Read Southern Rengma Naga 1 RAJANYU 9 Bible Online

1 RAJANYU 9 - Southern Rengma Naga bible

1 RAJANYU 9

¹Solomon le Npugü ka gü, lo raja ka gü, lo a-le thyünyü kebin a-kenyü dan aphu thyü penkelo siki,

²Npugü le gw"nhvu ge gü Solomon yhühyu thyü nishü, a-le Gibeon nyu a-yhühyu thyü keshü hontse.

³Npugü le a-ka,“Nle amhundyü nyu kehi lo n shwikenjün kehi ale nyülo laso. Azan kethonthen pe bin titse nle ka thyü kelo higü hi ale thyü kenshün shü laso; lo ayhütyü lo anyun le tsünyu binzin bin ti.

⁴Lo nle npvü David hontse amhundyü nyu tsonchü, lo ajvü lo a johokeshü dan zenlo,

⁵tsonlo yatselo ale Israel ge kethonthen n rajabin thyü shüti, tsügü tsüle Israel rajakhün ge dun nrün min ndi kela nge thyüshü loho.

⁶Ai nle asithen mvuo rani laya tselo, nle nmvue nnyenyue, ale pe nmhundyü nyukeshü a johokeshü dan, lo ajvü dan thyüzen mvula, tson-o tero kecha lothyü, lo tsüdan rüshvu tinla;

⁷tson yatselo ale khipe ketsü kazü gü nyu Israel no yhun mvu lati; lo ka higü hi, ale azan nyu thyünshün kelo gü, amhundyü nyu khipe shwe lati, lo Israel pe temi aphu mhundyü nyu me jobin lo me no shwi kenyü nme thyü lati.

⁸Lo nkesa kela, ka higü hi temi le hi nken kegun nyu aphu a-dun thyü lati.t son-o, ‘O khwi! O khwi! nyu genyu Npugü le kazü higü, lo ka higü ge hihontse thyü la seyo,’ tsonti.

⁹Tsontsin mele, ‘Kechamvule anyugun Npugü Sunggigü, Ijipt nyu anyugun pepvünyu zenchwi keryü gü khela, tson-o tero kecha zen lola, lo tsüdan rüshvu, lo tsüdan lothyü tinla; tsügenyu Npugü le thagwa kemvu hidan pe anyugun ge shü laso,’ ” tsonti.

¹⁰Chen nki pen gükezhü ki, Solomon le ka kenyhun nren thyü lola, Npugü ka gü, lo raja ka gü.

¹¹Tsüka Hiram Tur nyu raja gü le, Sedar sen, Pine sen, lo suna Solomon le lokenyü dan pe a-tsüshü, tsontsin raja gü Solomon le Galil lojvü nyu rünyi nki pe Hiram tsü.

¹²Hiram le Tur nyu chwiryü Solomon le pe a-ketsü rünyi dan nrishü; ai shwi pe a-kenyü lomvu la.

¹³Tson-o a-le, “A sikezen gü, nle khipe aketsü rünyi hidan hile dihontse kethyü dan me sela!” Tson-o a-le kazü tsüdan tsüpe Kabul letse ko kela nthue tson ko hü nyo.

¹⁴Lo Hiram le suna talen tsio nki nipe raja gü tsü.

¹⁵Lo raja gü Solomon le Npugü ka gü, a npvü a-ka, Millo, Jerusalem chwida, Hazor, Megiddo, lo Gezer thyü nrün genyu thakethyü temi kolo.

¹⁶(Faro Ijipt nyu raja gü le nsin gü Gezer lolo la, lo mah pe tsü gü rola, rünyi tsünyu kebin Kanan nyu dan dushvula, tson njio kenrun nyu tsü khipe a-nyugi, Solomon nu tsüla.

¹⁷Tson-o Solomon le Gezer thyü nilo.) Lo Beth Horon, tesin gü,

¹⁸lo Juda lojvü tehennyu Baalah lo Tamar,

¹⁹lo Solomon le a-kenya kequen kebin rünyi dan, kerugari le kebin rünyi dan, a-keru temi le kebin rünyi dan Jerusalem lo Lebenon nyu lo a-raja hensin kebin kazü aphu nyu a-le thyünyü kebin dan aphu thyülo.

²⁰Lo Israel nyu nyenyu kemvu temi kecha Amornyu, Hitnyu, Periznyu, Hivnyu lo Jebusnyu,

²¹Israel nyu nyenyu dan le nkelobu mvu kela kazü gü nyu yhun kebin tha kethyü temi dan, Solomon le do nthu ketie zen hü.

²²Ai Solomon le Israel nyu nyenyu dan we no dothyü mvu; anyugun no a-hensin nyu shüpahü nyu, Officer nyu, mekentsen nyu, tsi sokeda nyu, kerugari kentsen nyu, lo keru temi dan thyü.

²³Solomon hensin nyu officer nyu kentsen tsipvün-o henpvün, hidan hi no thatho thyü kebin dan ketsen.

²⁴Faro nyugi le David rünyi nyida nyu chwiryüo Solomon le a-genyu thyükelo ka gü nyu binlo; tson-o tsüki Millo thyüshü.

²⁵Solomon le a-le kershvubin thyü pe Npugü ketsü gü ge chen me ka gwünshen ge rope kershvu, lo gwaketho kershvu thyülo. A-le tharün kegwa rope Npugü mhundyü nyushü. Tson-o a-le ka gü thyü penlo.

²⁶Raja Solomon le Edom kazü nyu Kenhon Züda se, Eloth khoka, Eziongeber nyu teri run dan thyüshü.

²⁷Lo Hiram le a-go nyu dan züda rüla keshanyu, run temi nipe Solomon gonyu dan sin-o nishü.

²⁸Anyugun le Ofier nyu gü suna talent tsi zio nki khilo, tson-o tsü pfüo raja gü Solomon kiryü.