Read Southern Rengma Naga 1 RAJANYU 22 Bible Online

1 RAJANYU 22 - Southern Rengma Naga bible

1 RAJANYU 22

¹Siria lo Israel au ja nyu chen shen terithyü mvulo.

²Ai chen shen chen Juda raja Jehoshaphat le Israel raja gü ki nsheryü.

³Lo Israel nyu raja gü le a-gonyu dan ka, “Ramoth Gilead le ngun hon, lo ngun le ntsema tseo Siria nyu raja gü ben nyu tsü gü lolo mvu kebin hagun le sha le nmvu la?”

⁴Tson-o a-le Jehoshaphat ka, “Nle azen gü Ramoth-Gilead ka terithyü tile nmvu la?” Tsontsin Jehoshaphat le Israel raja gü ka, “Ale n hontse, atemi le ntemi hontse, a keru le nkeru hontse le.”

⁵Lo Jehoshaphat le Israel raja gü ka, “Npugü jo gü ketso shwi teri lo,” tsonshü.

⁶Tsontsin raja gü le sidyükeshanyu ko kequen shü; tson-o anyugun ka, “Ano gü Ramoth-Gilead nyu terithyülo tse tile, gü nya lotse tila?” Tsontsin anyugun le, “Nsinlo; kechamvule Npugü le tsü khipe raja gü ben nyu shü lati.”

⁷Ai Jehoshaphat le zo, “Npugü sidyükesha ngun a-ketso lo kegwa temi kecha le hika ndi la sele?”

⁸Tsontsin Israel raja gü le Jehoshaphat ka, “Ngun le a-ka Npugü ketso lo kegwa temi nme le bin zun, Imlah nyugü Mikaiah; ai ale a-shwinyü mvu, kechamvule a-le a kegwa zoshwi hü mvu, ai thagwa kemvu nti zohü gwünzin.”p Tsontsin Jehoshaphat le, “Raja gü no tson zola nyalo.”

⁹Tsüselo Israel raja gü le kedanyu nme koshüo, a-ka, “Imlah nyugü Mikaiah zen whütse hika ryülo.”

¹⁰Tsüka Israel raja gü, lo Juda raja Jehoshaphat au le au rajakhün ge dun, au keda phinya sen, tson-o Samaria nyu keyü chwida khinrun ka bin kenrun nme ka hü, lo sidyükesha nyu dan aphu au mhundyü nyu sidyü jo zobin.

¹¹Lo Khenanah nyugü Zedekiah le tegi pe a-tse thyülo njüo, “Npugü le hihontse zohü nyo, ‘Hi sen-o hagun le Siria nyu rhunti, anyugun nke shüla kemvu then.’ ”

¹²Lo sidyükesha dan aphu sidyü jo zo-o, “Ramoth-Gilead nyu nsin gü, kvu lolo; Npugü le tsü khipe raja gü ben nyu shü lati”, tsonshü.

¹³Lo lilo Mikaiah ko kegü gü le a-ka, “Hire, sidyükesha dan le jo me thyüo raja gü kipon kegwa rüla zokü laso; n jo kono anyugun nme jo hontse, gwa nrün rüla zoshülo.”

¹⁴Ai Mikaiah le, “Npugü le rhün kehü hontse, Npugü le aka nyu zoshü yo ale tsü zo ti,” tsonla.

¹⁵Lo a-le raja gü kiryü, tsontsin raja gü le a-ka, “Mikaiah ngun Ramoth-gilead nyu gü terithyü lotse tile nnya lotse tila?” Tsontsin a-le, “Nsin lo lo gü kvulo lo; Npugü le tsü khipe raja gü ben nyu shü lati.”

¹⁶Ai raja gü le a-ka, “Ano gwün dikho nno thakecha zo nya ai Npugü zan nyu ketsin gü zoshülo tse nka zoti la?”

