Read Southern Rengma Naga 1 RAJANYU 13 Bible Online

1 RAJANYU 13 - Southern Rengma Naga bible

1 RAJANYU 13

¹Jeroboam le tharün kegwa roti tseo kershvu bin ka so kebin ka, hire, Juda nyu Sunggigü temi nme le Npugü jozen-o Bethel nyu ryü.

²Tsontsin temi gü le Npugü jo gü then-o kershvubin gü ntsun-o zo, “O Kershvubin, Kershvubin, Npugü le hihontse zo hü nyo: “Hire, nyu nme nnyu pe David kanyu shüti, a-zan le Josiah; lo a-le hagun ge tharün kegwa ro kehü ketetso dan ge püshükeda thyü kebin dan ge kershvu thyü shüti, lo nge temi ru roshü ti.”

³Lo a-le tsünyü tsü zansü nme khishüo, “Npugü le zo keshü zansü tsüle hile. Hire, kershvubin gü le nren lati, tson-o tsüge kebin jonbü no ja lati.” tson zoshü.

⁴Lo raja Jeroboam le Sunggigü temi gü le Bethel nyu kershvubin gü ntsun-o jozo sen kebin nyülo ntsin, a-le kershvubin nyu a-ben shwen pen-o, “A-ten lolo!” Tsontsin a-ben shwenpen-o tsin kebin gü tsü le nkola, tson-o süshe tsüryülo mvula.

⁵Lo Sunggigü temi gü le Npugü jo nyu zansü tsin keshü hontse kershvubin gü le nrenla, tson-o Jonbü le kershvubin gü nyu jala.

⁶Raja gü le Sunggigü temi güka, “Nle ntsoka n Sunggigü ka agenyu n shwikenjün hishü lo, tson-o aben thyü ngwa nishü ta!” Tsontsin Sunggigü temi gü le Npugü ka hishü, tson-o raja gü ben thyü ngwa nipe himhundyü hontse shüla.

⁷Raja gü le Sunggigü temi gü ka, “A zen-o aka ki gun gü tyütsü lolo, lo ale nchün thyü shü tile,” tsonshü.

⁸Tsontsin Sunggigü temi gü le raja gü ka, “Nle nka peha pe atsü titse ai ale nzen-o gun loho. Lo ale bin hinyu chvütyü nmvue zü tsü loho;

⁹kechamvule Npugü jo le, ano tyütsü, nmvue keryü tsongü then-o rani gun nya lotse aka zoshü kela genyu.”

¹⁰Tsügenyu a-le Bethel nyu keryü tson gü nyu nigun mvuo tson kecha then gunla.

¹¹Tsügwenkho ka Bethel nyu sidyükesha kethen nyu nme le bin. Lo a-nyu dan le ryüo Sunggigü temi gü le Bethel nyu thathyü keshü rüla aphu pe a-ka zoshü; a-le raja gü ka kezo jo dan kope anyugun pvü ka zoshü.

¹²Anyugun pvü le anyu ka zoshü, “Tson digü nyu a-le gü la la?” Lo anyu dan le Juda ki keryü Sunggigü temi gü le gü kela tson zope a-zen shü.

¹³Lo a-le anyu dan ka, “Gada nme nda shülo.” Tson-o anyugun le a-genyu gada gü ndanron shü lo a-le tsüge külo,

¹⁴tson-o a-le Sunggigü temi gü sithen gun laryü teshobin nme hensin ka dun bin-o hyulo; tsüselo a-le, “Nle Juda nyu keryü Sunggigü temi gü tsü le nmvu la?” tson ketsoshü. Tsontsin a-le, “Ale tsügü le,” tsonshü.

¹⁵Tsüka a-le a-kazo, “Nnyi kaki gun gü chvütyü lolo.”

¹⁶Tsontsin a-le, “Ale rani kemvui, nmvue nzen gü kemvui. Ale bin higü nyu nzen-o tyütsü kemvui le,

¹⁷kechamvule Npugü le aka kezo le, nle tsünyu tyütsü nya, nmvue nle kegü tson gü then niryü nya,” tson aka zoshü le.

¹⁸Tsontsin sidyükesha kethen gü le a-ka, “Ako nhon tse sidyükesha nyu le, tsangge lilo nyu nme le Sunggigü jo pe aka zo-o, a-zen nkaki rani ryüo a-no tyütsü lolo,” tson shü le. Tson-o sidyükesha kethen gü le asa shü.

¹⁹Tsügenyu Sunggigü temi gü le ranio a-then gun gü a-kanyu tyütsülo.

²⁰Tson-o au le miz ka kebin ka, Npugü jo le a-zen nsin keryü sidyükesha gü karyü,

²¹lo a-le Juda nyu keryü Sunggigü temi gü ka, “Npugü le hihontse zohü nyo, nle Npugü jo zenmvu kela genyu, lo Npugü n Sunggigü le nka kezo jo gü then mvula.

²²Tson-o rani ryü Npugü le nno tyütsü nya tse keshü bin gü nyu tyütsü kela genyu, nkesi min no npvü bon nyu sika bin nyu ryü loho.”

²³Lo a-le tyütsü lo kela siki, sidyükesha gü, a-le zen-o ranikeryü gü genyu gada nda shü,

²⁴tson-o a-le tin kejüka tson nyu shünyho nme teno lo-o a-tenla. A-kesi min le tson nyu keto njü, lo gada gü le a-kho ka bin, shünyho gü ko tsü khoka bin.

²⁵Lo hire, mele tsü nken gü jüo, kesi min le tson nyu bin lo shünyho le a-khoka so kebin hyushüo ryü sidyükesha kethen nyu gü le kebin rünyi gü nyu tsü rüla zoshü.

²⁶Sidyükesha gü tsonneki a-zen ranigun keryü gü le tsü nyülo ntsin, “Tsü le Npugü khwenyü mvukela Sunggigü temi gü laso, tsügenyu Npugü le a-khipe shünyho tsüla-o Npugü jo le a-ka kezo hontse a-ten-o a-süthü-sürüla sete,” tsonshü.

²⁷Tson-o a-le a-nyu dan ka, “Gada gü nda pe atsü shülo,” tson-o anyugun le gada gü nda shü.

²⁸Lo a-le gü laryü simin gü le tson nyu keto bin lo gada lope shünyho au le tsü khoka so kebin hyulo. Shünyho gü le simin gü tyü lamvu nmvue gada gü ten lamvu.

²⁹Sidyükesha gü le Sunggigü temi gü simin pen pe agada ge shülo, tson-o a chechü lo pe sunla titse khipvüo rünyi nyu rani ryü.

³⁰Lo a-le simin gü tsü pe a-npvü a-sika nyu sunla-o, anyugun le, “Oh, asikezen güo, Oh, asikezen güo!” tson achechü chü.

³¹Sun kela siki, a-le anyu dan ka, “Ale sila lo akhipe Sunggigü temi gü pe kesun sika nyu sunla lo, lo aru pe a-ru khoka shüla nye.

³²Kechamvule, a-le Npugü jo zo-o Bethel nyu kershvubin gü, lo Samaria nyu bin ketetso dan ntsun kethyü dan tsü le thyü pen tsentsü ti.”

³³Hihontse kela sikie Jeroboam le serikemvu tson dan nyu ranilo mvula, ai a-le temi mijanyu lo ligü higü thyü kenyü nyu thyü kenshün pe bin ketetso dan ge püshükeda thyü.

³⁴Jeroboam kemu higü hi genyu kenke kenmhü le kazü nyu a-kami ge ryüla.