Read Southern Rengma Naga 1 RAJANYU 10 Bible Online

1 RAJANYU 10 - Southern Rengma Naga bible

1 RAJANYU 10

¹Sheba nyu Rajagi le Npugü le thakesha pe Solomon tsüo a-zan kechwi rüla nyülo ntsin, ketsin le mvuyo ketso titseo Jokerü sen ryü.

²A-le temi kechon zen-o Jerusalem nyu ryü, Ut dan ge tharün kegwa, lo suna kechon, lo tso minketsen pfüryü. Lo a-le Solomon kiryülo ntsin, a-nyun nyu nyu le bin yo tsü aphu pe a-zen kenthon.

³Solomon le tsügi le a-ka ketso kethyü aphu kenishü; Raja gü le thakon nme-e shalo mvu lao zope tsügi zenlo mvukela ndi.

⁴Sheba nyu Rajagi le Solomon thakesha, lo a-le ka thyü kelo,

⁵lo a-miz ge ketyüketsü, a-gonyu dan kedun, keranyu le khwen kebin, anyugun phinya kesen, a-hon kepen nyu, lo a-le Npugü ka nyu rope kershvu thyü kebin hyushü ntsin, a-kerüshvu la.

⁶Tson-o a-le raja gü ka, “Ale akazü ki ntho dan lo nthakesha rüla nyükelo tsüle, ketsin le.

⁷Ai ale ryüo ayhütyü pe hyula kemvu ka we, ale jo tsüdan tenyen mvu, hire, tsüdan ponha ai pe aka zomvu. Nkensü lo nkenya lo nkegwa rüla mele zo kehü nyükelo nyeki rüche sa.

⁸Ntemi dan, ngonyu dan, nmhundyü ka sozin bin kehü dan, lo nthakesha khwenyü kehü dan le a-yhen kegwatsin!

⁹Npugü n Sunggigü, n shwi pe a-kenyü kehü gü, tson-o nkhipe Israel rajakhün ge keshü gü shwen le! Kechamvule Npugü le kethonthen Israel so hü, tsügenyu nno kenjü lo tejvü sen titse nkhipe raja thyülo laso.”

¹⁰Tson-o a-le suna talent tsio nki, tharün kegwa kechon, lo tso minketsen khipe raja tsü: Sheba nyu rajagi le tharün kegwa pe raja gü Solomon ketsü tsülaki le tsüsiki niryü mvu.

¹¹Lo Hiram run Ofir nyu suna sen keryü dan ko, almug sen, lo tso minketsen kechon sen ryü.

¹²Tson-o raja güle almug sen pe Npugü ka nyu, lo raja ka gü nyu kachon, lo lükethyü nyu dan genyu lükethyü khin (Harps lo lyres) thyülo. Tsüsiki almug sen tsü tsülaki hyu lomvu.

¹³Raja gü Solomon le Sheba nyu rajagi le lonyü kebin dan, a-kehi aphu pe a-tsü, jweh pe a-ketsü nyeki. Tson-o tsügi lo a-gonyu dan le ranio anyugun kazü ki gunla.

¹⁴Chen meka Solomon le Suna talent tsi tsero-o hentsero-o tsero hyulo hü,

¹⁵tsünyeki a-le hakethyü nyu dan, tharünkegwa hakethyü nyu lo Arabia nyu raja nyudan lo Ahng dan aphu ka khajana hyulo hü.

¹⁶Lo raja gü Solomon le suna pe gida tsihvu chalo, gida nme le suna shekel tsitsero pe thyü.

¹⁷Lo a-le suna pe gi tsishen chalo; gi nme ge kilogram kenyhun kepen pe thyü. Tson-o raja gü le tsü pe Lebenon chün ka gü nyu bin njü.

¹⁸Tsünyeki raja gü le chunhü pe rajakhün keda nme thyülo, tson-o a-so suna kegwatsin pe jela.

¹⁹Rajakhün phalu le tsero le bin lo rajakhün so ge a-sikipon le methutse pe, lo khün gü lizin hizin abu le bin, lo shünyho kenyhun le abuhvu khoka sobin.

²⁰Lo phalu tsero dan ge lizin hizin shünyho nme me tse tseryü kenyhun le bin. Raja bin nme nyue hihontse thyü hü mvu.

²¹Solomon le tsü kehü honpen aphu suna pe thyükü, lo Lebenon chün ka günyu thakhin dan aphu suna pe thyükü. Rakagi pe nme-e thyümvu, Solomon gwenkho ka rakagi pe tha lihi kemvu hontse la.

²²Kechamvule raja gü hon Tarshish nyu teri run dan le Hiram run dan zen züda nyu hü. Chen shen jaka gwengwa Tarshish teri run dan le suna, rakagi, chunhü, nkhwü, teku lo güngu pfü ryü kehü genyu.

²³Tsü hontseo raja Solomon le kenya lo kensü kipon-e kazü nyu raja nyu aphu nyeki kegwatsin thyü.

²⁴Lo kazü aphu Solomon kensü, Sunggigü le khipe anyun nyu keshü jo tsü nyü titseo a-fü hü.

²⁵Chen kechwi a-ki keryü nyu aphu rakagi, suna pe kethyü kanyü, phinya, teri ronye, tharünkegwa, keru, kanyü pfü kehü nyukhu, tse jweh sen ryü a-tsü hü.

²⁶Solomon le kerugari lo keru ge kedun temi ko kequen lo, a-le kerugari yie meo tsizi lo keru temi yie tseryü kenyhun le bin, tsüdan peha no Jerusalem nyu raja gü zen bin lo kecha dan no rünyi lika hika bin.

²⁷A-raja gwenkho ka Jerusalem nyu rakagi pe tso hontse la, lo Sedar bin le chonri tsin pe Shephelah nyu tinkü bin hontse la.

²⁸Solomon le Ijipt lo Kue nyu keru keloshü hü lo raja gü hakethyü nyu dan le Kue nyu a-mi kera-o lolo hü,

²⁹Ijipt nyu kerugari nme le rakagi shekel tsitseroro, lo keru nme me le tsio henpvün pe hihü. Tson-o raja gü hakethyü nyu dan le tsü jwen kela pe Hit lo Sirianyu raja dan aphu nyu shühü. Hitnyu raja dan lo Siria nyu raja dan le raja gü ha temi dan no tsü nishü hü.