¹⁷Tsontsin a-le, “Israel nyu aphu tanyü a-kekhwen kendi hontse kazüthun dan ge nren nru tin kela hyu le. Lo Npugü le zo, “Temi hidan le anyugun sharhi mi ndi laso; anyugun no nyugun nyun bwen-o rani a-ka ki gun lalo.’ ”

¹⁸Tsüselo Israel raja gü le Jehoshaphat ka zo, “A-le a kegwa zokemvui ai gwakemvu zo kethyüi tse ale nka zomvu ole?”

¹⁹Lo Mikaiah le zo, “Tsügenyu Npugü jo gü nyülo lo: Ale Npugü le a-rajakhün ge dun kebin, lo tsangge danda dan aphu a-khoka a-njüzin lo ngwazin sokebin hyu.

²⁰Lo Npugü le zo, ‘Segü le Ahab sa shüo no nsin gü Ramoth-gilead ka chela mon?’ Tsontsin nme tha nme le zoshü, lo kechagü le kecha zo tson bin,

²¹kapu nme le chwiryüo Npugü mhundyü nyu solo, nzo zo-o, ‘Ale a-sa shüti,’ tson shü kemvu then.

²²Lo Npugü le a-ka, ‘dihontse tila?’ Kapu gü le, ‘Ale chwi gü a-sidyükesha dan aphu mün nyu kenku kapu thyü shüti.’ Npugü le zoshü, ‘Chwilo lo tson-o tsühontse thyülo, nle a-sa loti’ ”

²³Tsügenyu, “Hire, Npugü le kenku kapu khipe nsidyükesha hidan aphu mün nyu shü laso; Npugü le nrüla tha gwakemvu zohü nyo!”

²⁴Tsüselo Khenanah nyugü Zedekiah le a-kho nniryüo Mikaiah jon jü shüo a-ka, “Dihontse Npugü kapu gü le age chwio n nthon shüla?”

²⁵Tsontsin Mikaiah le, “Hire, nle n npvü nkebu lo titseo kanyutsen ki kebu keyü jon nyü sha loti.”

²⁶Israel raja gü le, “Mikaiah tenlo, tson-o a-zen gü nyida gü nyu ahng gü Amon lo raja nyugü Joash ki shülalo;

²⁷tson-o Raja gü le hihontse zoshü, temi higü hi khipe dokanyu shüla, lo ale gwa hüo gun ryü kemvuthen, tensü lo zü pe a-gin thyü tselo.”

²⁸Tsontsin Mikaiah le temi aphu nyü lolo, “Keshanyu laka nle gwa hüo raniryü yatselo, Npugü le age tha zoshü mvule.”

²⁹Tson-o Israel raja gü lo Jehoshaphat au le Ramoth-gilead ki nsin.

³⁰Lo Israel raja gü le Jehoshaphat ka zo, “Ale a npvü a joja thyü kecha thyülo njüo terinyu güti, ai n we n phinya tsü senlo.” Tson-o Israel raja gü le a-joja kecha thyü pvüo terinyu güla.

³¹Tsüka Siria nyu raja gü le a-kerugari so kedanyu shenryü kenyhun dan ka hokum shüo, “Israel nyu raja gü amalo, temi kechanyu nmvue kedanyue zen kega nyalo,” tsonshü la.

³²Lo kerugari so kedanyu dan le Jehoshaphat hyu shüo, tsügü tsü le Israel nyu raja gü tsentsü so tson so. Tson-o anyugun le a-when ryü; lo Jehoshaphat le nra sen shü.

³³Tsontsin kerugari sokeda nyu dan le tsü le Israel raja gü kemvu tse shalo ntsin, a-hü kebin rani tinla.

³⁴Ai temi nme le a-tho levü kvu pe me dan nyu shü, tson-o Israel raja gü teri kanyü le sunti kemvu jaka yügü a-shwen la; tsügenyu a-le a-kerugari kera gü ka, “Rani lo-o a-zen teribin nyu chwi lalo, kechamvule ale jün la sele!”

