Read Southern Rengma Naga 1 RAJANYU 20 Bible Online

1 RAJANYU 20 - Southern Rengma Naga bible

1 RAJANYU 20

¹Siria nyu raja gü Benhadad le a-rihü dan aphu ko kequen lo; lo raja shenryü kenyhun le keru lo kerugari dan sen-o a-zen hü; tson-o a-le nsin gü Samaria hunpfü lo-o tsü zen terithyü.

²Lo a-le lilo nyu nipe nyida gü nyu Israel nyu raja Ahab ka shü, “Benhadad le hihontse zohü nyo

³n suna raka le ahon; nnu nnyu dan tsü le ahon.”

⁴Tsontsin Israel nyu raja gü le a-jokenishü, “A npugü, O raja gü, nle kezo hontse, ae lo ale kebin dan aphu nhon le.”

⁵Lilo nyu dan le niryüo Benhadad le hihontse zohü nyo: “Ale me nishüo, nno n suna raka lo nnu nnyu dan, pe atsülo tse shü laso.

⁶Ntsoka we, tson-e ale senduki higwenkho ka agonyu dan nipe nki shüti, tson-o anyugun le nkanyu lo ngonyu dan kanyu tha fü ti, tson-o nyu le anyugun kenyü yo, tsü khilo lati, tsonla.”

⁷Tsüselo Israel raja gü le a-kazü nyu püshü nyu dan aphu ko shüo, anyugun ka, “Nrishü ta, temi higü hile dihontse kekevü fü bin yo; kechamvule a-le me nishüo, anu anyu dan, lo a suna raka hi laryü ale nmvu le tse mvu.”

⁸Tsüka püshü nyu dan lo temi dan aphu a-ka, “A-khwenyü nya nmvue elo tse zoshü nya.”

⁹Tsügenyu a-le Benhadad lilonyu ka, “A npugü raja gü ka zoshülo, nle n gogü ka zoshü keri dan aphu ale thyüshü ti; ai tha higü hi we ale thyülo nrün ndi le.” Lilonyu dan le tinla tson-o jo sen niryü.

¹⁰Tsontsin Benhadad le lilo nipe a-ka shüo, “Ale temi kechon zen ryüo n rünyi nyida gü nke lati lo a-nyugun ben nyu nke kela kanyü dan pfü tin lati. Keshanyu laka ale tsü thyü shü mvulo, tero gü no aboshvula lo!”

¹¹Tsüka Israel raja gü le a-jokenio, “Temi a-zhethon pe a-senphin pfü kehü gü no, zhethon shwü kela nyu hontse ketekho nyalo, tse zoshülo!”

¹²Benhadad le raja dan zen-o anyugun then nyu zu tsü kebin ka jolo higü nyülo, tsontsin a-le a-temi dan ka, “Hagun gwün ndalo.” Tsüselo anyugun le rünyi gü when titse gwün ndalo.

¹³Lo hire, sidyükesha nyu nme le Israel raja Ahab khoka ryüo, “Npugü le hihontse zohü nyo, ‘Nle temi danda hi aphu hyu mon? Hire, nthu ale tsü khipe nben nyu shü lati; lo nle ale Npugü tse kethyü sha loti.’ ”

¹⁴Tsontsin Ahab le, “Segü le mon?” Lo a-le, “Npugü le hihontse zohü nyo: lojvü nyu ahng dan hensin shüpahü selo nyu dan le ti.” Tsüselo a-le, “Segü no teri binzen shü mon?” A-le, “Nle,” tsonshü.

¹⁵Tsüselo a-le lojvü nyu ahng dan hensin selo dan swüshü laryü tsihvuo shenryü kenyhun swülo; lo tsüsika Israel nyu temi dan aphu swüshü laryü yie tsenyü swülo.

¹⁶Tson-o anyugun le Benhadad lo a-che kebin raja shenryü kenyhun dan le nhennyu then nyu zu tsü nzeü kebinka chwila.

¹⁷Lojvü nyu ahng dan temi shüpahü selo dan le richwi. Benhadad le nikeshü rishwe(scouts) nyu dan le a-ka, shüpahü dan nme le Samaria nyu chwiryü jü nle tsonshü.

¹⁸A-le anyugun ka, “Anyugun le teri genyu ryü zhüe lo gwaketho fü ryü zhüe anyugun kerhün tenlo.”

¹⁹Tson-o lojvü nyu ahng shüpahü selo ju le ri, lo Israel nyu rihü dan le tsü sithen-o whe chwi,

²⁰lo anyugun nmeme tse a-le zen kenren kebin gü dushvula, tson-o Israel nyu le Siria nyu hüla; ai Siria nyu raja gü Benhadad we keru nme ge keru temi dan zen-o tinla.

²¹Lo Israel raja gü le chwi gü keru lo kerugari dan ten lola, lo Siria nyu kechon dushvula.

²²Tsüselo, sidyükesha gü le Israel nyu raja gü khoka ryüo, a-ka zoshü, “Gun gü n npvü nthyü nkolo, lo nle nyuthyü tiyo kemvu kegwa thyülo, kechamvule tsenben ki Sirianyu raja gü le n when niti tse kebin genyu.”

²³Siria raja gü gonyu dan le aka, “Anyugun tero dan le rincho teronyu, tsügenyu anyugun le ngun nyeki kvu laso; ai ngun ketejon ki kenren tile, lo ngun le anyugun nyeki kvulo tsentsü.

