Read Southern Rengma Naga 1 RAJANYU 15 Bible Online

1 RAJANYU 15 - Southern Rengma Naga bible

1 RAJANYU 15

¹Nabat nyugü Jeroboam le raja thyü kelo chen tseryüo tetse ka, Abijah le Juda so raja thyülo.

²A-le chen shen Jerusalem nyu raja thyü. A-jvü le Abishalom nyugi a-zan le Maakah.

³A-pvü hontse a-le kemu aphu nyu tson chü; lo a-bon David hontse a-le a-nyun aphu sen-o Npugü a-Sunggigü mhundyü nyu ketsin gü thyülo mvula.

⁴Tson yatse-e David genyu Npugü a-Sunggigü le Jerusalem nyu, a-nyu penso shü titse lo Jerusalem thyüshü titseo keben nme pe a-tsü.

⁵Kechamvule David le a-keyhun then, Npugü mhundyü nyu nyu le njüyo tsüthyü, Npugü johokeshü dan nme zen mvula mvu, Hitnyu temi Uriah rüla ka tsü nti a-me.

⁶Abijah le raja thyü kebin then Jeroboam au janyu terithyü bin-o ti.

⁷Abijah tha kecha, a-le thyü keshü dan aphu, tsüdan tsü Juda raja dan lesü nyu thu njü mvu ole?

⁸Lo Abijah le a-pvübon nyu dan hontse sila lo anyugun le a-lope David nyida nyu sunla, lo a-nyugü Asa le a-sunka raja thyülo.

⁹Jeroboam le Israel nyu so raja thyükelo chen nki ka Asa le Juda so raja thyülo,

¹⁰lo a-le chen henzi nme Jerusalem nyu raja thyü. A-jvü le Abishalom nyugi a-zan le Maakah.

¹¹Lo Asa le a-bon David hontse Npugü mhundyü nyu kenjü gü thyü.

¹²A-le kazü gü nyu pechenyu le pechenyu zen kejakemvu kethyü tsü hüla, lo apepvü nyu dan le teromen kezü thyü keshü dan pe shwe küla.

¹³Tsüntimvule a-le Maakah no raja gü a-jvü thyü mvula, kechamvule tsügi le Asherah tero kentsü kenche gi men nme sen kehü genyu; Asa le tsügi teromen kezü gü boren pe Kidron rise ka tsü rola.

¹⁴Ai bin ketetso dan we boshe mvula; tson yatse-e Asa le a-keyhun then Npugü kipon ketsin nyu bin-o ti.

¹⁵A-pvü lo a-le thyü kenshün kelo kanyü rakagi, suna lo thakhin dan senryü Npugü kanyu shülo.

¹⁶Asa lo Israel nyu raja gü Baasha au keyhun then terithyü.

¹⁷Tson-o Israel raja gü Baasha le nsin gü Juda zen kenren-o Ramah thyülo, tsüle temi nme no Juda raja gü Asa ki yü nmvue chwi mvulo nrün genyu.

¹⁸Tsontsin Asa le Npugü kanyu kequen kehü ka günyu kebin rakagi, suna lo raja kanyu kenya kebin aphu khi lola, tson-o tsü khipe a-gonyu ben nyu shüla, tson-o raja gü Asa le tsü nipe Damaska nyu kebin Siria nyu raja gü Tabrimon nyugü, Benhadad; a-bon le Hezion kishüo:

¹⁹“Apvü lo npvü au kepvüshe gun keryü hontse nnyi ko kepvüshe tile. Ale rakagi lo suna jwe thyü pe ntsü shü nbin nle. Israel raja gü Baasha no akazü nyu tinla nrün genyu, gü hai kepvüshe kebin tsü borho lalo,” tsonshü.

²⁰Lo Benhadad le raja gü Asa khwenyüo rihü dan so keda dan lo rihü dan nishüo Israel nyu zen kega-o Ijon, Dan, Abel Beth Maakah, lo Chinneroth aphu pe Naftali kazü sin-o lolo la.

²¹Baasha le tsü rüla nyülo ntsin, a-le Ramah thyü kebin gü khela, tson-o Tirzah nyu yhun tinla.

²²Tsüselo raja gü Asa le jolo pe Juda temi aphu tsüshü; temi nme-e khe mvutse, tson-o anyugun le chwi gü Baasha le pe Ramah thyü kebin tso dan lo tesen dan pfü lola; Asa le kanyü hidan khipe Benjamin lojvü nyu Geba lo Mizpah thyülo.

²³Asa tho kecha, a-kekvu, a-le thyü keshü dan, a-le thyükeshü rünyi dan, tsüdan tsü Juda raja dan rüla kethu lesünyu thu njü mvu ole? Ai a-then gwünki apha ge kethyü nme le binla.

²⁴Lo Asa le a-pvübon nyu hontse sila, tson-o a-bon David rünyi nyu sunla, lo a-nyu Jehoshafat le a-sunka raja thyülo.

²⁵Juda raja gü Asa le raja thyükelo chen hvu ka Jeroboam nyugü Nadab le Israel so raja thyülo; lo a-le Israel so chen hvu raja thyü.

²⁶A-le Npugü mhundyü nyu nyu le gwamvu yo tsüthyü, lo a-pvü tson nyu tsonchü tson-o a-kemu genyu Israel thyü pe mula.

²⁷Issachar kaminyu Ahijah nyugü Baasha le phisin ki a-ntsun lola; tson-o Filistian nyu rünyi Gibbethon nyu Baasha le a-dushvula, kechamvule Nadab lo Israel nyu aphu Gibbethon hunpfü kebin genyu.

²⁸Tson-o Asa le Juda raja thyü kelo chen shen ka Baasha le Nadab dushvu lao a-sunka raja thyülo la.

²⁹Lo a-le raja thyülo ntsin, Jeroboam kaminyu aphu dushvula, Npugü le a-gogü Shiloh nyu Ahijah ka kezo hontse a-le Jeroboam kaminyu kerhün ronzin nme nsen mvutse nke küla.

³⁰Kechamvule tsüle Jeroboam kemu, lo a-le Israel thyü pe mukela genyu, Israel Npugü Sunggigü nyun thyü pe a-no a-nyunta la.

³¹Nadab tho kecha dan, lo a-le thyükeshü dan aphu, tsüdan tsü Israel raja dan rüla kethu lesü nyu thu bin mvu ole?

³²Asa lo Israel raja gü Baasha au keyhun then au janyu terithyü.

³³Asa le Juda raja thyükelo chen shen ka Ahijah nyugü Baasha le Tirzah nyu Israel nyu aphu so raja thyülo, lo a-le chen nki pezi raja thyü.

³⁴A-le Npugü mhundyü nyu nyu le gwamvu yo tsü thyü, lo Jeroboam kemu genyu Israel nyu thyü no mu kela nyu tsonchü.