Read Southern Rengma Naga 1 RAJANYU 2 Bible Online

1 RAJANYU 2 - Southern Rengma Naga bible

1 RAJANYU 2

¹David le sila nrün kho nnila ntsin a-nyugü Solomon ka:

²“Ale sila nrün gwenkho le ryü laso. Tsügenyu nle nkobin lo, lo nle temi nme tse tsin shülo,

³lo Npugü n Sunggigü le nno nyuthyü lotse zoshüyo tsü thyülo. Mosa jvü nyu thu kenjü hontse a-tejvü lo a-johokeshü dan aphu zenlo, tsonlo yatselo nle lika hika güe lo lihi thyüe gwa loti.

⁴Nle a-jozen hü yatselo, Npugü le aka, nnyenyu dan le anyugun nyun aphu lo anyugun keyhun aphu sen-o a johokeshü dan zen kebin then n tsipwen no Israel nyu keda thyüti tsezo keshü gü le bin loti.

⁵“Tsü nyekie Zeruiah nyugü Joab le age nyuthyü shüyo nle shabin nyo, a-le Israel nyu rihü nyu sharhi mihvu Ner nyugü Abner lo Jether nyugü Amasa au dushvu la. A-le kengü kegwa gwenkho ka terika sikelanyu khün zo-o tsühvu dushvula. A-le kemu kendi temi dushvulao ano tsügenyu kenjün thyüsa njü nyo.

⁶Nle a-ge nyuthyü mvulo shvuyo shabin nyo; a-no bwenye tse me kesi jvüka si nya.

⁷“Ai Gilead temi Barzillai nyenyu dan sokehü tsinshü nye, anyugun nuchalo kechamvule ale ntsa Absalom genyu tinkela ka anyugun le a shwinjün shü kethyü genyu.

⁸“Lo Benjamin rünyi Bahurim ka Gera nyugü Shimei le ale Nahanaim ka kegü jon nyü shochün kerü pe asen tsü, ai a-le Jordan rinyu ateno titse keryü ka, ale Npugü zan nyu swen-o a-dushvula loho letse la.

⁹Ai nle a-shaja pe a-tsü mvula nya. Nle a-ge nyuthyü shümvulo shvuyo shabin nyo, lo a-dushvula mvulo shvu.”

¹⁰David le sila lo David rünyi nyida gü nyu sunla.

¹¹A-le chen henzi Israel nyu raja thyü, Hebron nyu chen tsenyü lo Jerusalem nyu chen shenryü kenshen.

¹²Lo Solomon le a-pvü David sunthyüo raja thyülo, lo araja thyü nkosa lo.

¹³Haggith nyugü Adonijah le Solomon jvü Bethsheba kiryü, lo tsügi le a-ka, “Kegwathyü ryübin n mon?” Tsontsin a-le “Ele.”

¹⁴“Ale nka thakon me hinyü bin nle,” Tsonshü ntsin tsügi le a-ka, “Nyu ola?”

¹⁵A-le zoshü, “Nle shabin nyo, ale raja thyü kethyüi, lo Israel nyu aphu tsü nribin. Ai tson mvula-o asikezen gü le raja thyülo la, kechamvule tsüle Npugü kenda kela genyu.

¹⁶Lo ntsoka ale nka thakon me hibin nle, pe atsümvu le tsela nyalo.”

¹⁷Bethsheba le a-ka, “Zoshü ta,” tsonshü. Tsontsin a-le, “Ale nka kehi gü pe raja Solomon ka zoshülo, ale shabin nyo a-le nka nmvule tse kemvui, tsü le Shunem nyu lünyu gi Abishag tsü pe ano anu thyü ta.”

¹⁸Tsontsin Bethsheba le, “Gwasa.” “Ale ngenyu raja güka zoshü ti.”

¹⁹Tson-o Bethsheba le raja güka Adonijah genyu a-nthon shüti tseo gü. Lo raja gü le solo-o nkhün tsügü a-jvü kelushü njio a-rajakhün ge dunlo lo raja gü jvü genyu khün nme senryü, tson-o tsügi le a-nzhüzin dun lo.

²⁰A-le, “Ale nka tha keshe nme hinyü bin nle, nmvule tsela nyalo.” Tsontsin raja güle a-ka, “Nyu ola ajvü nka nmvule tsela loho.”

²¹Tsontsin a-le, “Shunem nyu Abishag tsü pe ntsa Adonijah no anu thyü ta.”

²²Raja gü Solomon le a-jvü ka, “Nyuthyüo nle Adonijah genyu Shunem nyu Abishag hi hü nla?” “A-genyu rajakhün ai hi mvule, a-le atsa le, a-genyu da, lo püshükeda gü Abiathar lo Zeruiah nyugü Joab genyue hi mvule.”

²³Tson-o raja gü Solomon le Npugü zan nyu swen-o, “Adonijah le tha higü hikeshü a-jo gü genyu ale a-keyhun no a-min thyüla mvu yatselo Sunggigü no aduthü lalo!

