Read Southern Rengma Naga 1 RAJANYU 5 Bible Online

1 RAJANYU 5 - Southern Rengma Naga bible

1 RAJANYU 5

¹Tur nyu raja gü Haram le me nipe Solomon kashü, kechamvule a-kejü pe a-pvü sunka raja thyü bin kela rüla a-le shakelo genyu; Hiram le David so nyu nme.

²Solomon le logü ninipe Hiram kishüo:

³“Nle shabin nyo apvü David le Npugü, a-Sunggigü zan nyu ka nme thyülo mvula, kechamvule a-te mhun aphu nyu teri le bin la, lo Npugü le tsü khipe a-phasin thyülo kemvu zun genyu.

⁴Ai ntsoka we Npugü a-Sunggigü le lizin hizin kengü kegwa pe atsü laso, tson-o akenrhi ndi nmvue kenshvu ndi.

⁵Tsügenyu, hire, ale a Npugü a Sunggigü zan nyu ka nme thyü titse rhilo laso, Npugü le apvü David ka kezo le, ‘Nnyugü, ale pe nsunka nrajakhün ge shü nrün gü, a-le azan nyu ka nme thyü shüti.’

⁶Tsügenyu nle ntemi nishüo Lebenon nyu Sedar bin dan phen pe atsü shülo, atemi dan no ntemi dan zen-o thyüti, lo ntemi dan chün nle dikho zoyo ale pe tsüti. Kechamvule agun dan nyu Sidon nyu temi hontse sen phen keshanyu kendi nle shabin nyo.”

⁷Hiram le Solomon jo shalo ntsin a-sherhün-o, “Npugü shwe le, a-le nthu temi tsipwen keda tsügü genyu nyun thakesha nme khipe David tsü keshü genyu.”

⁸Tson-o Hiram le josin pe Solomon ka, “Nle josin keshü tsü ale shalo laso, lo nle aka hikeshü hontse Sedar lo Pine sen nle lonyü kebin tsü aphu ale thyüshü ti.

⁹A temi dan no Lebenon nyu sen nshyeryüo züda nyu shüti; lo ale züda nyu ryüo nle dika shü lotse tiyo tsü bin ka shüshü ti, tson-o khipe ntsüshü ti. Lo nle ketyüketsü khipe atemi dan tsüshü yatselo ale asherhün ti.”

¹⁰Tsühontse Hiram le Sedar bin lo Pine bin Solomon le sen mvulo keshvu aphu ndo shü.

¹¹Lo Solomon le Hiram temi dan genyu ketyüketsü khi keshü le,thokhin yie nki, lo terzü khin yie nki tse chen kechwi pe Hiram tsü.

¹²Tson-o Npugü le a-le zokenjü hontse, kensü pe Solomon tsü. Hiram lo Solomon au jaka kengü kegwa le bin lo, lo au khinyu nyu zen gwatho la.

¹³Raja gü Solomon le Israel nyu aphu ka thakethyü min koshü, lo temi dan le yie shenryü.

¹⁴Adoniram no thakethyü temi tsüdan kentsen gü thyü shü. A-le temi dan kenjün pe dan shen thyülo nme le yie tseryü, dan me no shye me Lebenon nyu binlo lo shye hvu kanyu binlo.

¹⁵Lo Solomon le tso keyhe temi yie hentetse lo tsü pfü nrün temi yie hentsenyü le kazüthun ki hü.

¹⁶Solomon temi kedanyu thatho so ge kebin nyu dan nti mvule, tsünyekie temi yie shen-o tsishen no tha thyü kebin nyu dan shwi.

¹⁷Raja gü le ahza khishüo anyugun le tsokeda, aminketsen lo keyhe tso pe kabin gü khwe titse sen ryü.

¹⁸Tson-o Solomon temi ka kethyü nyu dan lo Hiram temi ka kethyü nyu dan, lo tso keyhe nyu dan le, ka gü thyü titse tso lo tesen dan ketsen lo.