Read Southern Rengma Naga 1 RAJANYU 11 Bible Online

1 RAJANYU 11 - Southern Rengma Naga bible

1 RAJANYU 11

¹Raja gü Solomon le Faro nyugi nti mvule Moab nyu, Ammon nyu, Edom nyu, Zidornyu lo Hitnyu tenunyu shwi pe a-kenyü la.

²Tsipwen tsüdan rüla Npugü le Israel nyu nyenyu dan ka kezole, “Hagun le tsüdan ki sun thyü nya, nmvue tsüdan no hagun zen-o sunthyü nya, kechamvule tsüdan le hagun nyun thyüpe anyugun tero dan denzin gunla tsen tsüti.” Solomon le hidan zen keso-o anyu zen kengü tinla.

³A-le a-nu rajanyu nyugi tsi tsenyü, lo a-thenu tsishen le bin: lo a-nu dan le anyun thyü pe Sunggigü kipon rani la.

⁴Kechamvule Solomon le then la ntsin, a-nunyu danle a-nyun thyü kelu pe tero kecha denzin shü lola; tson-o a-le a-pvü David nyun hontse mvuo Npugü Sunggigü mhundyü nyu a-zü mvula.

⁵Kechamvule Solomon le Sidon nyu tero gi Ashtoreth lo Ammon nyukentsü kenche tero gü Milkom sithen tinla.

⁶Tson-o Solomon le Sunggigü mhundyü nyu thagwakemvu thyü, lo a-pvü David hontseo Npugü sithen shülo mvula.

⁷Tsontsin Solomon le Moab nyu tero kentsü kenche gü khemosh genyu, lo Ammon nyu nyenyu dan terokentsü kenche gü Molek genyu ko tse Jerusalem nphozin kipon kazüthun gü ge bin ketetso nme ka thyü shü.

⁸Lo a-le a-nunyu kecha dan aphu genyu kershvubin thyü shüo anyugun le tharün kagwa ro lo-o kershvu thyü pe anyugun tero dan tsü.

⁹Tsüka Npugü le Solomon ge anyuntala, kechamvule a-nyun le Israel Npugü Sunggigü, gwen hvu ge a-teno keshü gü, denzin mvuo rani kela genyu,

¹⁰lo a-no tero kecha then tinla loshvu, tson kethyü ahza pe a-ka zoshü laso, ai a-le Npugü le ahza khikeshü gü zenlo mvula.

¹¹Tsügenyu Npugü le Solomon ka, “Nle tha higü thyü kela genyu, nle kejozen kelo, lo ajvü dan, ale nka ahza khikeshü dan thyü zen mvukela genyu, ale nben nyu n rajaphen kenjün pe ngonyu tsü lati.

¹²Tson ai npvü David gü genyu, ngwenkho ka tsonla loho, ai nnyu gü ben nyu kenjün lati.

¹³Tson-e ale rajaphen gü aphu kenjün la loha; ai ago gü David genyu, lo ale kejü kelo gü Jerusalem genyu tsipwen nme pe nnyu gü tsü shüti,” tsonshü.

¹⁴Tson-o Npugü le Edom nyu raja tsipwen nyu nme, Hadad nyu thukeyhun pe Solomon ntsun sola.

¹⁵Kechamvule David le Edom lokelo ka rihü dan kentsen gü Joab le Edom nyu peche nyu aphu dushvu kela dan sunla titse nsin.

¹⁶Joab le Edom nyu pechenyu aphu dushvu la kemvuthen, shye tsero Israel nyu dan zen-o tsü nyu bin tinla.

¹⁷Tsüka Hadad le a-pvü gonyu Edom nyu peha zen-o, Ijipt ki tinla; ‘Tsü gwenkho tsüle Hadad le ntsenyu thyü bin zun.)

¹⁸Tson-o anyugun le Midia nyu bin-o Paran ki ryü lo tsünyu temi pe anyugun sin lo-o Ijipt nyu raja gü Faro ki gun. Faro le ka, ketyüketsü, lo kazü pe a-tsü shü.

¹⁹Faro le Hadad shwipe a-kenyü sala, tsügenyu a-le a-nu rajagi Tahpenes sikezen gi pe a-nu thyüshü.

²⁰Lo Tahpenes sikezen gile Hadad nyu Genubath nnyu lo, Tahpenes le Faro ka nyu higü leyi shü; tson-o Genubath le Faro nyenyu dan zen-o Faro kanyu yhun.

²¹Hadad le Ijipt nyu kehü ka David lo rihü dan kentsen gü Joab hvu le sikela rüla shalo ntsin, a-le Faro ka, “A no nkhe lao a kazü ki rani gunla ta,” tson sola.

