Read Southern Rengma Naga 1 RAJANYU 16 Bible Online

1 RAJANYU 16 - Southern Rengma Naga bible

1 RAJANYU 16

¹Npugü jo le Hanani nyugü Jehu karyüo Baasha ntsun-o a-ka;

²“Ale kenphünyu nthyü nso shü, lo nthyü pe nno atemi Israel sharhi thyüshü, laryü nle Jeroboam tson nyu tsonchü,lo atemi Israel thyü pe no kemu thyüo anyun thyü nshvu;

³hire, ale Baasha lo a-kami sho pe shwen lati, lo ale aka thyü pe Nebat nyugü Jeroboam ka hontse lati.

⁴Baasha kaminyu ligü higü rünyi nyu sikela gü tehi no tyü ti; lo low nyu sikela gü güda dan no tyü ti,” tsonshü.

⁵Baasha tho kecha, lo a-le nyuthyü shüyo, a-kekvu, tsü dan Israel raja dan lesü nyu thubin mvu ole?

⁶Baasha ko a-pvübon nyu hontse sila; tson-o Tirzah nyu a-sunla; lo a-nyu Elah le a-sunka raja thyülo.

⁷Npugü jo le Hanani nyu sidyükesha gü Jehu ka ryüo Baasha lo a-kami ntsun kethyü le, a-le Npugü mhundyü nyu thagwakemvu kethyü, lo a-ben tho dan aphu genyu a-nyun thyü nshvu keshü lo Jeroboam kaminyu hontse kela; tsünyeki a-le Jeroboam nyu kaminyu aphu dushvu kela genyu.

⁸Asa le raja thyükelo chen nkio tsero ka Baasha nyugü Elah le Tirzah nyu Israel so raja thyülo, lo a-le chen hvu raja thyü.

⁹Ai a-gogü Zimri, a-kerugari peha kentsen gü le phisin ki a-ntsun lola. Tson-o a-le Tirzah nyu a-ka keshwi gü, Arza kanyu zu tsü nzeü kebin ka,

¹⁰Zimri le yüryüo a-dushvu lao a-sunka raja thyü lola. Tsüle Asa le Juda raja thyü kelo chen nkio tsenyü ka.

¹¹A-le raja thyülo-o a-rajakhün ge dun lo nyemhun, Baasha kaminyu aphu dushvula; a-shvunye nmvue a-pvünyu pechenyu nme-e nsen shümvu.

¹²Npugü jo le sidyükesha gü Jehu mün nyu zokeshü hontse, Zimri le Baasha kaminyu aphu nkela.

¹³Kechamvule Baasha kemu aphu, lo anyugü Elah kemu dan genyu Israel no kemu thyüla, tson-o anyugun teromen dan le Israel nyu Npugü Sunggigü nyun thyü nshvu pe a-no a-nyu ge a-nyuntala.

¹⁴Elah tho kecha, a-le thyü keshü dan aphu Israel raja dan rüla kethu lesü nyu bin mvu ole?

¹⁵Asa le Juda raja thyükelo chen nkio tsenyü ka Zimri le Tirzah nyu jon tsenyü raja thyü. Israel nyu rihü dan le Filistian nyida Gobbethon hü chwiryü,

¹⁶lo rihü dan le Zimri le teda thyüo raja gü dushvula le tse kethyü rüla nyülo, tsügenyu Israel nyu aphu, rihü dan sokeda gü Omri kejü pe tsü jon nyü Israel so raja thyülo la.

¹⁷Tson-o Omri lo Israel nyu aphu Gibbethon khela njio ryüo Tirzah lolo la.

¹⁸Lo Zimri le rünyi nyida gü lolo kela hyulo ntsin raja gü kanyu yülo njio raja gü ka roshüo mah no a-roshvula.

¹⁹Tsü le a-kemu dan, a-le Npugü mhundyü nyu thagwakemvu kethyü, Jeroboam tson nyu tsonchüo Israel no mukela dan genyu, tsonla.

²⁰Lo Zimri tho kecha, lo a-le phisin ki me ntsun kethyü, tsüdan tsü Israel raja dan rüla kethu lesü nyu thu bin mvu ole?

²¹Tsüselo Israel nyu temi dan le kenjün pe dan hvu thyüla: Temi peha le Ginath nyugü Tibni no raja thyü titseo a-sithen; lo dan mele Omri sithen lola.

²²Ai Omri sikethen dan le Ginath nyugü Tibni temi dan nyekvu lola; tson-o Tibni le sila, lo Omri le raja thyü lola.

²³Asa le Juda raja thyükelo chen shenryüo nme ka Omri le Israel so raja thyülo, a-le chen tseryü kenyhun raja thyü; chen tsero Tirzah nyu raja thyü.

²⁴A-le rakagi talent kenyhun pe Shemer ka Samaria rincho gü heilo; a-le tsokhwen pe rincho gü hun lo-o rünyi thyülo, lo tsü pe himhundyü rincho gü npugü, Shemer zan ka Samaria tse kolo.

²⁵Omri le Npugü mhundyü ka nyu le gwamvu yo tsüthyü, lo a-mhundyü ki nyu dan nyeki gwakemvu thyü kvula.

²⁶Kechamvule a-le Nebat nyugü Jeroboam tson nyu tsonchü; lo a-kemu nyu a-le Israel thyü pe no mula, a-teromen kezü dan genyu Israel nyu Npugü Sunggigü nyun thyü nshvula.

²⁷Omri tho kecha, lo a-kekvu pe hi keshü dan, tsüdan tsü Israel raja dan rüla kethu lesü nyu thu bin mvu ole?

²⁸Omri le apvü bon nyu hontse sila, tson-o Samaria nyu a-sunla; lo a-nyugü Ahab le a-sunka raja thyülo.

²⁹Asa le Juda raja thyükelo chen shenryüo tetse ka, Omri nyugü Ahab le Israel so raja thyülo, lo Omri nyugü Ahab le Samaria nyu Israel so chen nki kenyhun raja thyü.

³⁰Lo Omri nyugü Ahab le a-mhundyü keyhun nyu dan aphu nyeki Npugü mhundyü nyu gwakemvu thyütsin.

³¹A-le Nebat nyugü Jeroboam hontse kemu kethyü nti mvu le, tsünyekie Sidon nyu raja gü Ethbaal nyugi Jezebel lolo, tson-o gü Baal lothyü; lo a-rüshvu tinla.

³²A-le Samaria nyu Baal ka nme thyülo, lo tsünyu Baal kershvubin nme thyüshü.

³³Lo Ahab le Asherah men nme thyülo. Tson-o Ahab le Israel nyu raja a-mhundyü ki nyu dan aphu nyeki Israel nyu Npugü Sunggigü nyun thyü nshvu kvu shü.

³⁴A-gwenkho ka Bethel nyu Heil le Jeriko thyüshü. Npugü le Nun nyugü Joshua mün nyu zokeshü hontse, Heil le a-bin khwen so ntsin a-nyuri gü Abiram le sila, lo a-le khinrun dan thyülo ntsin a-nyupin gü Segub le sila.