²⁴Tsügenyu, ntsoka Npugü le rhün kehü hontse, a-le athyü ngon shü laso, a-le akhipe apvü David rajakhün ge dunshü, a-le ka nme thyü pe atsüshü, lo ale rhün kehü gü Npugü zan nyu swe bin nyo, Adonijah no nthu si ti!”

²⁵Tson-o raja gü Solomon le Jehoida nyugü Benaiah nishüo a-dushvula.

²⁶Raja gü Solomon le püshükeda gü Abiathar ka, “Anathoth nyu n low ki tsü lalo. Nle sila kü laso, ai ale ntsoka ndushvula kemvui, kechamvule nle apvü David zen kehü ka Npugü zen jopenron kelo khin gü pen kethyü genyu, lo a-le kenjünthyü keloka a-zen kenjünthyü kenjü genyu.”

²⁷Tson-o Solomon le Abiathar no Npugü püshükeda thyü mvula, tsüle Npugü le Shiloh nyu Eli lo a-tsipwen rüla zo kenjü thyü penlo nrün genyu.

²⁸Joab le nyuthyü layo tsü rüla nyülo. (A-le Adonijah sithen ai Absalom we keche mvu.) A-le tin-o Npugü kershvu phika günyu yügü kershvubin tse sü pen lola.

²⁹Tsontsin Joab le tin-o kershvu phika nyu kershvubin khoka kebin raja Solomon le shalo, Solomon le lonyu nme nipe Joab ki shüo Joab le nyu genyu tin-o kershvubin gü ki gü layo shün shü. Tsüka Joab le ale Solomon nshvuo tin Npugü kiryüla letse zoshü. Tsontsin Solomon le Jehoida nyugü Benaiah nishüo gü a-dushvula lo tseshü.

³⁰A-le Npugü kershvu phika nyu yügü Joab ka, “Raja gü le nno chwiryülo tse ahza khishü bin nle.” Tsontsin Joab le, “Nmvu, ale hika si lati,” tsonla. Benaiah le gü raja güka Joab jo pe zoshü.

³¹Tsüka Solomon le zo, “Ale kezo hontse a-dushvula lo pe sun lalo. Tson-o Joab le temi kemu kendinyu dushvu kela khvü gü no age metse lo David nyenyu nme ge-e bin sin loho.

³²Lo Joab le medushvu kenjü chün Npugü le shaja pe tsüti, a-le apvü David tesha mvutse tsü thyükela genyu. Joab le a-nyeki gwakvu kethyü kemu kendi mihvu dushvu la. Tsüle Ner nyugü Abner Israel rihü dan sharhi gü, lo Jether nyugü Amasa Juda rihü dan sharhi gü.

³³Tsügenyu au dushvu kela shaja tsüle kethonthen Joab lo a-tsipwen ge bin ti. Ai David, lo a-tsipwen, lo a-kakhwün, lo a-rajakhün so ge we Npugü kanyu nyun kebwe no kethonthen bin ti.”

³⁴Tson-o Jehoida nyugü Benaiah le Npugü kershvu phika gü nyu yügü Joab dushvu la, lo tehen nyu a-npvü a-kanyu sunla.

³⁵Lo raja gü le Benaiah no Joab sunka rihü dan sharhi gü thyüshü lo Zadok no Abiathar sunka püshükeda thyüshü.

³⁶Lo raja gü le me nipe Shimei kishüo a-ka, “Jerusalem nyu nka nme thyülo, tsünyu binlo, lo nyida gü nken tin nya.

³⁷Nle Kidron nkenchwi yatselo, nle si tsentsü ti, lo kemu khvü le n npvü nge ti.”

³⁸Tsontsin Shimei le, “Gwasa le, Kedagü, nle nyu zoshü yo, ngo gü le tsüthyü ti.” Tson-o a-le Jerusalem nyu bin thonsa tinla.

³⁹Chenshen siki, Shimei gonyu mihvu le tin-o Gath nyu raja Maakah nyugü Akish ki güla. Shimei le a-go hvu le Gath ki kebin jo shalo.

⁴⁰Tson-o Shimei le a-gada ketsenlo njio a-go hvu pfü ti tseo Gath nyu Akish ki gü, lo a-go hvu hyu lo-o zen ni a-ka ki gunryü la.

⁴¹Shimei le Gath ki güo nigun ryü kela rüla Solomon le shalo.

⁴²Raja gü le me nipe Shimei koshüo a-ka, “Ale nno Npugü zan nyu swen-o Jerusalem nken nyalo tse zoshü. Lo ale nle Jerusalem nken yatselo nle si tsentsü ti tse nka zoshü. Tsüle nkenda le nle a jozen tile tse nle zoshü mvu ole?

⁴³Tsonlo, nyuthyüo Npugü zan nyu n johokeshü borho lo ale nka zokeshü nyümvula?

⁴⁴Nle apvü David ge a-zükemvu thyü kenjü n npvü sha tsentsü bin nyo. Tsügenyu Npugü le shaja pe ntsüti.

⁴⁵Ai a-le jochü pe atsüti lo a-le David raja bin no kethonthen bin loti.”

⁴⁶Tson-o raja gü le ahza pe Jehoida nyugü Benaiah tsüshüo Shimei dushvula, lo Solomon le raja thyü nkosa lola.