible Online

2 SAMUEL 8 - Southern Rengma Naga bible

2 SAMUEL 8

¹Tsontseo Raja David le Filistian nyu whe nio anyugun sokvu lola, tson-o anyugun no kazü gü so gon nimvu la.

²Tsüsika a-le Moab nyu sokvu lola. A-le do ten kelo dan no kazünyu don-o zhülo njüo mishen ka mihvu hvu dushvula. Tson-o Moab nyu le a-hensin bin-o khajana pe a-tsü hü.

³Tson-o a-le Siria nyu kazü Zobah ka raja gü Hadadezer, Rehob nyugü leEufrates teso gü kigü kazü gü lonilo titse gü kejü sokvu lola.

⁴David le keru ge shüpahü yie meo tsi tsenyü lo tsonkechü shüpahü yie nki tse ten lola. A-le kerugari tsi le senlo kegwa keru pe binla lo a-sen aphu apha bose la.

⁵Damaska nyu Siria nyu le Raja Hadadezer keche lotse rihü nishü, tsontsin David le tsüdan wheo temi yie nki kenyhun dushvula.

⁶Tson-o a-le rihü dan kensenbin thyü pe anyugun lojvü nyushüla, tsüselo anyugun le a-hensin bin-o khajana pe a-tsü hü. Npugü le David no lika hika-e kvulo.

⁷David le Hadadezer hensin kedanyu ju le suna gida pfü kehü tenlo-o zen Jerusalem nyu ryüla.

⁸A-le Hadadezer le gon kehü nyida Betah lo Berothai nyu lazo kechon khilo la.

⁹Hamath ka raja gü Toi le David le Hadadezer rihü aphu sokvu kela nyülo.

¹⁰Tsüselo a-le a-nyugü Joram nipe Raja David kelushü, lo a-le Hadadezer sokvulo kela genyu a-shwe shü, Toi le gwen kechon tsügü nren hü. Joram le suna, rakagi lo lazo kecha senryü jwe thyü pe David tsüshü.

¹¹Raja David le tsüdan pe a-le senye dan sokvu lo-o khikelo rakagi lo suna sin-o kerüshvu nyu sen nrün genyu thyü kenshün lo-

¹²Edom, Moab, Ammon. Filistian lo Amelek- lo Hadadezer hon sekelo tse.

¹³David le Tsip kazü ketejon nyu Edom nyu yie tseryüo tetse dushvu lao rani keryü ka a-zan chwi kenyela.

¹⁴A-le Edom kazü aphu nyu rihü dan kensenbin pe shüla tson-o tsünyu temi dan le a-hensin ryüla. Npugü le David no lika hika-e kvulo.

¹⁵David le Israel nyu aphu so raja thyülo, a-le a-zintse a-temi dan ge a-kezü lo kenjü gü thyü hü.

¹⁶Joab, a-jvü le Zeruiah gü tsü le a-rihü dan so keda gü thyü; Ahilud nyugü Jehoshaphat le kethu kentsen gü thyü,

¹⁷Ahitub nyugü Zadok lo Abiathar nyugü Ahimelek tsele püshükeda thyü; Seraiah le Jokera bin nyu kethu gü thyü;

¹⁸Jehoiada nyugü Benaiah le David rikhun nyu kentsen gü thyü lo David nyu dan le püshükeda thyü.