Read Southern Rengma Naga 2 RAJANYU 1 Bible Online

2 RAJANYU 1 - Southern Rengma Naga bible

2 RAJANYU 1

¹Ahab raja gü le sikela siki Moab nyu le Israel nyu ntsun sola.

²Lo Ahaziah le Samaria nyu a-ka he teso ki nto lao ho bin. Tsügenyu a-le lilonyu nishüo anyugun ka, ale keho higü hinyu pon lo tile mvuyo gü Ekron nyu tero gü Baalzebub ka ketso shülo tsonshü.

³Ai Npugü jolonyu nme le Tishbe nyu temi gü Elijah ka, solo njüo gü Samaria raja gü lilonyu dan teno shülo, tson-o anyugun ka, “Israel nyu dan nyu Sunggigü le hü kemvu genyu hagun le Ekron nyu tero gü Baalzebub ka shün titse gü jü nle?

⁴Tsügenyu raja güka zoshülo Npugü le zohü nyo, ‘Nle kü kela no gü getsü nno nitsen ryü loho; ai nle sila tsentsü ti!’ ” Npugü le zo keshü hontse Elijah le tsonshüo tinla,

⁵lo lilonyu dan le raja gü ki rani ryü ntsin, a-le anyugun ka, “Hagun le nyu genyu raniryü la ola?” tson ketsoshü.

⁶Lo anyugun le a-ka, “Temi nme le ryü agun teno-o agun ka, hagun nikeshü raja gü ki rani gun lalo tson-o a-ka, ‘Npugü le hihontse zohü nyo Israel nyu dan nyu Sunggigü le hü kemvu genyu nle me nipe Ekron nyu tero gü Baalzebub ka tha ketso gü jü nle? Tsügenyu nle kü kela no gü getsü nno nitsen ryü loho, ai nle sila tsentsü ti!’ ” tson shüle tse zoshü.

⁷Tsontsin a-le anyugun ka, “Hagun zen keteno-o tha hidan zokeshü gü le temi dihontse kethyü nyu nme la?” tson ketsoshü.

⁸Anyugun le a-ka, “A-le thyühüphi nme ben, lo thyügi senkekhin nme pe a-senphin pfü tsele,” tsonshü. Tsüka raja gü le, “Tsüle Tishbe nyu Elijah laso,” tson.

⁹Tsüselo raja gü le henpvün so kedanyu nme temi henpvün pe a-sin-o nishü. A-le gü laryü Elijah le rinchothun ge dun bin, tsontsin a-le, “O Sunggigü temi, raja gü le nno tsenryü lotse zobin nle,” tsonshü.

¹⁰Elijah le henpvün so keda gü ka, “Ale Sungggü temi nme yatselo mah no tsangge chetsü ryüo n lo n temi henpvün dan ro lalo.” Tsontsin mah le tsangge chetsü ryü a-lo henpvün dan rola.

¹¹Raja gü le henpvün so kedanyu nme a-temi henpvün sin-o ni nipe a-kishü. Tson-o tsügü le nsinryüo a-ka, “O Sunggigü temi, hile raja gü ahza le, ‘Whütse tsenryü lo!’ ” tsonshü.

¹²Ai Elijah le a-ka, “Ale Sunggigü temi nme yatselo mah no tsangge chetsü ryüo n lo n temi henpvün dan ro lalo.” Tsontsin Sunggigü mah le tsangge chetsü ryüo a-lo a-temi henpvün dan rola.

¹³Raja gü le henpvün so keda mishen gü a-temi henpvün pe a-sin-o ni nishü. Lo henpvün so keda mishen gü le nsin gü Elijah mhundyü nyu khosen lo njüo a-shwikenjün hio a-ka, “O Sunggigü temi, a keyhun lo ngonyu temi henpvün hidan keyhun hino nmhundyü nyu amin tsenshü nda tse nka hibin nle!

¹⁴Hire, tsangge mah le tsüryüo henpvün so keda kerihvu lo au temi henpvün ro laso; ai ntso ka we nmhundyü nyu a keyhun no nkela nya ta,” tsonshü.

¹⁵Tsüselo Npugü jolo gü le Elijah ka, “Nsheo a-zen gülo, a-shvu nya.” Tsontsin a-le nsheo a-zen raja gü ki gü,

¹⁶tson-o raja gü ka, “Npugü le hihontse zohü nyo, ‘Israel nyu dan nyu a-jo ketsolo kegwa Sunggigü le hü mvulao nle lilonyu nipe Ekron nyu tero gü Baalzebub ki tha ketso titse ole? Tsügenyu nle kü kela no getsü nno nitsen ryü loho, ai nle sila tsentsü ti!’ ” tsonshü.

¹⁷Elijah le Npugü jo zokeshü hontse Ahaziah le sila. Ahaziah le a-nyu peche nyu kendi genyu a-sikezen gü Joram le a-sunka raja thyü, Jehoshafat nyugü Jehoram le Juda raja thyü kelo chen hvu ka.

¹⁸Ahaziah tha kecha dan, a-le thyü keshü, tsüdan tsü Israel raja dan rüla kethu lesü nyu thu bin mvu ole?