Read Southern Rengma Naga 1 RAJANYU 1 Bible Online

1 RAJANYU 1 - Southern Rengma Naga bible

1 RAJANYU 1

¹Ntsoka we Raja David le then sala, lo a-gonyu dan le phi pe hen ai nyün lo mvula.

²Tsügenyu a-nyugun le a-ka, “Npugü, agun le lübwe nyu nme fü pe no nkhoka bin-o n nucha tile. A-no nkhoka zhü-o nno nyün loti.”

³Tson-o anyugun le Israel nyu rünyi aphu nyu lünyu kezegwa nme füo Abishag tsekethyü Shunem nyu nme hyulo-o zenryü raja gü tsüshü.

⁴Lünyu tsügi le zegwasa, a-le raja gü khoka bin-o a-nucha hü, ai raja gü le a-zen peche tenu jvü thyü mvu.

⁵Ntsoka we Absalom le sila so, lo David nyu rhün kebin dan dannyu David lo Haggith hvu nyugü Adonijah le a-peshü tsin gü thyü bin. A-le zegwasa kethyü temi nme.

⁶David le gwüngwa me ai a-ka nle nyuthyüo tson hü nla tse a-kenyü kemvu thyü shwi mvu, lo a-le a-npvü ketekho-o raja thyü titse so. A-le kerugari, lo keru kezen temi, lo temi henpvün no a-rikhun nrün genyu gwün ndolo.

⁷A-le Zeruiah nyugü Joab lo Abiathar püshükeda gü au zen kenthonlo, lo au le Adonijah cheti tse anyugun kenthon lo.

⁸Ai Nathan sidyükesha gü, Zadok püshükeda gü, Jehoida nyugü Benaiah,Shimei, Rei lo David temi kekvunyu dan we Adonijah then mvu.

⁹Khenyüme Adonijah le Enrogel zükenthün khoka, Peri Tso ge, tanyü, Methutse, lo senru aphu kegwa dan dushvulo. Tson-o a-tsasikezen raja gü nyenyu dan lo Juda temi raja go dan aphu koshü,

¹⁰ai a-le sidyükesha gü Nathan, Benaiah, lo raja gü temi kekvu nyu dan lo a-sikezen gü Solomon hidan koshü mvula.

¹¹Tsügenyu Nathan le Solomon a-jvü Bethsheba ka, “N we Haggith nyugü Adonijah le raja thyü titse kebin rüla tsü nyülo mvu ole? Lo ngun npugü David le tsü shabin mvu laso.

¹²Tsügenyu ryülo, nle nkeyhun kenilo nyü lo nnyu gü Solomon kenilo nyü yatselo ale nka zoshü tile.

¹³Nle Raja David kigü a-ka, ‘A npugü raja gü, nle ngogi ka swen-o anyugü Solomon no asika raja thyüti lo a-no a kedakhün ge dunti tsezo njü lo nyuthyüo Adonijah le raja thyü bin la sela?’ ”

¹⁴Lo Nathan le zosin-o, “Tson-o nle raja gü nthon kebin ka ako nsika ryüo n jo dan quen shü tile.”

¹⁵Tsügenyu Bethsheba le raja gü zhüki yü kethyü ka raja gü le then sala, lo Shunem nyu Abishag le raja gü nucha bin.

¹⁶Bethsheba le nkhün tsügü raja gü kelushü, lo raja gü le, “Nyuthyü ola?” tson shü.

¹⁷Tsontsin a-le, “A npugü nle Npugü n Sunggigü zan nyu swen-o ngogi ka anyugü Solomon no asika raja thyüti lo a-no a kedakhün ge dun ti, tsezo njü.

¹⁸Ai hire, Adonijah le raja thyü bin laso, lo a npugü raja gü le tsü shamvu.

¹⁹A-le methu tse, tanyü, lo senru aphu kegwa dan dushvuo raja gü nyenyu dan, püshükeda gü Abiathar lo teri temi dan rüpugü Joab tse koshü ai ngogü Solomon we komvu laso.

²⁰Lo a npugü raja gü, Israel nyu aphu, nle segü no nsika nkedakhün ge dun lotse zoshü tiyo nri bin nyo.

²¹Tson kemvu we a npugü raja gü le sila lo mele ahigü lo anyu Solomon ai pe me kenrhi nyu letse rüchün soti.”

²²Lo a-le raja gü nthon kebin ka sidyükesha gü Nathan ko yüryü.

²³Tsontsin anyugun le sidyükesha gü Nathan le yüryü bin nle tse raja gü ka zoshü, a-le ryüo raja gü mhundyü nyu nkhün tsügü kazü rün-o raja gü kelushü.

²⁴Nathan le, “A npugü raja gü, nle Adonijah no asika raja thyüti, lo a-no akedakhün ge dun ti, tse zoshü ole?

²⁵Kechamvule, a-le nthu gü methu tse, tanyü lo senru aphu kegwa dan dushvuo raja gü nyenyu dan, rihü dan kedagü Joab lo Abiathar püshükeda gü tse koshüo anyugun tyütsü lo nra sen-o, ‘Raja Adonijah no yhun kethon gü thyülo!’

²⁶Ai ngo ahigü, Zadok püshükeda gü, Jehoida nyugü Benaiah lo ngogü Solomon tse agun komvu laso.

²⁷Hile raja gü kenda ole, lo segü no nsika n kedakhün gen dun tiyo pe a npugü gonyu dan tesha shümvu ole?”

²⁸Tsontsin Raja David le, “Bethsheba koshü lo,”— tson-o a-le ryüo raja gü mhundyü ka solo.

