Read Southern Rengma Naga 2 RAJANYU 10 Bible Online

2 RAJANYU 10 - Southern Rengma Naga bible

2 RAJANYU 10

¹Ahab nyu peche hentsenyü le Samaria nyubin. Tsügenyu Jehu le lesü thu pe Samaria nyida gü temi kedanyu dan, pelü dan lo Ahab nyu ntsen kehü dan tsüo,

²“Hagun npugü nyu dan le hagun zen bin nyo, lo kerugari, keru, chwida khwe pe hunkethyü nyida dan lo teri kanyü dan-e hagun ben nyu kebin genyu, lesü higü le ryüo hagun tilo nyemhun,

³hagun npugü nyudan nyu kegwatsin gü kejü pe no a-pvü rajakhün ge dun lo njüo, a-ntsen lo nrün genyu teri thyü lolo,” tsonshü.

⁴Ai anyugun le nshvu sala tson-o, “Hire, raja mihvu-e a-no lomvula yatselo ngun le dihontse a-mhundyü sunlo tila?”

⁵Tson-o rajabin kentsen gü lo nyida gü sokeda gü au le pelüdan lo Ahab nyu ntsen kehü dan zen-o me nipe Jehu ki shüo, “Agun le ngonyu le, lo nle agun no nyuthyü lo tseyo tsü aphu thyü tile. Agun le temi nme pe raja thyü kemvui le; nyu le nmhundyü ka gwa yo thyü lolo,” tsonshü.

⁶Tsontsin a-le gwenhvu ge lesü thu pe anyugun tsüo, “Keshanyulaka hagun le akipon lo ajo zen titse nda bin yatselo, senduki higwenkho ka hagun npugü nyu dan pe sen-o Jesreel ki aka ryülo,” tsonshü. Raja gü nyu peche hentsenyü le nyida günyu leyi sokeryü kedanyu dan zen bn.

⁷Lo Lesü gü le anyugun kiryü ntsin, anyugun le raja gü nyu hentsenyü tsü dushvu la tson-o tsüdan pe thü pe rokhu nyu shüo pen ryü Jezreel ki a-tsü shü.

⁸Lilo gü le ryüo a-ka, “Anyugun le raja gü nyudan pe senryü la sele,” tse zoshü laryü a-le, “Khipe khinrun nyu keyü tsonka thunhvu thyü bin-o lonyü tilo,” tsonshü.

⁹Tson-o lonyü gü a-le chwi gü khinrun ka solo njüo temi aphu ka, “Ale a npugü ntsun-o a-dushvu laso, tsüle hagun le kemvu, ai segü le hidan hi aphu dushvu la ola?

¹⁰Npugü le Ahab kaminyu rüla zokeshü nme-e thyü pen mvula loho tse kethyü sha lolo, kechamvule Npugü le a-gogü Elijah mün nyu zokeshü thyüshü laso.”

¹¹Tson-o Jehu le Jezreel nyu Ahab kami nsen kebin aphu, a-hensin kedanyu dan, a-pvünyu a-zen kengü kehü dan, a-püshükeda dan nme nsen mvutse dushvu bula.

¹²Jehu le Samaria ki gü titse chwiryüo, tson nenyu “Tanyü kekhwenyu Kensenbin” nyu kehü ka,

¹³a-le Juda raja Ahaziah shvunye nyu teno lo-o anyugun ka, “Hagun le dikipon nyula?” tsonshü. Tsontsin anyugun le, “Agun le Ahaziah shvunye nyu le, lo agun le raja lo raja nyenyu dan kerühvu ka anyugun shwi shü titse nshe jü nle,” tsonshü.

¹⁴Tsontsin Jehu le a-temi dan ka, “Anyugun kerhün tenlo lo!” Tson-o anyugun min henzi kenyhun zen gü tekhün kü khoka temi nme nsen shü mvutse dushvu la.

¹⁵Lo a-le tsü nken gü laryü Rechab nyu gü Jehonadab le a-teno titse ryü kejü hyulo; Jehu le a-kelushüo a-ka, “Nnyi nyun me thyü kebin hontse akipon nnyu ketsin thyü bin le nmvula?” Tsontsin Jehonadab le, “Tsü le,” tsonshü. Tsüka Jehu le, “Keshanyu laka tsü yatselo, nben keta shülo.” Tson-o a-le a-ben keta shü. Tsüselo Jehu le a-ben süso pe a-kerugari ge shülo la,

¹⁶lo a-ka, “Ryüo azen gü ale Npugü genyu anyurhün kehü shwishü lo.” Tson-o au a-kerugari ge kengü gun.

