Read Southern Rengma Naga 1 RAJANYU 8 Bible Online

1 RAJANYU 8 - Southern Rengma Naga bible

1 RAJANYU 8

¹Tsüselo raja gü Solomon le Israel nyu sharhi dan, tsipwen pe thyü kebin dan, Israel nyu nyenyu pvü thyü kebin pelü dan, ko kequen pe Jerusalem nyu shülo, tsü le Zion letse kehü David nyida nyu Sunggigü zen Kejozenkelo Khinpha gü sen gun ryü nrün genyu.

²Israel nyu temi aphu nga ka, Ehanim shye tseryü gü ge gunryüo raja gü Solomon khoka kequen lo.

³Lo Israel nyu sharhi dan aphu ryülo, tson-o püshükengun dan le Kejozenkelo Khinpha gü

⁴pen-o Kershvuka ki ryülo. Kershvu phika gü, lo Kershvu phika günyu kebin kanyü kenshün dan aphu sen nsinryü, tsüdan tsü le püshükengun dan lo Levi nyu dan le sen nsinryü Kershvuka ki shülo.

⁵Rajagü Solomon lo Israel nyu süda a-zen kehun kelo nyu aphu, Kejozenkelo Khinpha gü mhundyü nyu bin, anyugun le tanyü lo methutse pe kerüshvu thyü, tsüle chonritsin-o zolo nrün ndi nmvue swülo bu hala.

⁶Lo püshükengun dan le Npugü Kejozenkelo Khinpha gü pen-o a-bin nyuryü, tson-o pe Kenshüntsin tsen gü nyu Cherubim hvu sekin hensin shüshü.

⁷Kechamvule Cherubim hvu le au sekin sükhun pe Kejozenkelo Khinpha gü lo kenshün bin gü sabin, tson-o Cherubim hvu sekin le Kejozenkelo Khinpha gü lo thün hvu henlo.

⁸Thün hvu le thonsa, tsügenyu Kenshüntsin bin gü mhundyü nyu kenshün bin gü nyu bin-o thün tsü hyu bin, lo tegwe ki we tsü hyu mvu; tsüle nthu keti tsü nyu bin nyo.

⁹Kejozenkelo Khinpha gü nyutsü, Israel nyu le Ijipt nyu chwiryü kelo ka, Npugü le anyugun zen-o Kejozenkelo tsopon kenyhun Mosa le Horeb nyu pe keshü nyeki tha kecha nme ndi.

¹⁰Püshükengun dan le kenshün bin gü nyu chwiryülo ntsin, khelukesü le Npugü ka gü süto tse lola.

¹¹Tson kela genyu püshükeda dan le khelukesü genyu so-o kera thyülo shvula; kechamvule Npugü zan kechwi le Npugü ka gü süto tselo kela genyu.

¹²Tsüselo Solomon lezo: “Npugü ale yhüko khipe tsangge shü; ai a-le kezün kentsun nyu bin titse la.

¹³Ale nno bin nrün genyu ka kegwa nme thyü pe ntsü laso, nno kethonthen hü nrün bin nme.”

¹⁴Israel nyu dan aphu so kebin ka, raja gü le raniryüo jochü pe anyugun tsü.

¹⁵Lo a-le, “Israel nyu Npugü Sunggigü no zan kechwi gü thyülo lo! A-le a-mün pe apvü David ka zoshü, lo a-ben lope tsü thyü pen shü, tsü ka kezo le,

¹⁶‘Ale Ijipt nyu atemi Israel nyu dan zenchwi ryü kelo jon nyü gerho, ale Israel nyu tsipwen aphu dan nyue azan no bin nrün genyu ka thyü titse rünyi nme kejü lomvu; tson ai ale David no a-temi Israel nyu so raja thyü titse kejülo.’ ”

¹⁷Lo Solomon le zosin-o, “Apvü David le ka nme thyü pe Israel nyu Npugü Sunggigü zan nyu shüti tse rüchün hü.

