Read Southern Rengma Naga 1 RAJANYU 3 Bible Online

1 RAJANYU 3 - Southern Rengma Naga bible

1 RAJANYU 3

¹Solomon le Ijipt nyu raja gü Faro zen kesolo, tson-o a-nyugi lolo. A-le tsügi zen gunryüo David nyida nyu yhun, a-ka, kershvuka, lo chwida khwen pe Jerusalem hun lo kemvuthen tson bin.

²Npugü kershvuka thyülo mvuzun, lo tsügenyu temi dan le bin kechacha kechonka Npugü kershvu thyü hü.

³Solomon le Npugü so, lo a-pvü David le a-senkethyü then hü, ai a-le kershvubin kechacha ka nyurhün dushvu pe kershvu thyü hü.

⁴Khenyüme raja gü le Gibeon nyu kershvuthyü titse gun, kechamvule tsüle kershvu bin da nme genyu. Solomon le himhundyü kershvubin tsüge rope kershvu gwen yie-e thyü laso.

⁵Gibeon nyu kheje ki Solomon minki Npugü le ryüo a-ka, “Ano nyu pe ntsünyü bin yo hilo lo.”

⁶Tsontsin Solomon le, “Nle ngogü apvü David, a-le joketsin zo, njü, lo a-nyun aphu sen-o nmhundyü nyu tsonchü kehü hontse nle a-sosa kehü tsinshü. Lo nle a-sozin kehü tsinshü kebin le nle a-nyu peche nme khipe tsüo no nthu a-sunka akeda thyü bin nyo.

⁷O, Npugü Sunggigü nle ano apvü sunka raja thyüshü, lo ale ntsenyu keshe zun, ale kechwikeyü jvü shamvu.

⁸Ngo gü le ntemi thyüti tseo kejükelo dan nyu hü, temi kechon swülo bukeho dan nyu.

⁹“Tsügenyu ngo gü no ntemi dan jün kera kethyü ka kegwa lo keshvu shakekha lo nrün genyu thakesha kerüchün nyun khi shülo, kemvu we ale dihontse ntemi hitsü lakhi ketsen lo tila?”

¹⁰Solomon le tha hikeshü Npugü le a-kenyüla.

¹¹Tson-o Npugü le a-ka, “Nle hi hikethyü, n npvü ngenyu yhun kethon, nmvue kenya, nmvue nkenrhi nyu kerhünron himvu, ai kentsen kenjün nyu keda thyü nrün genyu thakesha kerüchün hi kethyü genyu,

¹²hire, ale n jo hontse thyüshü laso. Ale thakesha kerüchün nyun khipe ntsü laso, tsügenyu nmhundyüe temi nme nhontse kethyü ndi, nmvue n sikie temi nme nhontse kethyü le yhun soryü loho.

¹³Lo ale nle hikemvu ai pe ntsü sin shü laso; kenya lo teshwe, tsügenyu nkeyhun then rajanyu dan nyu nhontse kethyü temi nme no bin loho.

¹⁴Lo nle a jo zen hü, ajvü dan thenlo, lo npvü David hontse a johokeshü dan then hü yatselo, ale yhunkethon pe ntsüti.”

¹⁵Solomon le chon soryü laryü, hire, tsüle a-min nme la. Tsüselo a-le Jerusalem nyu gun ryüo Npugü zen Jopenron kelo Khin mhundyü nyu solo njio rope kershvu dan thyüshü. lo kengükegwa kershvu dan thyüshü, tsüsika a-le a-gonyu dan aphu zen-o ho.

¹⁶Khenyüme tenunyu keyüla chüntyü kehü nyu mihvu le raja gü mhundyü ryüo solo.

¹⁷Tsontsin tenugi nme le, “A npugü, tenunyu higi hile ayi kengüo ka nme nyu bin hü lo a-le kebin ka ale pechenyu nme nnyulo.

¹⁸Lo ale nyuzen kelo jonshen nyü tenu higi ko nyuzenlo, tson-o ayi kengü bin; ka gü nyu ayi nti a-me tesin kecha ndi.

¹⁹Lo tenunyu higi nyu le kheje nyu sila, kechamvule, a-le tejü kela genyu.

²⁰Lo Khejenyu ngo gile zhütin kela ka a-le so-o anyugü pen gü a-zhüki shülo la lo a-nyu kesi pen ryüo azhüki shüla.

²¹Tson-o ale lonyü so-o anyu hontsü gü laryü, a-kesi hyulo. Ai ale lonyü shwi petsü gü ntsin, tsüle ale nnyu keshü anyu kemvula.”

²²Tsontsin, “Tenu kecha gile, nmvule rhün kebin güle anyu le, lo kesigü tsüle nnyu le! Lo higi le nmvu le kesigü le nnyu le lo rhün kebin gü le anyu le.” Tson-o raja gü mhundyü nyu au kenyi lola.

²³Tsüka raja gü le, “Nme lo rhünkebin gü le anyu lo nnyu gü le a-kesigü, lo kecha gü le nmvu, ai nnyu le a-kesi gü, lo anyugü le rhün kebin gü.”

²⁴Raja gü le, zhethon nme sen ryülo. Tson-o anyugun le zhethon nme sen-o raja gü mhundyü ka ryü.

²⁵Tsontsin raja güle, “Nyu kerhün gütsü kenjün pe kenyhun thyüo peha pe nme tsüla lo peha pe kechagi tsüla lo tsela.”

²⁶Tsonshü ntsin, rhün kebin nyugü a-jvü le a-nyu genyu a-nyun kenjün thyüla, tson-o raja güka, “A npugü nyu kerhün gü pe a-tsü lalo, a-dushvu la nyalo tson sola.” Ai kechagi le, “Tsü no ahon-e thyü nya lo nhon-e thyü nya ai kenjün lalo.”

²⁷Tsüka raja gü le, “Kerhün gü tsü pe a-tsüla lo, dushvu nyalo! A-le tsügü a-jvü laryü.”

²⁸Lo Israel nyu aphu raja gü le jokerapen keshü rüla tsü nyü külo; tson-o anyugun le raja gü nshvula, kechamvule anyugun le a-ge kenjü nyu mejün kera shülo kegwa Sunggigü thakesha le kebin hyulo kela genyu.