²⁹Tsüka raja güle swen-o a-ka, “Rhün kehü Npugü, rhokedyü aphu nyu akeni keshü gü,

³⁰Israel nyu Npugü Sunggigü zan nyu ale swen-o nka kezo hontse nnyugü Solomon no asika raja thyüti, lo a-le asunka a rajakhün ge dunti, a joshü kenjü tsü nthu thyü shüti.”

³¹Tsontsin Bethsheba le nkhün tsügü kazü rün-o, “A npugü raja David no kethonthen yhunlo nda.”

³²Lo raja David le, Zadok püshükeda gü, Nathan sidyükesha gü, lo Jehoida nyugü Benaiah tse koshü, tsüka anyugun le ryüo raja gü mhundyü nyu bin lo.

³³Raja gü le anyugun ka, “Hagun agonyu dan pe hagun sin lo-o anyugü Solomon no akeru ge binlo tson-o Gihon ka nsheryü lo.

³⁴Tsünyu Zadok püshükeda gü lo Nathan sidyükesha gü au no terzü pe a-yün shüo a-no Israel nyu raja thyülo lo. Tson-o shukhun shü, lo nra sen-o, ‘Raja Solomon no yhun kethon gü thyülo,’ tsonshü!

³⁵Lo hagun a-sithen nsinryü lo tson-o a-no a kedakhün ge dun lolo. A-le asunka raja thyüti, kechamvule ale a-kejü pe a-no Israel lo Juda so kedagü thyülo laso.”

³⁶Tsonshü ntsin Jehoida nyugü Benaiah le, Amen: “Npugü Sunggigü no tsühontse shülo.

³⁷Nterün kepfü gü, Npugü le nzen kehü hontse a-no Solomon zen hülo, lo a-kedaphen no a npugü David kedaphen nye gonkvu lolo.”

³⁸Tson-o Püshükeda gü Zadok, sidyükesha gü Nathan lo Jehoida nyugü Benaiah lo Chereth nyu lo Peleth nyu dan le nshe, tson-o Solomon no raja David keru ge bin lo-o a-zen Gihon nyu gun.

³⁹Tsüka püshükeda gü Zadok le kershvu kanyu nyukhu tse nme ka terzü khi lo-o pe Solomon yün shü. Tsontsin anyugun le shu gü khun shü lo temi aphu nra sen-o, “Raja gü Solomon no yhun kethon gü thyülo,” tsonshü.

⁴⁰Lo temi aphu a-sithen nsinryü, anyugun le kheli khun lo a-zen-o shekerhün thyü, tson-o anyugun khwen le kazü kedün la.

⁴¹Adonijah lo a-zan kehü tesin dan aphu tyütsü penlo gü kejü ka kenra khwe tsünyü lo. Lo Joab le shukekhun gü nyülo-o nyida gü ki temi le nyhun kebin khwe higü hile nyuthyü bin nla?

⁴²A-le jozo nsen kebin ka püshükeda gü Abiathar nyugü Jonathan le ryü, tsüka Adonijah le, “Ryülo,” “Nle temi kegwa nme, jokegwa senryü lo,” tsonshü.

⁴³Tsontsin Jonathan le Adonijah ka, “Raja gü David le Solomon pe raja thyü laso.

⁴⁴A-le Zadok püshükeda gü, sidyükesha gü Nathan, Jehoida nyugü Benaiah lo Chereth nyu lo Peleth nyudan no a-zen nshegü a-no raja gü keru ge külo-o,

⁴⁵Gihon ka püshükeda gü Zadok lo sidyükesha gü Nathan au le terzü pe a-yün-o a-no raja thyülo laso. Tson-o anyugun le nyida gü nyu shekerhün khwen thyü nra sen-o nsinryü, tsügenyu temi le nra nrisa bin nle. Hagun le tsügü khwe nyülo bin nle; tsonshü.

⁴⁶Lo Solomon le ntsoka we raja thyü bin laso.

⁴⁷Tsü ntimvule raja gü gonyu dan le jochü pe npugü raja gü David tsüryüo a-ka, ‘N Sunggigü no Solomon zan thyü pe nzan nyeki zankechwi thyüshü, lo a-keda thyü pe nkeda nyeki gonkvu shülo nda,’ tsontsin raja gü David le a-zhüka nkhün tsügü a-kapu rüshvuo

⁴⁸ngun Npugü shwelo, “Israel nyu Sunggigü le nthu a tsipwen nme no asunka raja thyü shü laso, lo ano yhun bin-o tsü hyukelo genyu!’ ”

⁴⁹Tsüselo Adonijah zen kehü temi dan aphu nshvula, tson-o anyugun le so-o tsenchvüla.

⁵⁰Lo Adonijah le Solomon nshvu-o kershvu phika günyu yügü kershvu bin tse gü tejen lola.

⁵¹Mele Solomon ka Adonijah le a-nshvuo kershvu kanyu kershvu bin tse gü tejen sen-o, “Raja Solomon no swen-o a-le a-go gü dushvula loho tse zoshülo tse kebin rüla zoshü.”

⁵²Tsontsin Solomon le, “Keshanyu laka a-le tenyenlo kekü temi nme tse tsinshülo yatselo, a-pehü nme ai chela loho, ai a-ge thagwakemvu hyulo yatselo a-le siti.”

⁵³Raja Solomon le me nishüo kershvubin gü nyu Adonijah zenryü. Lo a-le raja gü mhundyü nyu nkhün tsügü a-rüshvu, lo raja gü le a-ka, “Nkaki gunla lo,” tsonla.