¹⁸Lo Npugü le apvü David kazo, ‘Nle nnyun ki ka nme thyü pe azan nyushü titse rüchün hü, nletsü hontse rüchün kehü tsüle gwasa,

¹⁹tson yatse-e nno kagü tsü thyü loho. Ai nge chwikeryü nnyugü, a-no ka gü thyü pe azan nyu shüti.’

²⁰“Lo Npugü le a-le zokeshü a-jo thyü pen shü laso, ale apvü David sun nyusoryü loso, lo Npugü le zope bin kenjü hontse ale Israel nyu rajakhün ge dun bin nyo, tson-o Israel nyu Npugü Sunggigü zan genyu ka nme thyülo laso.

²¹Lo ale tsünyu tsü Kejozenkelo Khinpha gü genyu bin nme pe bin njü nyo, tsünyutsü Npugü zen-o Kejozenkelo gü le bin nyo, tsü le a-le npepvü nyu dan zen-o thyülo, a-le Ijipt kazü nyu anyugun zenchwi ryü kelo ka.”

²²Solomon le Israel nyu temi dan le kehun kebin ka Npugü kershvubin gü mhundyü nyu so-o, a-ben shwen pe tsangge ntsun

²³lo-o hio,“Israel nyu Npugü Sunggigü, tsangteso ge-e nmvue a-hensin kazü nyue nhontse kethyü Sunggigü kecha nme-e ndi le! Nle ngonyu a-nyun aphu sen-o n jozen kehü nyu ge nle zope bin kenjü khela mvu lo shwinjün hü nyo.

²⁴Nle ngogü apvü David ka zope bin kenjü gü thyüshü, nle nmün-e pe zo, lo nben lope thyü pen shü laso, nthu hihontse lo laso.

²⁵Tsügenyu ntsoka, Israel nyu Npugü Sunggigü nle ngogü apvü David ka kezo hontse thyüshü lo, nle kezo le, ayhühyu ka Israel rajakhün ge temi nme bin mvu kela nge thyü loho; tson-o nnyenyu dan le anyugun tson nyu petsü loti, nle amhundyü nyu tsonchü kehü hontse anyugun ko amhundyü nyu tsonchü loti.

²⁶O, Israel nyu Sunggigü, ale nka hibin nle, n jo ngogü apvü David ka zokeshü hontse thyüshü lo.

²⁷“Ai Sunggigü le kazü nyu bin ketsin ti ole? Hire, tsanggü lo tsangdan ai nle bin nrün ngenyu sheri; tson yatselo ale thyükeshü ka higü hile ditsülaki nrün la?

²⁸Tson-e nle ngogü kehi lo a-le nka a-shwikenjün kehi dan nyüshü lo, O, a Npugü Sunggigü, n gogü le nthu nka hikebin a-kechü lo a-kehi nyü shüta.

²⁹Tson-o nyhüko pe kheje nyue lo nhenyue ka higü nri bin lo, nle azan no tsünyubin ti tse zokeshü bin gü nyu, tson-o n gogü le bin hinyu kehi kethyü nyü shülo.

³⁰N gogü le ntemi Israel nyu dan le, bin higü ntsun-o kehi kethyü nyüshü lo; tson-o nkebin bin tsangge bin-o nyüshülo; lo nyükelo ka, agun kemu jüshülo.

³¹“Keshanyu laka temi nme le a-kazon nyu ge kemu thyüla, tson-o keswe pe age shüo a-no swe, tson-o ka higü nyu nkershvubin mhundyü ryü yatselo,

³²Nle tsangge bin-o nyüshü lo, tson-o thyüshü, ngo hvu jün kera shülo; serikemvu gü nmu lalo, a-tho hontse pe a-pe ge shüla; lo kemitsin gü no njülo a-kemitsin hontse thyü pe a-tsü shülo.

³³“Ntemi Israel nyu dan le shwikerüchün nyu jonhala, kechamvule anyugun le nmhundyü nyu mukela genyu, tson-o rani nkiryü, nzan zoshwi lo ka hinyu kehi thyü lo nka shwikenjün hi yatselo,

³⁴nle tsangge nyüshülo, tson-o ntemi Israel nyukemu jüshü lo, tson-o anayugun zen niryüo nle pe anyu pepvü nyu ketsü kazü gü nyu shülo.

