Read Southern Rengma Naga 2 RAJANYU 14 Bible Online

2 RAJANYU 14 - Southern Rengma Naga bible

2 RAJANYU 14

¹Jehoahaz nyugü Jehoash le Israel raja thyükelo chen hvu ka Joash nyugü Amaziah le Juda raja thyülo,

²a-le a-keyhun chen nkipvün ka raja thyü so, lo a-le chen nkio tekü Jerusalem nyu raja thyü. A-jvü le Jerusalem nyu a-zan le Jehoaddin.

³A-le Npugü mhundyü nyu nyu le a-züyo tsüthyü, tson-e a-bon David hontse lomvu; tha phu ka a-le a-pvü hontse thyü.

⁴Ai tero kershvubin da dan bo nshvula mvu, tson-o temi le tsünyu kershvu thyü lo tharün kegwa ro hüzun.

⁵Kekvu le a-ben nyu ryülo ntsin a-le a-gonyu a-pvü dushvu kela dan dushvu la.

⁶Ai Npugü le johoshüo, Mosa tejvü lesü nyu thu kenjü hontse; a-le me dukeshvunyu nyenyu dan tsü dushvu lamvu, kechamvule tsünyu thu kenjü le, “A-nyenyu genyu a-pvü no silo nrün ndi, nmvue a-pvü genyu a-nyenyu no silo nrün ndi; ai temi nme me tse a-npvü a-kemu genyu siti,” tson thu kenjü genyu.

⁷A-le Tsip Kazü ketejon nyu teri thyüo Edom nyu yie tseryü dushvu lao Sela nyida gü lolo la, lo tsü pe Jok-theel tse kola, nthu keti tson kohü zun.

⁸Tson-o Amaziah le lilo nipe Israel raja Jehu nyu, Jehoahaz nyugü Jehoash tsüo, “Nnyi kenrishü tile, ryülo,” tsonshü.

⁹Tsontsin Israel raja Jehoash le jo nipe Juda raja Amaziah tsüo, “Lebenon ge Hetho le me nishüo Sedar bin nme ka, ‘N nyugi pe anyugü ka kalu shüta,’ tson; laryü tehen thyü nme le pfüthü güo Hetho gü kedüla.

¹⁰Nle Edom nye kvulo kela genyu, ketekho bin nyo. Nzan kechwi tsü sen-o rünyu-o kanyu binlo; nyuthyü kevü hüsü shüo nle lo ntemi Juda no chela tila?” tsonshü.

¹¹Ai Amaziah le nyü mvula. Tsügenyu Israel raja Jehoash le nsin, tson-o Juda nyu kebin Beth-shemesh ka au terithyü.

¹²Lo Israel le Juda nye kvula, tson-o Amaziah rihü dan le nme me tse tin-o a-ka ki gunla.

¹³Lo Israel raja Jehoash le Beth-shemesh ka Juda raja Joash nyu Ahaziah nyugü Amaziah ten lola. Tson njüo Jerusalem nyu ryüo Jerusalem chwida Efraim khinrun ka gü khinrun a-te gü keti tsu tsizi boren la.

¹⁴Lo a-le Npugü kanyu lo raja gü kanyu kequen kebin kanyü suna, rakagi lo thakhin hyukelo dan aphu, tsünyeki do tenzen-o Samaria ki gunla.

¹⁵Jehoash tha kecha a-le thyükeshü, a-kekvu lo a-le dihontse Juda raja Amaziah zen teri thyü yo, tsü dan Israel raja dan rüla kethu lesü nyu thu bin mvu ole?

¹⁶Jehoash le a-pvübon nyu hontse sila, tson-o Samaria nyu Israel raja dan sin-o a-sunla; lo anyugü Jeroboam II gü le a-sunka raja thyülo.

¹⁷Juda raja Joash nyugü Amaziah le Israel raja Jehoash, Jehoahaz nyugü kesi siki chen tseryüo pvün yhun.

¹⁸Amaziah tha kecha dan, tsüdan tsü Juda raja dan rüla kethu lesü nyu thu bin mvu ole?

¹⁹Anyugun le Jerusalem nyu a-ntsun sola, tson-o a-le tin-o Lakish ki güla. Ai anyugun le me nipe a-sithen shüo Lakish nyu a-dushvula.

²⁰Tson-o keru ge a-pfü ryüo David nyida Jerusalem nyu a-pvübon nyu sin-o sunla.

²¹Tson-o Juda temi dan aphu Azariah le a-keyhun chen tseryüo tsero ka a-pe a-pvü Amaziiah sunka raja thyülo.

²²Apvü kesi siki a-le Elath thyülo njüo tsü pe Juda hon thyü nilo.

²³Juda raja Joash nyugü Amaziah le raja thyükelo chen tseryü pvün ka Israel raja Jehoash nyugü Jeroboam II le Samaria nyu raja thyüso, lo a-le chen henzi nme raja thyü.

²⁴A-le Npugü mhundyü nyu nyule gwamvu yo tsüthyü; Nebat nyugü Jeroboam Israel thyü pe no mukela gü kemu dan aphu nrhi lomvu.

²⁵A-le Israel nyu Npugü Sunggigü le Gath-hefer nyu a-go sidyükesha gü Amittai nyugü Jonah mün nyu zokeshü hontse Israel nyu terhi Hamath nyu keyü ka gun gü Arabah züda keti loni lola.

²⁶Kechamvule Npugü le Israel nyu do metse kemvu metse temi nme anyugun keche kelomi ndio kenjün thyüsa kebin hyu.

²⁷Ai Npugü le tsang hensin Israel zan kenmhen lati tse zoshü kemvu genyu, tsügenyu a-le Jehoash nyugü Jeroboam II ben nyu anyugun kenilo.

²⁸Jeroboam II tha kecha dan, a-le thyü keshü dan aphu, kekvu, a-le dihontse teri thyü yo, dihontse a-le Juda hon Damaska lo Hamath lo nipe Israel hon thyü loyo, tsü dan tsü Israel raja dan rüla kethu lesü nyu thu bin mvu ole?

²⁹Jeroboam II gü le a-pvübon nyu Israel raja dan hontse sila, lo anyugü Zechariah le a-sunka raja thyülo.