Read Southern Rengma Naga 2 RAJANYU 16 Bible Online

2 RAJANYU 16 - Southern Rengma Naga bible

2 RAJANYU 16

¹Remaliah nyugü Pekah le raja thyü kelo chen tseryüo tsenyü ka Jotham nyugü Ahaz le Juda raja thyüso,

²Ahaz le a-keyhun chen nki ka raja thyülo, lo a-le chen tseryüo tsero Jerusalem nyu raja thyü. Lo a-le a-bon David le kethyü hontse Npugü Sunggigü mhundyü ka nyu le a-züyo tsü thyü mvu,

³Israel raja dan tson gü nyu tsonchü tinla. A-le Npugü le Israel temi dan mhundyü hü pe shwekela tsipwen dan le thyü kehü kentsükenche tha thyüo a-npvü a-nyu-e rope tero kershvu thyüla.

⁴Lo a-le tero kershvubin da dan, rinchothun dan, lo senbin kenjvü nmeme tse aphu ka kershvu thyü lo tharün kegwa ro.

⁵Tson-o Siria raja Rezin lo Israel raja Remaliah nyugü Pekah au le ryü Jerusalem wheo Ahaz hunpfülo, ai a-nyekvulo mvula.

⁶(Tsügwenkho ka Edom raja gü le Elath nyu Juda temi hüla njüo Edom nyu genyu Elath thyü nilo; tson-o Edom nyu le Elath nyu ryü kelo nthu keti bin zun.)

⁷Tsüselo Ahaz le lilo nipe Assiria raja Tiglath-pileser kishüo, “Ale ngo lo nnyu le. Ryüo Siria raja lo Israel raja au le a nren kebin au ben nyu a kenishü lo,” tsonshü.

⁸Ahaz le Npugü kanyu lo raja gü kenya kequen kehü kanyu hyukelo suna lo rakagi kope jwe thyü pe Assiria raja gü tsüshü.

⁹Assiria raja le a-khwenyüo gun gü Damaska hüo lolo la, lo Rezin dushvula njüo temi dan tenzen-o Kir ki gunla.

¹⁰Raja gü Ahaz le Damaska ki Assiria raja Tiglath-pileser teno kegü ka, a-le Damaska nyu kershvubin gü hyushü. Raja Ahaz le kershvubin tsügü gwenzin tse a-zoja lo tha aphu tsü kenmeshü kethyü nipe püshükeda gü Uriah tsüshü.

¹¹Tson-o püshükeda gü Uriah le, Raja Ahaz le Damaska nyu bin-o nipe a-tsü keshü hontse, raja gü le tsüki hüo keryü mhundyü kershvubin gü thyülo.

¹²Lo raja gü le Damaska nyu bin-o ryü, kershvubin gü shwi shü. Tson-o raja gü le kershvubin gü khonni ryüo, tsüge külo,

¹³tson-o a-le rope kershvu, shyeni pe kershvu, a-hon run pe kershvu lo kepvüshe kershvu tezi kejen pe kershvubin ge shüshü.

¹⁴Lo a-le Npugü mhundyü nyu kebin lazo pe kethyü kershvubin le Kershvuka lo kershvubin keshün gü au jaka kebin tsü khi kela la, tson-o pe a-kershvubin tesozin shüla.

¹⁵Tson-o raja Ahaz le püshükeda gü Uriah ka, “Kershvubin keda gü ge lonyü rope kershvu, ngwen gü shyeni kershvu, raja gü hon rope kershvu, a-shyeni pe kershvu pe kazü gü nyu temi aphu rope kershvu, anyugun shyeni pe kershvu, anyugun hon pe kershvu tsü rolo; lo rope kershvu, lo kershvu kecha dan aphu tezi pe tsü ge shü lalo; a lazo kershvubin gü tsü le ale Npugü ka ketso nrün agenyu nti,” tsonshü.

¹⁶Püshüukeda gü Uriah le raja Ahaz le ahza khikeshü hi aphu thyü.

¹⁷Lo raja Ahaz le kershvu kanyu sen kehü lazo pe kethyü methu gari gü rhola, lo tsünyu zükhun dan khila, lo lazo pe kethyü zükhin, methutse dan le pfü kebin tsü khishe pe tso so ge dunla.

¹⁸Assiria nyu raja gü kenyü thyü nrün genyu Ahaz le Kershvuka nyu raja khun lo kenshün bin khila lo raja gü le a-npvü Kershvuka nyu keyü tson khinla.

¹⁹Ahaz le kethyü a-tha kecha dan, tsü dan tsü Juda raja dan rüla kethu lesü nyu thu bin mvu ole?

²⁰Tson-o Ahaz le a-pvübon nyu hontse sila, lo David nyida nyu a-pvübon nyu sin-o sunla; tson-o anyugü Hezekiah le a-sunka raja thyülo.