Read Southern Rengma Naga 1 RAJANYU 7 Bible Online

1 RAJANYU 7 - Southern Rengma Naga bible

1 RAJANYU 7

¹Lo Solomon le chen tseryü kenshen a npvü a-ka thyü, tson-o a-ka tsü thyü penlo.

²A-le Lebenon chün nyu ka gü ko thyü, kethon le tsu tsi me, keda le tsu henpvün, ketetso le tsu shenryü,Sedar ka ketun tsonshen so ge kasin pe shüo thyü.

³Ka ketun tson meka tseryü pvün le kebin so ge kasin pe shüo Sedar sen pe tsü so la, lo kasin le henzi pvün.

⁴Lo tsünyu kafüphe le tson shen le bin, lo keben no tsonshen thyüo ben keteno.

⁵Kakhin lo kafüphe dan aphu a-kethon kegon le ketun kü, lo keben no tson shen thyü ben keteno.

⁶A-le kachon pe katsen me thyü, kethon le tsu henpvün lo keda le tsu shenryü, lo kasü le tsü mhundyü zin bin.

⁷Tsüsika a-le rajakhün no keshü katsen me thyülo, tsünyu mejün kera nrün genyu, lo peha zin gü kecha kipon keti Sedar sen pe la küla.

⁸Lo a-le kebin ka mejün kera nrün bin sizin kebin gü ko ka kecha gü hontse thyü. Lo Solomon le a-nu Faro nyugi genyu ko ka tsü hontse kethyü nme thyüshü.

⁹Tha hidan hi aphu tso min ketsen pe thyü; tso keyhe nda kelo hontse, kerhenzhe pe rhen lo, anyuzin lo asazin, a-bin kekhwen ka kügü katsen keti, tsühontse ka ngwenzin gü katsen keda gü keti.

¹⁰Lo a-bin kekhwen le tso min ketsen, tso keda, tsu tseryü lo tsu tetse pe thyü.

¹¹Lo tsü so ge tso min ketsen, nda-o yhe kethyü tso lo Sedar sen pe thyü.

¹²Lo keyhe tso pe tsonshen thyü; lo Sedar kasin pe tsonme thyü tse pe katsen kedagü, lo Npugü ka kanyutsen gü, lo kasü hun.

¹³Raja Solomon le me nishüo Tur ki Huram zen gun ryü.

¹⁴A-le Naftali tsipwen magi nyu nme nyu, lo a-pvü le Tur nyu lazo cha kehü nyu nme; a-le nsü lo koperhü sa kethyü nme lo lazo pe tha aphu thyüsha kethyü nme. A-le raja Solomon kiryü, tson-o a-tho aphu thyü küshü.

¹⁵Huram le lazo pe kachon kenyhun thyüshü, a-kethon le tsu tseryüo tetse; nme me a-kehun le tsu tseryü kenyhun.

¹⁶Kachon hvu pe sen nrün genyu lazo hin pe a-kesen kenyhun thyülo, nme kethon le tsu pvün pvün.

¹⁷Lo Kachon hvu pe kesen ge keri lo kehüsü kethyü chalo, nme me genyu tsenyü nyü thyülo.

¹⁸Tson-o a-le kachon hvu thyülo, lo kerikethyü tson hvu thyüpe kachon pe kesen gü hun shü, tsüge Kheratyü men ko züshü, lo kachon kesen kecha gü ko tsü hontse shü.

¹⁹Lo kachon pe kesen hvu ge tsü (lili) nye züshü, kethon tsu zizi.

²⁰Lo kachon pe kesen ge khüratyü ko züshü, tsüle kerikethyü ketun ge bin; lo khüratyü kezü le tsihvu le a-tson thyüo kachon pe kesen kecha Gü ge ko hunpfü bin.

²¹Lo Huram le Kershvuka nyu keyü tson nyu kachon pen soshü: a-le kachon njüzin gü pen soshü, tson-o tsügü zan tho pe Jakin tse koshü, lo kachon ngwazin gü pen soshüo tsügü zan thope Boaz thyülo.

²²Lo kachon dan ge lili nye züshü. Tsü hontseo kachon dan thyü penlo.

²³Lo a-le lazo pe zükhin nme thyülo, a-te peha zin gü kecha zin keti le tsu tseryü, ketetso le tsu pvün, lo a-kehun le tsu shenryü.

²⁴Lo zükhin te kehun ngwenzin tsunja, tsu me jaka tseryü ryü, züpe hunshü, tsunja tsonhvu thyü pe hun.

²⁵Tsü pe lazo pe kethyü methu tse tseryü kenyhun so ge dun, kenshen le tesozin ntsun, kenshen le nkhünzin ntsun kenshen le tesinzin ntsun, lo kenshen le nphozin ntsun bin; lo zükhin gü pe tsü dan so ge dun, tson-o anyugun min le a-hensin.

