Read Southern Rengma Naga 2 RAJANYU 15 Bible Online

2 RAJANYU 15 - Southern Rengma Naga bible

2 RAJANYU 15

¹Jeroboam II gü le Israel raja thyükelo chen nkio tsenyü ka Amaziah nyugü Uzziah le Juda raja thyülo,

²a-le a-keyhun chen tseryüo tsero ka raja thyüso, lo a-le chen henpvün kenyhun Jerusalem nyu raja thyü. A-jvü le Jerusalem nyu a-zan le Jekoliah.

³A-le Npugü mhundyü nyu nyu le njü yo, a-pvü Amaziah le kethyü hontse tsü aphu thyü.

⁴Tson yatse-e a-le tero kershvubin da dan bokecha lamvu; tson-o temi dan le tsü nyu kershvu thyü lo tharün kegwa rohü zun.

⁵Npugü le raja gü vüshü, tsügenyu nyule a-tyülo lao a-npvü a-ka kecha nyu yhun bin-o a-kesi ti. Lo raja nyugü Hotham le a-kami aphu so bin-o sorkari sen.

⁶Uzziah tho kecha dan, a-le thyükeshü aphu Juda raja dan rüla kethu lesü nyu thu bin mvu ole?

⁷Uzziah le a-pvübon nyu hontse sila, tson-o anyugun le David nyida nyu a-pvübon nyu sin-o a-sunla, lo anyugü Jotham le a-sunka raja thyülo.

⁸Juda raja Uzziah le raja thyü kelo chen shenryüo tetse ka Jeroboam II gü nyu Zechariah le Samaria nyu Israel so shye tsero raja thyü.

⁹A-pvü hontse, a-le nyu le Npugü mhundyü nyu gwamvu yo tsüthyü. A-le Nebat nyugü Jerobaom, Israel nyu thyü pe no mukela gü kemu dan tsü nrhilo mvula.

¹⁰Jabesh nyugü Shallum le a-ntsun-o Ibleam nyu a-dushvula njüo a-sunka raja thyülo la.

¹¹Zechariah tha kecha dan le Israel raja dan rüla kethu lesü nyu thu bin nyo.

¹²Higü hile Npugü le Jehu ka, “Phuzi nnyenyu no Israel rajakhün ge dunti,” tse a-joshü keshü thyü penla.

¹³Uzziah le Juda raja thyü kelo chen shenryüo tekü ka Jabesh nyugü Shallum le Samaria nyu Shyeme raja thyü.

¹⁴Tson-o Gadi nyugü Menahem le Tirzah nyu hüo Samaria ki nsinryü, lo a-le Samaria nyu Jabesh nyugü Shallum dushvu lao a-sunka raja thyülo la.

¹⁵Shallum tha kecha dan, a-le me ntsun kethyü; hire, tsü dan le Israel raja dan rüla kethu lesü nyu thu bin nyo.

¹⁶Tsügwenkho ka Menahem le Tirzah nyu chwi kejü ka, Tappuah nyida lo tsü tekho kehun ka kebin nyu aphu nkela; kechamvule anyugun le a-hensin yüryü mvukela genyu. A-le tsünyu kebin nyuphu kepfü nyu aphu ginda durhen la.

¹⁷Uzziah le Juda raja thyü kelo chen shenryü teküka Gadi nyugü Menahem le Israel so raja thyülo, lo a-le chen tseryü Samaria nyu raja thyü.

¹⁸Lo a-le Npugü mhundyü nyu nyu le gwamvu yo tsüthyü; a-le a-keyhun then Nebat nyugü Jeroboam kemu Israel thyü pe no mukela tsü nrhilo mvula.

¹⁹Assiria raja gü Tiglath-Pileser le Israel hüryü; tsontsin Menahem le no a-cheo a-raja thyü nko lo nrün genyu rakagi talent yie tseryü pe tsü.

²⁰Menahem le Israel nyu ka pisa shvu, tsüle kenya nyu aphu ka temi nme ge shekel henpvün shvu pe Assiria raja tsü. Tsügenyu Assiria raja le tsünyu bin mvuo rani gunla.

²¹Menahem tha kecha dan, a-le thyükeshü aphu, tsüdan tsü Israel raja dan rüla kethu lesü nyu thu bin mvu ole?

²²Tson-o Manahem le a-pvübon nyu hontse sila, lo anyugü Pekahiah le a-sunka raja thyülo.

²³Uzziah le Juda raja thyü kelo chen henpvün ka Menahem nyugü Pekahiah le Samaria nyu Israel so raja thyülo, lo a-le chen hvu raja thyü.

²⁴A-le Npugü mhundyü nyu nyu le gwamvu yo tsüthyü, lo a-le Nebat nyugü Jeroboam kemu Israel thyü pe no mukela nyu tsü ranilo mvula.

²⁵Tson-o Remaliah nyugü Pekah, a-rihü tsiso keda gü le a-nrhilo lao Gilead nyu henpvün zen-o Samaria nyu raja kanyu ki a-dushvula njüo a-sunka raja thyü lola.

²⁶Pekahiah tho kecha dan, a-le thyü keshü dan aphu, hire, tsü le Israel raja dan rüla kethu lesü nyu thu bin nyo.

²⁷Uzziah le Juda raja thyükelo chen henpvün kenyhun ka Remaliah nyugü Pekah le Samaria nyu Israel so raja thyülo, lo a-le chen nki raja thyü.

²⁸A-le Npugü mhundyü nyu nyu le gwamvu yo tsüthyü, lo Nebat nyugü Jeroboam Israel nyu thyü pe no mukela gü kemu dan nrhilo mvula.

²⁹Pekah le Israel raja thyü kebin ka Assiria raja Tiglath-pileser le ryüo Ijon, Abel Beth Maacah, Janoah, Jazar, Gilead, Galilee lo Naftali kazü aphu lolo la, lo temi dan tenzen-o Assiria ki gunla.

³⁰Lo Uzziah nyugü Jotham le raja thyü kelo chen nki ka Elah nyugü Hoshea le Remaliah nyugü pekah nrhio a-dushvula njüo a-sunka raja thyü lola.

³¹Pekah tha kecha dan, a-le thyü keshü aphu, hire, tsüdan tsü le Israel raja rüla kethu lesü nyu thu bin nyo.

³²Remaliah nyugü Pekah le Israel raja thyü kelo chen hvu ka Uzziah nyugü Jotham le Juda raja thyülo.

³³A-le a-keyhun chen nkipvün ka raja thyüso, lo a-le chen tseryüo tsero Jerusalem nyu raja thyü. A-jvü zan le Jerusha Zadok nyugi.

³⁴Lo a-le a-pvü Uzziah tho hontse nyu le Npugü mhundyü nyu njüyo tsü aphu thyü.

³⁵Tson yatse-e tero kershvubin da dan boren lamvu; tson-o temi dan le tsünyu kershvu thyü lo tharün kegwa rohü zun. A-le Npugü ka tson nyu khinrun teso gü tsü thyüshü.

³⁶Jotham tha kecha dan, a-le thyükeshü aphu, Juda raja dan rüla kethu lesü nyu thu bin mvu ole?

³⁷Tsügwenkho ka Npugü le Siria raja gü Rezin lo Remaliah nyugü Pekah nipe Juda nren.

³⁸Jotham le a-pvübon nyuhontse sila; lo anyugü Ahaz le a-sunka raja thyülo.