²²Ai Faro le a-ka, “Nle a-zen kebin ka nyu rhodyü lao, nle n kazü ki gun kela nda bin nla?” Tsontsin a-le, “Tson mvu; ai ano gun lata,” tson shü.

²³Lo Sunggigü le shwikerüchün nyu kecha nme Zobah nyu raja gü Hadazer kanyu tinkela gü Eliadah nyu gü Rezon nyun thukeyhun shü,

²⁴tsü le David le Zobah nyu dushvu kela sika, Rezon le temi ko kequen lo-o tsüdan sharhi thyülo. (Lo anyugun le gü Damaska nyu yhun ketseka a-no anyugun raja thyülo.)

²⁵A-le Hadad serikemvu hontse Solomon rhün then Israel nyu nrhi, lo a-le Siria nyu raja thyü kebin then Israel nyu shwi ntsü.

²⁶Zereda nyu Efraim temi Nabat nyu Jeroboam Solomon gogü, Zeruah magi gü nyugü ko raja gü ntsun sola.

²⁷Solomon le Millo thyüshü, lo a-pvü David rünyi le ren bin kela ketsü nikeshü genyu a-le raja gü ntsun sola.

²⁸Jeroboam le temi thathyülo kekü nme, lo Solomon le selo higü hi ketseri hyulo ntsin, a-lope Josef tsipwen thakethyü nyu kentsen gü thyü shü.

²⁹Khenyüme Jeroboam le Jerusalem nyu chwikejü ka, Ahijah Shilonit nyu sidyükesha gü le tson nyu a-hyulo, lo Ahijah le phikeshün nme ben hü.

³⁰Tsontsin Ahijah le a-ge kebin phikeshün gü süyhün lo-o tsü sürhen pe tseryü kenyhun thyüla,

³¹tson-o a-le Jeroboam ka, “Nle tseryü khi lolo, kechamvule Israel nyu Npugü Sunggigü le hihontse zo hü nyo, ‘Hire, ale Solomon ben nyu rajaphen gü kenjün lati, tson-o tsipwen tseryü pe ntsü lati.

³²Ai a gogü David genyu, lo Jerusalem ale Israel tsipwen aphu dan nyu kejükelo nyida gü genyu a-le tsipwen nme hyulo ti.

³³Kechamvule a-le akhe laso, tson-o Sidon nyu terogi Ashtoreth, Moab nyu tero Khemosh, lo Ammon nyu dan tero gü Milkom rüshvu tin laso, a-pvü David hontse mvuo atson gü nyu tsonchü mvu, a mhundyü ka a-zükemvu thyü, a senkethyü jvü dan lo ale khikeshü ahza dan thyüzen mvu laso.

³⁴Tson-e ale a-ben nyu rajaphen aphu khila loha, ai ale kejükelo a gogü David le ale ahza khikeshü lo a senkethyü jvü dan thyüzen kethyü genyu, Solomon no a-rhünthen raja thyü ti.

³⁵Ai ale a-nyugü ben nyu rajaphen khi lo-o tsipwen tseryü pe ntsü lati,

³⁶ai ale tsipwen nme pe a-nyugü tsüti, tsüle azan no bin titseo kejükelo Jerusalem nyida nyu agogü David no a mhundyü ka keben nme thyüzin bin nrün genyu.

³⁷Ale nzen loti, tson-o nle nnyü kebin hontse nno Israel nyu raja thyüti.

³⁸Lo nle David hontse ale ahza khi pe nketsü aphu nyülo, tson-o atson nyu tsonchü, a mhundyü nyu kenjü gü thyü, a senkethyü jvü dan lo a johokeshü dan senlo yatselo ale nzen hüti, ale David ge thyü keshü hontse nno ka ketsin nme thyü, lo Israel khipe ntsü ti.

³⁹Lo higenyu ale David tsipwen nthyü nnyü ti, ai kethonthen genyu mvu.’ ”

⁴⁰Tsügenyu Solomon le Jeroboam dushvu la titseo füso, ai Jerobaom le tin-o Ijipt nyu Shishak raja ki güla, tson-o Solomon le sila kemvuthen tsünyu bin tin la.

⁴¹Lo Solomon tha kecha, a-le thyü keshü aphu, lo a-kensü tsüdan tsü Solomon tha lesü nyu thu pe bin njü mvu letse ole?

⁴²Solomon le Jerusalem nyu chen henzi Israel nyu aphu sa raja thyü.

⁴³Tson-o Solomon le a-pvü bon nyu hontse sio pe a-pvü David nyida nyu a-sunla, lo a-nyugü Rehoboam le a-sun ka raja thyülo.