¹⁷Lo a-le Samaria nyu ryülo ntsin, Npugü jo le Elijah mün nyu kezo hontse Samaria nyu Ahab kaminyu dushvu nsen kebin dan aphu dushvula.

¹⁸Tsüselo Jehu le Samaria nyu temi aphu ko kequen shüo, anyugun ka, “Ahab le Baal lo keshanyu thyü, ai awe a-lo thyü sati.

¹⁹Tsügenyu Baal sidyükeshanyu a-kershvu nyu, lo a-püshükeda nyu aphu ko kequen pe aki shülo; ale kershvu keda thyü pe Baal tsüti tse bin nyo, tsügenyu temi nme no gwenzü lanya; ligü higü ryümvukela gü we no siti,” tsonshü. (Hile Jehu le Baal kershvu dan nkela nrün genyu tedo thyü keshü).

²⁰Lo Jehu le, “Baal genyu ketsenyü kehun nme thyüti tse ahza hoshü!” Tson-o anyugun le tsüpe tesha shü.

²¹Jehu jolo nipe Israel kazü aphu nyu shüo, Baal kershvu nyu nme-e ryükemvu ndi. Tson-o Baal kershvu ka nyu temi le a-te pehazin gun gü kecha zin keti süto tselo.

²²Lo a-le kershvu phi ntsen kehü gü ka, Baal kershvu nyu aphu genyu phi sen chwiryülo; tsonshü, lo a-le tsüdan genyu phi sen chwiryü.

²³Tsüselo Jehu le Rechab nyugü Jehonadab zen-o Baal kanyu yügü Baal kershvu dan ka, “Baal kershvu nyu nti a-me Npugü gonyu nme hika hagun dan nyu hü mvule nmvuyo fü shwilo.”

²⁴Tsonshüo a-le yügü kershvu lo rope kershvu dan thyüshü. Jehu le temi hentetse no kam kibin, tson-o tsüdan ka, “Ale pe hagun ben nyu keshü nyu nme no tinla yatselo segü ben nyu tinla yo tsügü le rhünbin kemvu!”

²⁵Jehu le rope kershvu thyüpen shü nyemhun rikhwenyu lo kedanyu dan ka, “Gü anyugun dushvu lalo; nme nti-e no tin nya.” Tsüselo anyugun le zhethon pe tsüdan aphu dushvula njüo a-min dan süshwi pe kamhun ki shü lao Baal kershvu kanyu tsen ki yüla,

²⁶Baal kanyu kebin thamen pen chwiryüo rola.

²⁷Tson-o anyugun le kershvubin lo kershvuka gü boren la, lo tsü pe nthu keti kevübin thyüla.

²⁸Hihontse Jehu le Israel dan nyu Baal bo kenmhenla.

²⁹Ai Jehu le Bethel lo Dan nyu suna pe methu thyü shüo Israel thyü pe mukela gü Nebat nyugü Jeroboam kemu nyu tsü ranilo mvula.

³⁰Tson-o Npugü le Jehu ka, “Nle amhundyü nyu kenzhü gü thyü shü, lo Ahab kaminyu ge anyun nyu kebin aphu thyü keshü genyu, n nyenyu phuzi keti no Israel rajakhün ge dun ti,” tsonshü.

³¹Ai Jehu le a-nyun aphu sen-o Israel Npugü Sunggigü jvü gü nyu tsonchü lomvu la; a-le Israel thyü pe mukela Jeroboam kemu gütsü nrhilo mvula.

³²Tsügwenkho kitsü Npugü le Israel nyu kazü thyü nrün la. Siria nyu raja gü Hazael le terhi nken-o Israel nyu low jvü keda nkhelo la.

³³Jordan nphozin gü tesinzin Arnon züri seka Aroer rünyi keti- tsüle Gilead lo Basha terh, Gad Reuben lo Manasseh le yhun kebin keti.

³⁴Jehu le thyü keshü thatho kecha dan, lo a-kekvu rüla aphu Israel raja dan rüla kethu kesü nyu thu bin mvu ola?

³⁵Tson-o Jehu le a-pvübon nyu hontse sila. Lo anyugun le Samaria nyu a-sunla. Tson-o anyugü Jehoahaz le a-sunka raja thyü.

³⁶Jehu le Samaria nyu Israel so raja kethyü gwenkho le chen nkio tetse.