Read Southern Rengma Naga 1 RAJANYU 21 Bible Online

1 RAJANYU 21 - Southern Rengma Naga bible

1 RAJANYU 21

¹Naboth Jezreel nyu gü vain low nme le Jezreel nyu, Samaria nyu raja gü Ahab ka khoka bin.

²Khenyüme Ahab le Naboth ka, “N vain low pe atsülo, ano tsü pe chwi nme thyülo, tsü le aka khoka genyu; lo ale tsü sunka vain low tsünyeki kegwa khishü tile, nmvue nkendo yatselo ale pisa tsügü min kho pe ntsü tile.”

³Ai Naboth le Ahab ka, “Apvü nbon le gwen gun keryü pe ntsü lalo Npugü mhundyü nyu njü mvu le!”

⁴Tson-o Ahab le Naboth Jezreel nyu gü le aka kezo jo genyu anyunta lo a-mhunzün-o a-ka ki gunla; kechamvule a-le, ale apvübon le gwen gun keryü pe ntsülo kemvui letse kezo genyu. Tson-o a-le zhütsü lo njüo, a-mhunpfü kerü pe sikhozin ntsun tinla, lo chvütyü mvula.

⁵Ai a-nu Jezebel le a-ki ryüo a-ka, “Nyuthyüo nshese ritsin-o chvütyü mvubin nla?” tsonketso shü.

⁶Lo a-le a-nu ka, “Kechamvule ale Jezreel nyu Naboth ka ano pisa pe n vain low hei lota; nmvue nkenda yatselo, ale tsü sunka vain low kecha nme khishü tile, tson laryü a-le, “Ale a vain low pe ntsü kemvui le.” tsonla le.

⁷Tsontsin a-nu Jezebel le a-ka, “Nle Israel nyu raja thyü bin mvu ole?” “Nnoge so-o, nnyu bweo nchvütyü lo, ale Jezreel nyu Naboth vain low gü khipe ntsü lati.”

⁸Tson-o a-le Ahab zan ka lesü thulo, lo a-mehor pe vüla, njüo lesü dan nipe Naboth zen-o a-rünyi nyu kebin pülü lo kedanyu dan tsüshü.

⁹Lo tsügi le lesü nyu thu keshü le, “Nyen ti tse kethyü pe tesha shü, lo Naboth no temi dan nyu ketetso ge dunlo,

¹⁰lo mija nyu mihvu kejü pe no a-kentsun ka dunlo, au no a-nmuo, “Nle shochün pe Sunggigü lo raja gü tsü laso. Tson-o a-süsen chwi gü tso pe a-jon shvu lalo.”

¹¹Tsüselo nyida gü nyu kebin temi pülü dan lo kedanyu dan le Jezebel le jo nipe anyugun ketsü hontse thyüla. a-le nipe anyugun tsü keshü gü nyu anyugun no thyülo tse keshü hontse.

¹²Anyugun le nyenti tse kethyü teshashü, lo Naboth pe temi dan nyu ketetso ge dunlo.

¹³Lo tsüka mija nyu mihvu no ryüo a-kentsun ka dunlo; lo mija nyumihvu tsü no temi dan nyu Naboth nmuo, Naboth le shochün pe Sunggigü lo raja gü tsü laso tson sola. Tson-o anyugun le a-süsen chwi gü chwida ngwe ki tso pe a-jon shvula.

¹⁴Tsüselo anyugun le me nipe Jezebel kishüo a-ka, “Tso pe Naboth jon shvula sele,” tson shü.

¹⁵Jezebel le tso pe Naboth jon shvu laso tse kethyü shalo ntsin, Ahab ka, “Solo, tson-o gü Naboth vain low a-le pe nka pisa hei mvukela gü lolo gwen che; kechamvule Naboth le yhun bin mvu, ai sila so.”

¹⁶Lo Ahab le Naboth le sikela rüla shalo ntsin, so-o gü Jezreel nyu Naboth vain low tsü lolo titse gü.

¹⁷Tsüka Npugü jo le Tishbe nyu Elijah ka ryüo a-ka,

¹⁸“Solo njüo nshe gü Samaria nyu kebin Israel nyu raja gü Ahab teno shülo; hire, a-le Naboth vain low gwen lo titseo gü tsü nyu hü nyo.

¹⁹Lo nle gü a-ka, Npugü, ale hihontse zohü nyo, ‘Temi gü boshvu kela siki, nle a-hon ko khilo ti tse bin le?’ A-ka zoshü lo ale hihontse zo hü nyo, ‘Tehi le Naboth zi lvü kethyü bin ka nzi lvü ti!’ ” tsonshü.

²⁰Ahab le Elijah ka, “Nle a hyulo la se ole, O, a shwikerüchün gü?” Elijah le a-jokenio, “Ele, ale nhyu loso.” “Kechamvule nle n npvü njwe pe Npugü mhundyü nyu nyu le gwamvu yo thyü titse tin laso.

²¹Tsügenyu Npugü le nka zo hü nyo, ‘Ale thagwa kemvu sen-o n ge ryüti; ale nsho pe shwe lati, Israel nyu dan nyu Ahab tsipwen peche nyu metse, do metse kemvu metse duthü lati;

²²lo ale nka thyü pe Nebat nyugü Jeroboam, lo Ahijah nyugü Baasha ka hontse lati, kechamvule nle anyun thyü nshvu pe nyunkenta thyü keshü genyu, lo Israel thyü pe no mu kela genyu.’

²³Lo Jezebel genyu ko Npugü le zo, tehi dan no Jezreel nyu kaminyu chwida nyuzin Jezebel thyü tyü ti.

²⁴Ahab nyu kaminyu ligü higü rünyi nyu sila lo tehi dan no tyü ti; lo ligü higü lojvü ki sila lo güda dan no tyü ti.”

²⁵(Temi nme-e Ahab hontse a-npvü a-jwe pe Npugü mhundyü nyu thagwa kemvu dan thyü tinkela mi ndi, tsü le a-nu Jezebel le a-thinthu keshü genyu.

²⁶Lo a-le kentsü kenche teromen rüshvu tinla, Npugü le Israel nyu temi dan mhundyü khipe shwe kela Amor nyu dan le thyü kehü hontse).

²⁷Lo Ahab le jo hidan nyülo ntsin. a-phi sürhen, lo ronphi pe a-ge shülo-o nyen, lo ronphi nyu yhon-o a-mhun züntin lo a-nyu gwamvu sa tse gunla.

²⁸Tsontsin Npugü jo le Tishbe nyu Elijah ka ryüo a-ka,

²⁹“Ahab le dihontse a mhundyü nyu a-thyü ketsenyu loyo nle hyu bin ado? A-le a mhundyü a-npvü a-thyü ketsenyu kelo genyu; ale a-keyhun ka thagwa kemvu sen ryü loho; ai a-nyugü gwenkho ka ale tha gwakemvu senryü a-kanyu shüti.”