³⁵“Tsang khinla, tson-o tsangri shü mvula, kechamvule anyugun le nntsun kela genyu, keshanyu laka anyu le bin higü ntsun-o kehithyü, lo nzan zoshwi, lo anyugun kemu nyu raniryü, nle anyugun nthyü nnyü keshü ka,

³⁶lo nle tsangge nyüshülo, tson-o n gogü lo ntemi Israel nyu kemu jüshü lo, lo nle anyu no gun nrün tson kegwa gü tsin pe hishülo, lo tsangri pe nkazü gü ge shülo, anyugun no gwen lotse nle khipe anyugun tsüshü kela gü.

³⁷“Keshanyu laka kazü gü nyu chenda, kenpen, tsangkenbu, lole gwamvula, tsekhvü nmvue pungin le bin laya tselo; nmvue shwikerüchün nyu le anyugun rünyi hun lola, chonro, kehokenyü lihi le ryü lae;

³⁸temi ligü higüe, nmvue ntemi Israel nyu aphue kehithyü lo a-shwikenjün hi, temi nmeme tse kethyü anyun kenjün thyüo, ka higü ntsun-o a-ben shwe yatselo,

³⁹nle tsangge nkebin bin nyu nyüshülo, tson-o kemu jüshü, lo nme me tse a-tho hontse thyü pe tsüshü ta; anyugun nyun nle sha kebin genyu; (kechamvule, nle n nti temi nyun nyu nyu le bin yo shakebin genyu);

⁴⁰tsonlo yatselo anyugun le nle khipe agun pepvünyu ketsü kazü gü nyu yhun kebin then n nshvu hü loti.

⁴¹“Tsünyeki tesin, ntemi Israel nyu kemvu, ai nzan genyu kazü nithen ki keryü nyu genyu;

⁴²(kechamvule anyugun le nzan kechwi, lo nben kekvu, lo nbenshwe kebin nyülo); a-le ryüo ka higü nyu kehithyü lo;

⁴³nle tsangge nkebin bin nyu nyüshü lo, tson-o tesin gü le nka kehi dan thyü pe tsülo, tson-o kazü temi aphu no nza sha loti, lo n nshvu loti, ntemi Israel nyu dan hontse loti; tson-o anyugun no ale thyü keshü ka higü hile nzan nyu tse kethyü shalo nrün genyu.

⁴⁴“Keshanyu laka ntemi dan le shwikerüchün nyu zen-o terithyü gü, lika hikae nle anyugun nikeshü bin ki, nle kejükelo nyida gü, lo ale nzan nyu thyü keshü ka gü ntsun-o kehi thyü yatselo,

⁴⁵nle tsangge anyugun kehi lo anyu le shwikenjün kehi tsünyü shüta, tson-o anyugun nopen shülo.

⁴⁶“Keshanyu laka anyugun le nmhundyü ka mula, (kechamvule kemu thyü kemvu temi kendi genyu) lo nle anyugun ge nyuntala, tson-o anyu khipe shwikerüchün nyu ben nyu shüla, tson-o mele anyugun zen-o shwikerüchün nyu kazü ki dothyü gunla, nithen ki nmvue a-khokae;

⁴⁷tson-e anyugun le dothyü kebin rünyi ki tharüchün nilo, tson-o nyunkelu lo, dothyü kebin bin ka nka shwikenjün hio, agun le mu laso, thyüzü laso, serikemvu thothyü laso;

⁴⁸tsü hontseo a-shwikerüchün nyu, a-tenzen dothyü tinkela rünyi ki a-nyun, lo a-kerhün ronzin aphu sen-o rani nkiryü, nle khipe anyugun pepvünyu ketsü kazü, nle kejü kelo rünyi, lo ale nzan nyu ka thyü kelo gü ntsun-o nka kehithyü yatselo,

⁴⁹nle tsangge nkebin bin nyu anyugun kehi kethyü lo shwikenjün kehinyüshü ta, tson-o anyugun nopen shüta,

⁵⁰tson-o ntemi nmhundyü nyu mukela dan, lo anyugun thyükezü aphu jü pe anyugun tsülo, tson-o anyugun tenzen dothyü gun kela dan mhundyü shwikenjün khishü, tsüdan no anyugun shwinjün lo nrün genyu.

