Read Southern Rengma Naga 1 RAJANYU 6 Bible Online

1 RAJANYU 6 - Southern Rengma Naga bible

1 RAJANYU 6

¹Israel nyu le Ijipt nyu chwiryü kelo chen tsizio hentetse lo Solomon le Israel nyu so gon kelo chenzi gü, Zif shye, tsü le shyehvu gü katsü Solomon le Npugü Kershvuka gü thyüso.

²Raja gü Solomon le Npugü genyu ka thyü keshü gü le kethon le tsu hentsero, keda le tsunki, lo ketetso le tsu shenryü.

³Kershvuka gü mhundyü chonrha le tsu nki, ka gü keda zenketun kü, lo a-kentsun le tsu tseryü.

⁴Keben no yüryü nrün kafüphe kesheshe thyüshü.

⁵Lo ka kehü nchün-o katsen thyü pe hun shü, Kershvuka tsen lo kenshün so kenshün tsen gü nyu a-le katsen thyü pe hun shü.

⁶Katsen tesin gü le tsu pvün, a-lvu gü le tsu tsero, lo teso gü le tsu tsenyü nmhun, kechamvule kabon ge kapha pe sen ni mvuo tsüge katsen gü rhun lo nrün genyu.

⁷Lo ka tsü gü kethyü ka, tso dan sen ryü kemvu ka ketsükela kela genyu, ka thyü kesoka kejon gi, nri nmvue tegi kanyu pe tha kethyü khwe nme nyümvu.

⁸Katsen tesin gü nyu keyü kakhin le tejüzin kipon bin, lo lubin rhun kebin ge katsen lvü gü ki kü, lo lvü gü nyu nsin-o heshen gü ki kü.

⁹Tson-o a-le ka gü thyü pen lo. Lo Sedar sen pe kapha lo kakela aphu je küla.

¹⁰Lo a-le katsen dan thyü pe kabon lizin hizin shüshü, ketetso le tsu pvün, lo tsüle Sedar kapha ge sen küshü.

¹¹Tsontsin Npugü jo le Solomon ka ryüo,

¹²“Nle thyü kebin ka higü hi, keshanyu laka nle a-jvü nyu tsonchülo, lo ale ahza khikeshü thyülo, lo ale johokeshü dan zenlo yatselo ale npvü David ka a johokeshü tsü thyüshü ti.

¹³Tson-o ale atemi Israel nyu dan nyu hü ti; lo atemi Israel nyu dan khela loho.”

¹⁴Tsü hontseo Kershvuka gü thyü pen lo.

¹⁵Kanyu zin kabon dan kazü nyu kü gü shün keti Sedar sen pe je kü la lo ka kela le pine sen pe la.

¹⁶Kanyutsen gü, Kenshüntsin bin gü tse ko kehü gü, Kershvuka thin tsinzin thyüshü. Tsügü kethon le tsu nki, Sedar sen pe sakethü lo kela ka gun gü shün keti thyü.

¹⁷Kenshüntsin bin gü mhundyü sakethü le kethon le tsu henzi.

¹⁸Lo Sedar sen ge nye le n ngan kebin lo pun kebin züshü, kanyuzin aphu Sedar sen pe je küla tson-o tso nme-e hyu mvu.

¹⁹Lo kanyutsen ki Kenshüntsin bin gü thyüshü, tsüka Npugü zen Jopenron kelo Khin gü pe shü nrün genyu.

²⁰Kenshüntsin tsen gü kethon tsu nki, keda tsu nki, ketetso tsu nki, tsü aphu suna pe je küla. Kershvubin gü le Sedar pe je küla.

²¹Tson-o Solomon le kanyuzin suna pe je la, lo Kenshüntsin bin nyu keyü hükethü le suna kerasü pe hüthü lo tsüko suna pe je küla.

²²Lo ka tsügü apentha suna pe je, ka je penlo kemvuthen lo Kenshüntsin bin gü nyu kershvubin apentha suna pe je.

²³Lo Kenshüntsin bin gü nyu a-le Oliv sen pe Cherubim kenyhun thyülo, nme me ketetso le tsu tseryü.

²⁴Lo Cherub sekin peha zin le tsu pvün lo kecha zin le tsu pvün, a-sekin nme raka gun gü kechazin ra keti le tsu tseryü.

²⁵Cherub kecha gü ko tsu tseryü, Cherubim kenyhun nren au keda le kenme lo au kethon le ketun.

²⁶Cherub nme ketetso le tsu tseryü, lo Cherub kecha gü ko tsü hontse.

²⁷A-le cherubim gü khipe ka kentsun tsin ki shü njü; cherubim sekin dan le sükhun bin tson-o a-sekin nme le kabon nme zin rhun, lo kecha gü sekin le kabon kecha zin rhun, lo au sekin le ka lvunyu kerhun pfü bin.

²⁸Lo a-le suna pe Cherubim hvu jela.

²⁹A-le ka gü kehü aphu ge Cherubim lo kvubin lo nyen le pun kebin zü pe kanyuzin lo ngwenzin shüshü.

³⁰Tson-o ka kela, kanyutsen lo kamhuntsen suna pe je shü.

³¹Lo Kenshüntsin bin gü nyu yü nrün genyu kakhin dan oliv sen pethyü; kenpere lo khenpvü kekho hvu ja le kabon gü jün pvün jün me.

³²Kakhin hvu le oliv sen pe thyü, lo tsüge Cherubim lo kvubin lo nyen le pun kebin züshü, tson-o suna pe tsü je shü.

³³Tsü hontse Kershvuka gü khenpvü kekho dan le oliv sen pe thyü, kabon jünzi jün me.

³⁴Lo kakhin kenyhun le pine sen pe thyü, kakhin nme le khinpon kenyhun lo kakhin kecha gü ko khinpon kenyhun.

³⁵Lo a-le tsüge Cherubim lo kvubin lo nyen kepun züshü, tson-o suna pe je shü.

³⁶Tson-o a-le kanyutsen gü keyhe tso pe tsonshen thyü lo Sedar kasen pe tson me thyüshü.

³⁷Solomon le raja thyü kelo chenzi gü Ziv shye ka Npugü kabin gü zen shü.

³⁸Lo chen tseryü nme gü, Bul shye, shye tetse ge, ka gü thyü titse nda kebin kon aphu thyü pen lola. Tsü hontseo a-le chen tsenyü tsü gü thyü.