²⁶Lo tsü le a-kesü le nbenje kesü kho, lo a-te le honpen te hontse, lili nye le pun kebin hontse; tsü le temi yie hvu le lulo kegwa zükhin

²⁷Huram le lazo pe binkejwe tseryü chalo; kethon le tsu zi keda le tsu zi, lo ketetso le tsu shen.

²⁸Binkejwe dan tsüle cha pe hihontse: kethon keda ketun kü kethyü pe a-kekhenja nyu shü,

²⁹lo tsüge shünyho, methutse lo cherubim le bin; shünyho lo methutse zü kenjü te mhun nthyü nzen pe gwasa shü.

³⁰Binkejwe pezi tsü aphu ketolo kegwa lazo pe kethyü pha zizi lo lazo pe kethyü khun le bin, lo quenzi dan ka lazo pe kethyü kerhunsü pe tunkü.

³¹A-pe kesen ge kebin a-mün kepe gü sa le tsu me; a-mün kepe gü ko a-bin kethyü gü hontse tepen; tsu meo peha ntsun; lo kepe gü te kehun ge tha züshü, tsü le quenzi thyü, tepen mvu.

³²Lo tsüdan hensin ketolo kegwa pha pezi le bin; tson-o a-kekhen dan hüsü sen kebin a-jwi gü ge sen bin, lo ketolo kegwa pha tsü le nme ketetso le tsu meo peha.

³³Ketolokegwa dan thyü pe kerugari pha hontse: tsü hüsü sen kebin dan, a-te kehun, lo aphalu nyu kebin dan aphu lazo hin pe thyü kü.

³⁴Thakhin gü nmeme tse a-quen ka ketejen bin pezi le bin, ketezen bin tsüle a-khin gü zen kensü.

³⁵Thakhin gü soge a-te kehun le tsu peha kho ketetso lo hüsü sen kebin lo a-pon gü, thakhin tse aphu kesü nme thyü.

³⁶Tson-o hüsü sen kebin dan, lo a-pon dan ge a-le cherubim dan, shünyho dan, kvubin dan pe keda kesha kendyüo lizin hizin züshü.

³⁷Hihontseo a-le thakhin tseryü thyülo, lo aphu a-kethon keda ketun kü, a-joja a-kenme.

³⁸Tsüsika a-le lazo pe zükhun tseryü thyülo, zükhun nme me nyu temi henzi le lulo kegwa zü le shü kelo, zükhun nmeme kethon le tsu zizi, thakhin tseryü ge tsü zükhun nmeme pe shü.

³⁹A-le binkejwe dan pvün pe ka gü tesinzin shü, lo pvün pe tesozin shü, lo a-le zükhin gü pe ka gü tesinzin lo yhüko kechwi denzin a-quen nyu shü.

⁴⁰Huram le la, kekin khun, lo khun ko thyüshü. Tsühontse Huram le raja gü Solomon genyu Npugü ka gü nyu thatho aphu thyü penlo.

⁴¹Kachon kenyhun, lo kachon raki keshü kachon pe kesen kenyhun,lo kachon raki kachon pe kesen hvu keje tha zükeri pe keshü.

⁴²Lo zükeri kethyü hvu ge khüratyü tsizi, zükeri kethyü nme ge nyu khüratyü tson hvuhvu, tsü pe kachon hvu je nrün genyu.

⁴³Binkejwe tseryü dan, lo binkejwe ge kebin zükhun tseryü dan,

⁴⁴Zükhin nme, lo tsü hensin kebin methutse tseryü kenyhun;

⁴⁵tson-o la dan, kekin khun dan, lo khun, thakhin hidan hi aphu Huram le raja gü Solomon no Npugü ka günyu kesen, lazo kenshwe pe thyü.

⁴⁶Raja gü le tsüdan tsü pe Jordan se ketejon nyu, Sukot lo Zarethan hvu janyu gin nnyo so ge shü.

⁴⁷Solomon le thakhin dan kensu sü shwi mvu, kechamvule chonri kela genyu, nmvue lazo dan kensu shalo mvula.

⁴⁸Solomon le Npugü ka gü genyu thakhin kecha dan ko aphu thyülo: suna pe kethyü kershvubin gü, suna pe kethyü miz, tsüge me hikehü tensü pe shükehü gü,

⁴⁹suna nti pe kethyü mah kenben bin, tezhüzin pvün lo tegwazin pvün, Kenshüntsin bin gü mhundyü nyu, nye kepun dan, mahkhin dan lo suna pe kethyü ketsevü;

⁵⁰honpen dan, mahchukekinvü, khun dan, chen dan, mahkekinchen, suna pe kethyü tharünkegwa kero khun, lo suna pe kethyü kakhin rhü pe Kenshüntsin tsen ki keyü kakhin lo Kershvuka nyu kakhin dan rhü thyü.

⁵¹Raja gü Solomon le Npugü ka gü nyu thatho aphu thyü penlo. Tson-o Solomon le a-pvü David le thyü kenshün kela rakagi, suna, lo thakhin dan sen gun ryüo tsükhi pe Npugü kanyü tsen nyu shüla.