³⁵Lo tsü jon nyü teri thyü sala, lo raja gü le a-kerugari nyu bin-o Siria nyu ntsun bin tseo ngwün ki sila; lo tejün shvu nyu tezi le tsun pe gari gü thinki ntsun la.

³⁶Tson-o yhüko chegü kejü ki rihü nyu aphu ka nra sen-o, “Temi nme me tse a-rünyi, lo a-kazü ki gunla lo!” tsonla.

³⁷Tsühontse raja gü le sila, lo a-pvü gü Samaria nyu sunla.

³⁸Lo anyugun le Samaria nyu zübun gü ka kerugari sü, tson-o Npugü jo le kezo hontse, tehi le a-zi lvü, lo keyüla chün ketyü dan le tsü nyu anyugun sü.

³⁹Lo Ahab tha kecha dan, a-le thyü keshü aphu, chunhü pe ka thyü keshü; lo nyida thyü keshü tsüdan tsü Israel raja dan rüla kethu lesü nyu thu bin.

⁴⁰Tson-o Ahab le a-pvübon nyu hontse sila; lo a-nyugü Ahaziah le a-sunka raja thyülo.

⁴¹Asa nyugü Jehoshaphat le Ahab le Israel nyu raja thyükelo chenzi ka Juda so raja thyülo.

⁴²Jehoshaphat le a-keyhun chen shenryüo pvün ka raja thyüso, lo a-le chen nkipvün Jerusalem nyu raja thyü. A-jvü le Shilhi nyugi, a-zan le Azubah.

⁴³Lo a-le a-pvü Asa tson a-phunyu tsonchü; a-le tsünyu keja tin lamvu, Npugü mhundyü nyu nyu le a-zü yo tsüthyü; tson-e a-le kershvubin dan bo nshvu la mvula, tson-o temi dan no bin tsü ge kershvu thyü, lo tharün kegwa rope rüshvu hü zun.

⁴⁴Jehoshaphat le Israel raja gü ko zen gwatho la.

⁴⁵Jehoshaphat tha kecha dan, a-le pe hikeshü a-kekvu, lo a-le dihontse teri thyü yo, tsüdan tsü Juda raja dan rüla kethu lesü nyu thu bin mvu ole?

⁴⁶Lo Pechenyu le pechenyu zen-o serikemvu thyü kehü, a-pvü Asa gwünkho kanyu hü kela dan, a-le a-kazü gü nyu hü pe shwen la.

⁴⁷Tsügwünkho ka Edom nyu raja kendi genyu Jehoshaphat le temi nme nishüo no keda thyü.

⁴⁸Jehoshaphat le Ofir nyu gü suna pfülo titseo Tarshish run dan me thyülo; ai anyugun le gü mvula; Eziongeber nyu run dan le nren kela genyu.

⁴⁹Tsontsin Ahab nyugü Ahaziah le Jehoshaphat ka, “A gonyu dan no n gonyu dan zen-o run dan ge gülo ta,” tson so. Ai Jehoshaphat le a-kenda mvula.

⁵⁰Lo Jehoshaphat le a-pvübon nyu hontse sila, tson-o a-bon David rünyi nyida nyu sunla; lo a-nyugü Jehoram le a-sunka raja thyülo.

⁵¹Ahab nyugü Ahaziah le Samaria nyu Israel so raja thyülo, Jehoshaphat le Juda raja thyükelo chen tseryüo tsenyü ka, lo a-le Israel so chen hvu raja thyü.

⁵²A-le Npugü mhundyü nyu nyu le gwamvu yo tsüthyü, lo a-le a-pvü lo a-jvü tson nyu tsonchü, lo Nebat nyugü Jeroboam, Israel thyü pe mukela gü tson nyu tsonchü.

⁵³A-le Baal lothyü lo a-rüshvu, tson-o tson aphu nyu a-pvü tho hontse tin kela genyu, Npugü,Israel nyu Sunggigü nyun thyü nshvula.