Read Southern Rengma Naga 1 RAJANYU 12 Bible Online

1 RAJANYU 12 - Southern Rengma Naga bible

1 RAJANYU 12

¹Rehoboam le Shekim nyu gun, kechamvule Israel nyu aphu a-no raja thyü lati tseo Shekim nyu ryü kala genyu.

²Lo Nabat nyugü Jeroboam le tsü rüla nyülo kechamvule a-le raja gü Solomon mhundyünyu tin la-o Ijipt nyu bin zun, tsüselo Jeroboam le Ijipt khe lao rani ryüla.

³Me nipe a-kolo, tson-o Jeroboam lo Israel nyu temi aphu ryü, Rehoboam ka,

⁴“Npvü le agun khvü thyü nsu sa shü kenjü tsü nle ntsoka thyü kenshe shüta, tson yatselo agun le nlothyü ti,” tsonshü.

⁵Tsontsin a-le anyugun ka, “Hagun le tin tseo jonshen siki ryülo,” tsonshü. Tson-o temi dan le tinla.

⁶Tsüka raja gü Rehoboam le a-pvü Solomon le rhün kebin ka a-mhundyü nyu bin kehü püshü nyu dan ka, “Ano dihontse temi hidan jo kenishü tila?” tsonshü.

⁷Tsontsin anyugun le a-ka, “Nle nthu temi hidan hi go thyülo, anyugun kezo thyü, anyugun jo kenishü, anyugun ka jo kegwa zolo, yatselo anyugun le kethonthen ngonyu thyü loti,” tsonshü.

⁸Ai a-le püshü nyu dan le a-ka kezo dan khela, tson-o selo dan, a-zen shenhe me thyü yhunso keryü dan, a-mhundyü ka sobin kehü dan ketso.

⁹A-le anyugun ka, “Npvü le agun khvü thyü kensu shü ai nle agun ge tsü thyü kenshe shülo, tson kezo temi hidan ka ano dihontse zokeshü le hagun kenda la?” tsonshü.

¹⁰Tsontsin selo a-zen-o yhun sokeryü dan le a-ka, “Nka hihontse kezo dan, npvü le agun khvü thyü kensu shü ai nle agun ge tsü thyü kenshe shülo, tse keshü dan ka nle hihontse zolo, ‘Azenkero keshe güe apvü sen nyeki sükvu!’

¹¹Apvü le khvü kensu pe hagun geshü, ale hagun khvü gü thyü nsu sin shüti; apvü le senro pe hagun senthyü ai ale jukeshonnyu le nketsü hontse hagun senthyü ti.”

¹²Tson-o Jeroboam lo a-temi dan aphu jonshen nyü Rehoboam kiryü, a-le jonshen nyü aki niryü lo, tse zokeshü hontse.

¹³Tsüka raja gü le püshü nyu dan le aka kezo jodan then mvuo a-jo nkhon-o anyugun nthon,

¹⁴lo a-le selo ju le a-no zolo tse keshü hontse anyugun ka, “Apvü le khvü kensu pe hagun ge shü; ale tsünyeki thyü nsu kvu shüti; tsü ntimvule a-le senro pe hagun senthyü, ai a we jukeshonnyu le ntsü kethyü hontse hagun senthyü ti!”

¹⁵Tsü hontse raja gü le temi dan khwenyü mvula; kechamvule tha tsü gü tsü le Npugü kenda kela genyu, tsüle Npugü le Shiloh nyu Ahijah mün nyu Nebat nyugü Jeroboam ka kezo jo gü thyü penlo nrün genyu.

¹⁶Tson-o Israel nyu aphu raja gü le anyugun jo nyü shü mvu kela hyulo ntsin, temi dan le raja gü ka, “David kipon agun jün nyu le bin ola! Agun le Jesse nyugü hon nyu lo tila? Israel nyu dan a-ka kaki gun lalo! Rehoboam no a-npvü a-kesha thyülo chi!” Tsü hontseo Israel nyu temi dan le a-ka kaki gunla.