²⁴Lo hihontselo, raja dan anyugun bin nyu anyu khikela la, lo anyugun bin ka teri temi keda nyu pe shüla.

²⁵Lo rihü nyu nle nmhen kela hontse kethyü, keru, kerugarie tsükho fülo, tsonlo njüo anyugun zen-o ketejon nyu kenren ti, lo ngun le anyugun nyeki kvulo tsentsü ti.” Tsontsin a-le anyugun khwenyüo tsühontse thyülo.

²⁶Tson-o tsenben ka Benhadad le Siria nyu ko kequen lo, lo Israel nyu zen kega titseo Aphek nyu nsin.

²⁷Lo Israel nyu dan ko kequen-o, nda nron lo-o chwi gü anyugun when; Israel nyu temi dan le tsüdan mhundyü nyu tenyü dan hontse kerho rho dan hvu thyülo, ai Siria nyu we lojvü kesü thyüla.

²⁸Tsüka sidyükeshanyu nme le ryüo Israel nyu raja gü ka, “Npugü le hihontse zohü nyo, Siria nyu le: ‘Npugü le rincho dan tero gü, ai a-le ketejon ki tero kemvu tson kezo genyu ale temi danda higü aphu khipe nben nyu shü lati, lo nle ale Npugü letse sha loti.’ ”

²⁹Tson-o anyugun le jon tsenyü khinyu nyu ketsun bin. Tsontseo jon tsenyü nyü terithyü so; lo Israel nyu le khenyüme jon Siria nyu pha tson kechü rihü nyu yie tsime dushvula.

³⁰Lo a-sen dan le tin-o Aphek nyida gü nyu gunla; tsüka chwida gü le chwi tsüryüo nsen kebin yie nkio tsenyü henla. Lo Benhadad le tin-o ka nmenyu kanyutsen ki yüla.

³¹Tsontsin a-gonyu dan le aka, “Hire, agun le nyü kelo le Israel nyu raja dan le me shwinjün sahü n ya le; tsügenyu ngun ronphi pe ngun senphin lo, lo ronpe ngun pe ge shülo, tson-o Israel nyu raja ki gü tile nu; a-le nkeyhun kenishüe sha loho.”

³²Tson-o anyugun le ronphi pe anyugun senphin lo, lo ronpe anyugun pe ge shülo njüo Israel nyu raja ki ryüo a-ka, “N gogü Benhadad le nka a-shwikenjün hio ano rhünlo ta tsonzo hü nle.” Tsontsin a-le, “Ntsokhin a-le rhün bin zun ole? A-le a sikezen gü le!”

³³Temi dan le a-le kegwa zoshü tile keshvu zoshü tiyo nri bin, tson-o a-jo nyülo nyemhun, “Ele, Benhadad le n sikezen gü le!” tsonshü. Tsüselo a-le, “Gü a-zen ryülo.” Benhadad le a-ki ryü zhü laryü a-le Benhadad no kerugari ge kü lo-o ryü.

³⁴Lo Benhadad le a-ka, “Apvü le npvü ben nyu khilo kela rünyi dan ale khini shü lati; lo apvü le Samaria nyu thyü keshü hontse nle n ge nyu Damaska nyu hakethyü bin thyülo lo.” Tsüka Ahab le, “Nnyi kejozen kelo hidan hi sen-o ale nno gun lati.” Tson-o a-le a-zen kejozen lo njüo a-no gunla.

³⁵Lo sidyükesha nyu nme le Npugü jo then-o a-pvü gü ka, avüshü lo ale nka hibin nyo. Tson ai temi tsügü le a-vümvu le tsela,

³⁶tsüselo a-le tsügüka, “Nle Npugü jo nyü mvukela genyu, nle a nken tin nyemhun shünyho nme no nten lati.” Lo a-le a-nken tin nyemhun shünyho nme le a-teno lo-o a-tenla.

³⁷Tsüsika a-le atemi kechanyu nme hyulo-o a-ka, “Avüshü lo, ale nka hi bin nyo!” Tsontsin temi tsügü le a-vüshü, tson-o a-jünla.

³⁸Tson-o sidyükesha gü le tinla, lo gü phi pe a-yhütyü jeo a-joja kecha thyü pfüo tson teka raja gü khwe bin.

³⁹Lo raja gü le nken tin zhü laryü, a-le chüo raja güka, “N gogü le terithyü kebin dan nyu gü laryü; hire, rihü nyu nme le temi nme zenryüo aka, ‘Temi higü ntsen tse; keshanyu laka a-hyu mvula yatselo, a-keyhun sunka nkeyhun loti, nmvue nno raka talent nme pe thoti,’ tsonshü.

⁴⁰Lo n gogü le lika hika ra tin kela ka, a-le tinla.” Israel nyu raja gü le a-ka, “Nle n npvü zokeshü tsü hontse ti, nle n npvü tsonti tse rhilo kela genyu.”

⁴¹Tsüselo a-le whütse a-yhütyü kephin khila; lo Israel raja gü le a-le sidyükesha nyu nme tse kethyü a-shalo.

⁴²Lo sidyükesha gü le a-ka, “Npugü le hihontse zo hü nyo, ‘Nle nben nyu a-le nkelalo tse keshü temi gü no tin kela genyu, tsügenyu nkeyhun no a-keyhun sunka gü ti, lo ntemi no a-temi sunka gü ti,’ ” tson shü.

⁴³Tsontsin Israel nyu raja gü le anyunta lo a-mhunzüntin tse a-ka ki ryüla.