Read Southern Rengma Naga 1 RAJANYU 19 Bible Online

1 RAJANYU 19 - Southern Rengma Naga bible

1 RAJANYU 19

¹Ahab le Jezebel ka Elijah le thyü keshü dan aphu, dihontse a-le zhethon pe sidyükesha nyu dan dushvu layo zoshü.

²Tsüselo Jezebel le lilo nipe Elijah kishüo, “Senduki higwenkho ka, ale nkeyhun khipe tsüdan nme keyhun hontse lamvu yatselo, teronyu dan no age tsühontse thyü shü, lo tsünye kerüche-e thyüshülo.”

³Tsontsin Elijah le nshvuo a-keyhun nrholo nrün genyu tin-o Juda rünyi Beersheba nyu ryü, lo tsüka a-gogü khepe shüla.

⁴Ai a-le a npvü khenyüme tson kechü ki tehen nyu gunla, a-le gü senbin kengü nme hensin ka dun-o; ano sila gwünlo tse kehi thyüo, “O Npugü hi n tie gwaso, a keyhun khisen tinla gwünlo; kechamvule ale apvübon nyu dan nye gwakvu bin mvu,” tson.

⁵Tson-o a-le senbin hensin nyha tsüo zhütin la. Lo hire, tsangge lonyu nme le a-kesüshü, lo a-ka, “So ryüo tyülo,” tsonshü.

⁶Lo a-le nrishü laryü, hire, a-pe ka tso kenyün ge tensü nme lo laki nme nyu zü le bin-o hyulo. A-le tyütsü lo-o zhüni güla.

⁷Lo Npugü jolo gü le gwün hvu ge gü a-ka ryüo a-kesü shü, tson-o a-ka, “Soryüo tyülo, kemvu we kenjwen gü le ngenyu rüsa kethyüi le.”

⁸Lo a-le soryüo tyütsülo, tson-o ketyüketsü ge kekvu hyu kelo nyu tsangkeben jon henzi lo tsangkezün jon henzi tsonchüo Sunggigü kazüthun Horeb ge gunla.

⁹Lo a-le ryüo tsokü nme nyu nsen bin. Lo hire, Npugü jo le a-ka ryüo, “Elijah, nle hika nyuthyü bin nla?” tsonshü.

¹⁰Tsontsin a-le, “Ale danda dan Npugü Sungggü genyu ayhen thyü sahü, ai Israel nyu temi dan le nzen-o kejozen kelo gü khela, nkershvubin dan rhope shwela, lo zhethon pe n sidyükesha nyu dan dushvula: tson-o a npvü kebin gwünzin so; lo anyugun le a dushvula titseo afü bin nyo!”

¹¹Npugü le, “Chwilo, tson-o Npugü mhundyü nyu kazüthun gü ge solo,” tsonshü. Tsontsin Npugü le tsüka ryüo tsangkenbu terhi nipe kazüthun dan lo tsonye dan whünkha whünra la-- ai Npugü le tsangkenbu nyu tsü hü mvu. Tsang nbu thüla, lo kazü nnu shü-- ai Npugü le kazü kennu nyu tsü hü mvu.

¹²Kazü kennu sika, mah le ryü-- ai Npugü le mah gü nyu hü mvu. Lo mah sika, thakhwe bwenye tse nyü nryü tse ryü.

¹³Lo Elijah le tsü nyülo ntsin, a-phi pe a-pe jelo njüo chwi gü tsokü gü khenpvü ka solo. Tsüselo hire, thakhwe nme le a-ka ryüo zo, “Elijah, nle hika nyuthyü bin nla?”

¹⁴Tsontsin a-le, “Ale danda dan Npugü Sunggigü genyu ayhen thyü sahü, ai Israel nyu temi dan le nzen-o kejozenkelo gü khela, n kershvubin dan borho pe shwela lo zhethon pe n sidyükesha nyu dan dushvu la; tson-o a npvü kebin gwünzin so; lo anyugun le a dushvu la titse a fü bin nyo,” tsonshü.

¹⁵Tsontsin Npugü le aka, “Ranio nle keryü tehen tson gü then-o Damaska nyu gunlo; lo nle nyida gü ti lolo, terzü pe Hazael yün pe no Siria so raja thyülo;

¹⁶lo nle terzü pe Nimshi nyugü Jehu yün pe no Israel nyu raja thyülo; lo nle ter pe Abel Meholah temi Shafat nyugü Elisha yün pe nsunka sidyükesha gü thyülo chi.

¹⁷Tson-o Hazael zhethon ka tinchwi kelo nyu le Jehu no dushvu ti, lo Jehu zhethon ka tinchwi kelo nyu le Elisha no dushvu ti.

¹⁸Tson yatse-e ale Israel nyu khosen tsügü Baal rüshvu kemvu, lo a-mün pe a-nbo kemvu temi yie tsenyü kenishü ti,” tson shü.

¹⁹Tson-o a-le tsünyu chwi gü Shafat nyugü Elisha le methutse tseryü kenyhun zen-o low yhen kebin hyulo, lo a-le tseryü kenyhun gü hü bin; tsüka Elijah le a-khoka ryüo a-phi yhün pe a-nben shü.

²⁰Tsüselo a-le methutse dan khela njüo Elijah hü gü a-ka, “Ano gü apvü ajvü nthon shü lao ryü nsithen tin lata,” tsonshü. Tsontsin Elijah le a-ka, “Gunlo, ale nkhin mvule,” tsonshü.

²¹Tsüselo a-le rani gü methutse dan dushvulo, tson-o methu gunda kekhe sen pe a-thyü ni pe temi dan no tyülo. Tson-o a-le Elijah sithen-o a-lo thyü tinla.