Read Southern Rengma Naga 1 RAJANYU 14 Bible Online

1 RAJANYU 14 - Southern Rengma Naga bible

1 RAJANYU 14

¹Tsügwenkho ka Jeroboam nyugü Abijah le ha lola.

²Lo Jeroboam le a-nu ka, “Nle solo, lo n joja thyü kecha thyülo, nle Jeroboam nu letse kethyü temi nme no shamvu nrün genyu, tson-o Shiloh ki güo; hire, tsünyu sidyükesha gü Ahijah le bin nyo, a-le ano temi hidan so raja thyü titse zoshü le.

³Nle tensü pfü tseryü, kek peha, lo khuzü laki nme khi lo-o a-ki gülo; a-le nyu higü hile dihontse lati yo pe nka zoshü ti,” tsonshü.

⁴Jeroboam nu le tsü hontse lo; tson-o a-le Shiloh nyu Ahijah ka kiryü. Tsüka Ahijah le then kela genyu a-yhütyü le tha hyu mvula.

⁵Lo Npugü le Ahijah ka, hire, Jeroboam nu le a-nyugü le ho kebin genyu nka tha ketso titse ryü zhü nyo; nle a-ka hihontse zoshü lo. A-le tenunyu kecha nyu rothyü ryü zhü nyo.

⁶Ai Ahijah le a-le kakhin ka keryü a-tson kechü khwenyü lo ntsin, a-ka, “Yüryülo, Jeroboam nu, nle nyuthyüo temi kechanyu rothyü bin nla? Kechamvule ngenyu jolo keshvu le kebin pe atenyen keshü genyu.

⁷Gun gü Jeroboam ka, ‘Israel nyu Npugü Sunggigü le hihontse zohü nyo: Ale temi danda nyu npen soshü, lo nthyü pe atemi Israel nyu sharhi thyüshü.

⁸Lo David kanyu rajaphen kenjün pe ntsüshü, tson-e nle a johokeshü dan thyüzen, a-nyu aphu pe asithen, lo amhundyü ka kenjü nti thyü kehü gü a gogü David hontse lomvu laso;

⁹ai nle nmhundyü ki nyu dan aphu nyeki tha gwakemvu thyükvu lo nle teromen kecha dan zülo lo tharozun pe thame dan thyü lo, lo akhipe nsikipon shüla, tson-o a nyungwün kekhün pe ano anyunta la.

¹⁰Tsügenyu, hire, ale thagwakemvu sen-o Jeroboam kanyu ryüti, Jeroboam kanyu dothyü kemvu nyue lo do metse Israel nyu dan nyu peche nyu nmeme tse duthü kü lati, tson-o temi nme le methuvü robula kemvu then rolakehü hontse Jeroboam nyu kakhün bokenmhe shü lati.

¹¹Jeroboam kaminyu, rünyi nyu kesi dan tehi no tyü ti, lo low nyu kesi dan güda no tyüti, kechamvule Npugü le zoshü laso.’ ”

¹²Lo Ahijah le Jeroboam nu ka zosin-o. “Tsügenyu nle so-o, nka ki gun lalo. Npha le rünyi nyu yülo ntsin nyugü le sila ti.

¹³Lo Israel nyu aphu a-chechüo a-sun lati; Jeroboam ge chwikeryü dan nyu a nti sika nyu sun ti, kechamvule Israel nyu Npugü Sunggigü mhundyü ka Jeroboam kaminyu dan nyu a-ge tha kegwa peha hyukelo genyu.

¹⁴Tsü nti mvule nthu Jeroboam kaminyu dan nkela nrün Npugü le a-npvü a-genyu Israel dan nyu raja nme penso shüti.

¹⁵Lo tsügerho nyu Npugü le shaja pe Israel nyu tsüti, lo anyugun le nnun pe nbo le züri nyu nnun kebin hontse lati; lo a-le khipe anyugun bon nyu ketsü kazü kegwa hi gü nyu Israel nyu temi dan phü lao anyugun no nren nruo Eufrates züri nken lati, kechamvule anyugun le terogi Asherah men züo Npugü kenyükemvu thyü kela genyu.

¹⁶Lo a-le Israel nyu khe lati, kechamvule Jeroboam le mula, lo a-genyu Israel nyu no mukela genyu.”

¹⁷Jeroboam nu le so-o Tirzah nyu gunla. Lo a-le ka khenpvü tilo ntsin nyugü le sila.

¹⁸Lo Npugü jo le a-gogü Ahijah sidyükesha gü mün nyu kezo hontse Israel nyu aphu a-chechüo a-sunla.

¹⁹Jeroboam tho kecha dan, a-le dihontse teri thyü lo raja thyü yo, hire, tsüdan tsüle Israel nyu raja dan rüla lesü nyuthu njü nyo.

²⁰Jeroboam le chen nki kenyhun raja thyüo apvübon nyu hontse sila lo anyugü Nadab le a-sun ka raja thyülo.

²¹Solomon nyugü Rehoboam le a-keyhun chen henzi nme ka Judanyu raja thyülo, lo a-le Npugü le Israel tsipwen aphu dan nyu a-zan pe bin titseo kejükelo nyida Jerusalem nyu chen tseryüo tsenyü raja thyü. A-jvü zan le Naamah, ale Ammon nyu.

²²Lo Juda temi dan le Npugü mhundyü nyu thagwakemvu thyü küla, tson-o anyugun le anyugun pvübon nyu nyeki kemu kethyü dan genyu Npugü nyun thyü pe a-no anyugun ge a-nyunta la.

²³Kechamvule tsüdan ko rincho ketetso aphu ge, lo senbin kenjvü aphu hensin anyugun npvü anyu genyu Asherah men kezü lo tso keda rüshvu tinla;

²⁴lo kazü tsü gü nyu pechenyu le pechenyu zen-o kejakemvu tho kethyü ko binla. Tson-o anyugun le Npugü le Israel nyu dan mhundyü nyu hü pe shwekela tsipwen kentsü kenche tho hontse kethyü aphu thyü tinla.

²⁵Rehoboam le raja thyü kelo chen pvün ka Ijipt raja gü Shishak le nsin ryü Jerusalem hü.

²⁶Tson-o a-le Npugü kanyu lo raja gü kanyu kenya kequen kebin dan aphu jün sen tinla. Lo a-le Solomon le suna pe gida kecha dan ko aphu sen tinla.

²⁷Lo raja Rehoboam le tsü sunka lazo pe gida thyülo, tson-o tsü khipe raja gü khenpvü nyu rikhun keda dan ben nyu shü njü,.

²⁸Lo raja gü le Npugü ka ki kegun tsen, rikhun nyu le tsüdan pen tseo, tsüdan sen niryüo rikhun tsen gü nyu shüla la tse hü.

²⁹Rehoboam tha kecha, a-le thyü keshü dan aphu, tsüdan tsü Juda raja dan rüla lesü nyu thu njü mvu ole?

³⁰Rehoboam lo Jeroboam au janyu terithyü zin hü.

³¹Tson-o Rehoboam le a-pvübon nyu hontse sila, lo David nyida nyu a-bon nyu zen-o sunla. Lo a-nyugü Abijah le A-sunka raja thyülo.