Read Southern Rengma Naga 2 RAJANYU 11 Bible Online

2 RAJANYU 11 - Southern Rengma Naga bible

2 RAJANYU 11

¹Ahaziah a-jvü Athaliah le anyugü le sikela shalo ntsin, anyudan aphu dushvula.

²Ai raja Jehoram nyugi Jehosheba Ahaziah lügi le raja nyenyu dushvula titse kebin dan nyu Joash lo a-keleyi gü au zen gü zhütsen ki Athaliah kebula, tson-o a-dushvu mvulo.

³Lo Athaliah le kazü günyu raja thyü kebin ka a-le chen tsero a-keleyi gi zen kershvu kanyu kebu hü.

⁴Ai Chen tsenyü ka Püshükeda gü Jehoida le raja khwe kehü tsiso kedanyu, lo rajabin rikhun kehü dan tse no Npugü kanyu ryülo tse koshü; tson-o a-le anyugun zen kejozen, lo Npugü kanyu anyugun no swen-o raja gü nyu pe anyugun hishü.

⁵A-le ahza pe anyugun tsüo, “Hagun le higü hi thyüti; Hagun le Sabbath nyü kam nyu keryü ka, jünshen jünme le rajabin gü rikhun lo;

⁶lo jünshen jünme le Sur khinrun ka so-o rikhun lo lo kecha jünshen jünme gü no rikhun dan sika so-o rikhunlo.

⁷Sabbath nyü a-kam pen kela dan hvu tsü no kershvuka gü rikhun lo.

⁸N meme tse a-ben nyu terikanyü sen-o raja gü hunpfü lo; lo ligü higü hagun khonni keryü gü dushvu lalo. Raja gü le chwi-e yüe a-zen binlo.”

⁹Tsiso kedanyu dan le Püshükeda gü Jehoida le anyugun ka zokeshü hontse aphu thyülo, tson-o nmeme tse a-temi Sabbath nyü kam pen kela nyu lo kam thyü titse keryü nyu zen-o püshükeda gü Jehoida karyü.

¹⁰Tsüselo püshükeda gü le raja David hon, Kershvuka nyu kebin, min lo gi khipe tsiso keda dan tsü shü,

¹¹lo rikhun nyu nmeme tse terikanyü sen-o ka gü hunpfüo sobin.

¹²Tson-o a-le raja nyu gü zen chwiryüo, raja perün pe n pfü shü, lo jün kezo lesü gü pe a-tsüshü, tson-o terzü pe yün shüo a-le, raja le tse zoshwishü, lo anyugun le ben kekhüo, “Raja gü no yhun kethon gü thyü lolo,” tsonshü.

¹³Athaliah le rikhun nyu lo temi dan khwen nyülo njüo a-le kershvu kanyu temi dan kiryü.

¹⁴Tsüka then kehü jvü hontse raja gü le kachon khoka sobin, lo tsiso kedanyu lo shu kekhun nyu dan le raja gü khoka hü, tson-o temi aphu shekerhün thyü lo shukhun kebin hyulo. Tsüselo Athaliah le a-phi sürhen la njüo chüo,” “Ketetsin! Ketetsin!” tsonshü.

¹⁵Tsontsin püshükeda gü Jehoida le rihü keda thyü kebin dan ka, “A-zen rikhun dan janyu kam ki chwiryü lalo, lo ligü higü a-sithen kethyü gü dushvu lalo.” Kechagenyumvule püshükeda gü le, “Npugü ka gü nyu a-dushvu nyalo,” tsonzo keshü genyu.

¹⁶Tson-o anyugun le a-ten zen-o rajabin ki gü Keru Khinrun ka a-dushvu la.

¹⁷Jehoida le Npugü, raja gü lo temi dan jaka anyugun le Npugü temi thyüti tse kejozenkelo nme thyüshü, lo raja gü lo temi dan jaka ko kejozenkelo nme thyüshü.

¹⁸Tson-o tsünyu temi aphu Baal kershvu ka ki gü a-kershvubin, lo a-menkezü dan borenla, tson-o kershvubin mhundyü nyu Baal kershvu püshükeda gü Mattan dushvula. Lo Püshükeda gü Jehoida le Npugü ka khwen nrün rikhun pe shüla,

¹⁹tson-o a-le tsiso kedanyu, raja khwen kehü nyu, raja ka rikhun nyu lo lojvü tsünyu temi aphu zen-o Npugü ka gü nyu raja gü zen-o rikhun nyu khinrun nyu tsonchü nsheryü raja kanyu shülo. Lo a-le rajakhün gü ge dunlo.

²⁰Temi aphu a-sherhünla; lo zhethon pe raja kanyu Athaliah dushvu kela siki nyida gü le ma tsela.

²¹Joash le a-keyhun chen tsenyü ka raja thyüso.