⁵¹Kechamvule anyugun le ntemi, lo nhon gwen nrün dan le, nle Ijipt nyu tegi mahmin nyu zenchwi keryü dan.

⁵²“Nyhütyü no ngo gü le shwikenjün kehi lo ntemi Israel nyu dan le shwikenjün kehi nribin nda, anyugun le nkeko aphu nyülo nrün genyu.

⁵³Kechamvule nle kazü temi aphu dan nyu anyugun khikho lo, anyugun no nhon gwen nrün genyu, nle ngogü Mosa ka kezo hontse, nle Ijipt nyu agun pepvü nyu zenchwiryü le, O Npu Sunggigü.”

⁵⁴Solomon le Npugü ka kehi kethyü lo a-shwikenjün kehi hi pen la-o, a-le kershvubin mhundyü nyu khosen-o aben shwen pe tsangzin shü kebin nyu soryü.

⁵⁵A-le solo, tson-o jochü pe Israel nyu kehun aphu tsüo nra tetso-o,

⁵⁶“Npugü no zankechwi gü thyülo lo, a-le zoshwikeshü hontse kerüye khipe a-temi Israel nyu tsüshü, a-le a-gogü Mosa ka zoshwikeshü thakegwa dan jo nme-e thyülo mvukela thyü mvu.

⁵⁷Npugü ngun Sunggigü no ngun zen hü kelo gü thyü lo, a-le npepvü nyu dan zen kehü hontse, a-no ngun dan nyu tinla nya, nmvue nkhela nya;

⁵⁸tson-o a-no ngun nyun sü pe a-denzin shüo, ngun no a-tson aphu nyu tsonchülo, a-johokeshü zenlo, a-jvü dan thenlo, tson-o a-le ahza khipe npepvünyu dan ketsü thyü zen lo nrün genyu.

⁵⁹Ale Npugü ka shwikenjün hikeshü a jo hidan hino, nhenyue lo khejenyue Npugü ngun Sunggigü khonni binlo letse nda, tson-o a-no a-gogü, lo a-temi Israel nyu dan, mvulo keshvu gwenkho aphu ka anyugun nopen shü nda.

⁶⁰Tson-o kazü temi aphu no Npugü le Sunggigü le , lo a-nyeki kecha nme ndi tse kethyü sha loti.

⁶¹Tsügenyu hagun nyun no Npugü ngun Sunggigü zen-o a-kezü nyu binlo, a-senkethyü jvü nyu tsonchülo, lo a-johokeshü dan thyüzen lo, nthu hi hontse.”

⁶²Lo raja gü lo Israel nyu aphu a-zen-o kershvu thyü pe Npugü mhundyü nyushü.

⁶³Tson-o Solomon le gwaketho kershvu thyü; tsügü tsü a-le pe Npugü tsü, methutse yie nki kenyhun, lo tanyü yie tsi meo nki. Tsü hontseo raja gü lo Israel nyu aphu Npugü ka gü thyükenshün lo.

⁶⁴Tsünyü raja gü le ka lvü gü Npugü ka mhundyü nyu kebin gü thyükenshün lo, kechamvule a-le tsünyu rope kershvu, ketyü pe kershvu, lo keshvu pe gwatho kershvu dan genyu sheri kela genyu.

⁶⁵Lo tsüka Solomon le keho nme thyü, lo Israel nyu aphu a-zen-o bin, temi kechon, Hamath nyu yü keryü ka gü Ijipt nyu züri keti; Npugü ngun Sunggigü mhundyü nyu jon tsenyü, then nyu kebin nga thyülo.

⁶⁶Jon tetse nyü a-le temi dan nila. Lo anyugun le jochü pe raja gü tsü, tson-o Npugü le a-gogü David lo a-temi Israel genyu thyükeshü thakegwa aphu genyu sherhün, lo kenyüsa-o aka kaki gun la.