¹⁷Ai Israel temi Juda lojvü nyu kebin nyu dan we Rehoboam no anyugun so raja thyü.

¹⁸Tson-o raja gü Rehoboam le tha kethyü temi kentsen gü Adoniram nipe Israel nyu dan kishü, tsontsin anyugun le tso pe a-jonshvula. Tsügenyu raja gü Rehoboam le whütse a-kerugari ge külo-o Jerusalem ki tin gun la.

¹⁹Tsü gerho ryüo nthu keti Israel nyu dan le David kaminyu ntsun hü nyo.

²⁰Israel nyu aphu Jeroboam le rani ryükela shalo ntsin, a-kope kehun nyu shüo a-khipe Israel nyu aphu so raja thyü lola. Tsüdan nyu Juda tsipwen nti a-me temi kecha nme-e David tsipwen sithen mvula.

²¹Rehoboam le Jerusalem nyu ryülo ntsin, a-le Juda lo Benjamin tsipwen teri temi lak nmeo yie hentetse ko kequenlo, no Israel temi dan zen kega-o rajaphen lo nipe Solomon nyugü Rehoboam tsü nrün genyu.

²²Ai Sunggigü jo le Shemaiah Sunggigü temi gü ka ryüo,

²³Solomon nyugü Rehoboam, Juda raja gü lo Juda lo Benjamin temi lo temi a-sen dan aphu ka zoshülo,

²⁴“Npugü le hihontse zohü nyo, hagun le nsin gü hagun npvü hagun tsasikezen,Israel temi dan zen teri thyü nya, temi nme me tse a-ka ki rani gun lalo; kechamvule hihontse kela hile akenda genyu.” Tsüselo anyugun le Npugü jo nyüo anyugun ka ki rani gunla.

²⁵Tsontsin Jeroboam le Efraim lojvü nyu rincho ge Shekim nyu rünyi thyülo, tson-o tsünyu hütseo chwi gü Penuel rünyi thyülo.

²⁶Tsüka Jeroboam le a-nyunki, “Ntsoka we rajaphen sen-o David kakhwün nyu nigun lati;

²⁷keshanyu laka temi hidan hile Jerusalem ki nsin gü Npugü kanyu kershvu thyü tselo, anyugun npugü kipon gü lati, tson-o anyugun le adushvu la njüo ranio Juda raja gü Rehoboam kipon gü la loshvu.”

²⁸Tsügenyu raja gü le tsü rüchün tseo, suna methunyu kenyhun thyülo. Tson-o a-le temi dan ka, “Hagun le thonri Jerusalem ki nsin bin laso. Hire, O, Israel hagun tero, Ijipt kazü nyu hagun zen chwikeryü hvu le re!” tsonshü.

²⁹Tson-o a-le nme pe Bethel nyu shü lo kecha gü pe Dan nyu shüshü.

³⁰Lo temi dan le gü Bethel nyu lo Dan nyu tsü rüshvu kethyü genyu mula.

³¹A-le rinchothun dan ge kershvuka thyüshü, tson-o Levi tsipwen kemvu temi dan dannyu püshükeda nyu kejü shü.

³²Jeroboam le shye tetse gü jon ryüpvün nyü Juda nyu nga hontse kethyü nme ndalo, tson-o a-le kershvubin ge kershvu thyü, tson-o a-le Bethel nyu kershvu thyü pe a-le thyükeshü methunyu hvu tsü, lo püshükeda dan pe a-le Bethel nyu thyü keshü bin ketetso dan kashü.

³³A-le anyunki rhikelo gü, shye tetse, jonryü pvün nyü Bethel nyu a-le thyükeshü kershvubin gü ki nsin gü kershvu thyü, tson-o Israel nyu temi dan genyu keho nme thyü shü, lo kershvubin ge tharün kegwa roshü.