Read Southern Rengma Naga 2 RAJANYU 12 Bible Online

2 RAJANYU 12 - Southern Rengma Naga bible

2 RAJANYU 12

¹Jehu le raja thyükelo chen tsenyü ka Joash le raja thyülo, lo a-le Jerusalem nyu chen henzi raja thyü. A-jvü zan le Zibiah Beersheba nyu temi.

²Püshükeda gü Jehoida le a-senthyü keshü hontse Joash le a-rhünthen Npugü mhundyü nyu nyu le a-zü yo tsü thyü.

³Tson-o tero kershvubin da dan tsü boren lamvuo temi le tsünyu kershvu thyü lo tharün kegwa ro hü zun.

⁴Joash le Püshükeda dan ka, “Npugü kanyu sen keryü pisa thyü kenshün kela aphu, a-zintse kershvu genyu shü kehü pisa temi nme me ka hyu keloe, lo temi nme le anyu ki a-thukeyhun-o sen Npugü kaki keryü pisa metse,

⁵püshükeda dan no a-keshanyu ka tsü khilo, tson-o ka gwamvu kela thyüshü mvulo keshvu hyulo lo thyü ketsü shülo,” tsonshü.

⁶Ai Joash le raja thyükelo chen nki kenshen ketie püshükeda dan le ka gü le gwamvu kela thyü ketsinni mvula.

⁷Tsügenyu raja Joash le püshükeda gü Jehoida lo püshükeda kecha dan koshüo anyugunka, “Nyuthyüo hagun le ka gü ketsülo mvula? Ntsoka gerho hagun le keshanyu ka pisa khilo lanya tse, ai tsü khikela pe ka gü ketsükela lomvu loshvu,”tsonshü.

⁸Tson-o püshükeda dan le temi dan ka pisa losin loho, lo ka gü ketsükela mvu lati tse penlo.

⁹Tsüselo püshükeda gü Jehoida le rakakhin nme thyülo njüo a-kerün ge a-kü yhenphe lao khipe Npugü kershvuka nyu keyü njüzin kershvubin teka shüshü, tson-o püshükeda khenpvü ka kebin gü le Npugü kanyu sen keryü pisa aphu khipe tsünyu shüla la tsehü.

¹⁰Lo anyugun le rakakhin günyu pisa kechon le bin kela hyulo lo raja hensin nyu kethu gü lo püshükengun gü au le gü Npugü kanyu raka hyukelo dan swü pe pisakhin ka shü lala tse hü.

¹¹Tson-o anyugun le pisa gü kensu süshwi lao pe Npugü kanyu thatho thyü kebin dan keshwi gü ben nyu shüla; tson-o anyugun le tsü khipe Npugü ka gü thyü kebin mistrinyu, ka kethyü nyu,

¹²tso ketsükela kehü nyu, tso keyhe nyu lo ka gwamvukela ketsükela ni kethyü ka sen mvulo keshvu tesen lo keyhen tso hei lo tsü nyeki-e thyü hü.

¹³Ai Npugü kanyu sen keryü pisa tsü pe Npugü ka gü nyu kesen kanyü, rakagi pe kethyü khun, mahchu-ketsevü, honpen, lo shu nme thyümvu lo suna gi nmvue rakagi pe thakhin lihi-e thyümvu.

¹⁴kechamvule tsüle khipe Npugü ka gü gwamvukela ketsükela ni kebin nyu tsü kela genyu.

¹⁵Lo anyugun le thatho thyü kebin dan shün thyülo tseo pisa pe thatho keshwi nyu dan ben nyu shükela tsü dihontse layo ketso nimvu, kechamvule anyugun le joketsin nyu thathyü kela genyu.

¹⁶Thyüzü kela lo kemu genyu thaho keshü sen-o Npugü kanyu sen ryü mvu; tsüle püshükeda nyu dan hon.

¹⁷Tsügwenkho ka Siria raja Hazael le nsin gü Gath zen kegao tsü lo lola. Ai a-le nsin gü Jerusalem whe titse kebin ka,

¹⁸Juda raja Joash le a-pvübon nyu Juda raja Jehoshafat, Jehoram, Ahaziah nyugun le thyünshün kela, lo a npvü a-jün, lo Npugü kanyu lo raja kanyu hyukelo suna aphu nipe Siria raja Hazael tsüshü. Tsontsin Hazael le Jerusalem nyu tinla.

¹⁹Joash tho kecha dan lo a-le thyükeshü dan aphu Juda raja dan rüla kethu lesü nyu thu bin mvu ole?

²⁰A-gonyu dan le a-ntsun soryüla, tson-o Silla ki kenshe tson nyu Millo ka gü nyu Joash dushvula.

²¹Tsüle a-go Shimeath nyugü Jozacar lo Shomer nyugü Jehozabad au le a-dushvu la. Tson-o David nyida nyu a-pvübon nyu sin a-sunla; lo anyugü Amaziah le a-sunka raja thyülo.