Read Southern Rengma Naga 2 RAJANYU 17 Bible Online

2 RAJANYU 17 - Southern Rengma Naga bible

2 RAJANYU 17

¹Ahaz le Juda raja thyü kelo chen tseryü kenyhun ka Elath nyugü Hoshea le Samaria nyu Israel so raja thyülo, lo a-le chen tekü raja thyü.

²A-le Npugü mhundyü nyu nyu le gwamvuyo tsüthyü, tson-e a-mhundyü Israel raja dan hontse lamvu.

³Assiria raja Shalmaneser le a-zen-o terithyü titse ryü; lo Hoshea le a-hensin yülao khajana pe a-tsü hü.

⁴Ai Assiria raja le Hoshea le teda thyü kebin shalo; kechamvule a-le lilo nipe Ijipt raja gü So ketsü lo chen kechwi thyü kehü hontse khajana pe Assiria raja tsümvu kela genyu; tsügenyu Assiria raja le a-tenlo-o phin pe do thyüla.

⁵Tson-o Assiria raja le kazü gü aphu hüo Samaria nyu ryü, lo chen shen tsü hunpfü lola.

⁶Hoshea le raja thyükelo chen tekü ka Assiria raja gü le Samaria lo lola, tson-o Israel nyu tenzen-o Assiria ki gunla, anyugun pe Halah lo Gozan nyu Habor zürije ki, lo Medas nyida dan ka shüla.

⁷Hihontse kela tsü le kechamvule Israel temi dan le Ijipt kazü ki Faroh raja ben nyu anyugun zen chwiryü kelo Npugü Sunggigü mhundyü nyu mukela genyu, tson_o tero kecha dan rüshvu,

⁸lo Npugü le Israel nyu temi mhundyü nyu hü pe shwekela dan jvü then lo Israel raja dan le thyülo tsekeshü jvü dan zen tinkela genyu.

⁹Lo Israel nyu temi dan le kebuo anyugun Npugü Sunggigü mhundyü nyu a-zükemvu dan thyüla. Anyugun le rünyi keshetsin ka gü chwida khwe pe hun kenjü nyida keti nyu anyugun tero kershvubin da thyü kü lola;

¹⁰rinchothun ge lo senbin kenjvü nme me tse aphu phaka tso sen lo Asherah men kezü pe shü küla;

¹¹Npugü le anyugun mhundyü nyu hükela tsipwen kecha dan le kethyü hontse anyugun le tero kershvubin da nyu tsü tharün kegwa ro. Tson-o serikemvu tho dan thyüo Npugü nyu thyü nshvu pe a-nyunta,

¹²Npugü le anyugun ka, “Hagun le hi thyü nya,” tse keshü teromen dan rüshvu.

¹³Tson-e Npugü le sidyükesha nyu lo a-lokethyü nyu no anyugun ka, “Hagun serikemvu tson nyu ranilo, tson-o ale pe hagun pvübon nyu ka zokeshü a go sidyükesha dan le senryü hagun ketsü tejvü gü nyu thu kenjü hontse a johokeshü lo ajvü dan thyü zenlo.”

¹⁴Ai anyugun le Npugü Sunggigü tenyen kemvu anyugun pvübon nyu dan hontse anyugun nyun rüla lo a-jo zen mvula.

¹⁵Anyugun le a-jo dan a-le anyugun pvübon nyu zen kejozenkelo lo anyugun senkethyü tsü ntsü laso. Anyugun le thakon kemvu teromen dan rüshvuo a-kon kendi thyülaso, lo anyugun hunpfü kebin tsipwen kecha dan, Npugü le anyugun no tsü dan tho hontse nyalo tse keshü dan sithen tinla.

¹⁶Lo anyugun le Npugü anyugun Sunggigü le johokeshü dan aphu khela njüo anyugun npvü anyu genyu rozun pe methunyu kenyhun chalo; Asherah men zülo tson-o tsangge shyepvü-shyenyü aphu rüshvu lo Baal lothyü tinla.

¹⁷Tson-o anyugun nyenyu peche-e tenu-e rope rüshvu, teronyu nthon, lo temvü tseo anyugun npvü anyugun jwe pe Npugü mhundyü nyu gwakemvu thyüo a-nyu thyü nshvu pe no a-nyunta la.

¹⁸Tsügenyu Npugü le Israel nyu genyu anyuntasa lao a-mhundyü nyu anyugun khi pe shwe la: Juda tsipwen nyeki kecha nme nsen mvula.

¹⁹Juda temi dan ko Npugü anyugun Sunggigü le johokeshü dan thyü zen mvula, tson-o Israel le tsin keshü jvü gü nyu tsonchü tinla.

²⁰Lo Npugü le a-mhundyü nyu Israel tsipwen dan khipe shwe shü la kemvu then, khe pe nke nmhü kehü nyu ben nyu me no anyugun nthyü nnyü.

²¹Npugü le Juda lo Israel sükho kecha thyü kela sika, Israel nyu le Nebat nyugü Jeroboam no raja thyülo. Lo Jeroboam le Israel thyü pe no Npugü khela lo anyugun tsontsin pe kemu ketetsin kethyü nyu shü la.

²²Israel temi dan le Jeroboam le thyü kela kemu aphu then; anyugun le tsü nrhilo mvu,

²³Npugü le a-gonyu sidyükesha dan mün nyu ale kenkhin ki thyü titse zo kenjü hontse a-mhundyü nyu Israel nkela. Tsügenyu Israel temi tenzen gü Assiria lojvü ki shüla, tson-o nthu keti tsünyu yhun bin.

²⁴Lo Assiria raja gü le Babilon ki, Cuthah, Avva, Hamath lo Shepharvaim nyu temi zen ryü Israel temi sunka Samaria nyu shüla; tson-o anyugun le Samaria lolo njüo nyida tsü dan ka yhun tinla.

²⁵Anyugun le tsünyu yhun lo kerika, Npugü nshvu mvu; tsügenyu Npugü le shünyho nipe anyu dan nyu shüo, anyugun peha tenla.

²⁶Tsontsin me le Assiria raja ka, “Tsipwen nle zen chwi gü Samaria nyida dan ka keshü temi dan le kazü tsügü nyu tero gü jvü dan shamvu; tsügenyu a-le shünyho nipe anyu dan nyu shüo anyugun ten bin la sele,” tsonshü.

²⁷Tsüselo Assiria raja le ahza khishüo, “Hagun le tsünyu zen tinkela püshükeda nyu nme nishü,tson-o a-no gü tsünyu yhun-o kazü tsügü nyu tero gü jvü pe anyugun sen thyülo,” tsonshü.

²⁸Tsügenyu anyugun le Samaria nyu zen tinkela püshükeda nyu nme no ryü Bethel nyu yhun-o, dihontse Npugü shye nshvu mvulo shvuyo pe anyugun senthyü shü.

²⁹Ai tsipwen nme me tse, a-le nyida dika bin yo tsünyu a-npvü a-teromen zü pe Samaria nyu dan le thyü pe bin kenjü teromen kershvuka nyu shü lola.

³⁰Lo Babilon nyu le Succoth-benoth, Kuth nyu le Nergal, Hamath nyu le Ashima,

³¹Ivvite nyu le Nibhaz lo Tartak; lo Sepharviam nyu le a-nyenyu rope anyugun tero Adrammelech lo Anammelech rüshvu.

³²Anyugun le Npugü ko nshvuo temi kecha cha kejü pe püshükeda thyüo no teromen kershvuka dan nyu bin-o bin tsüdan ka anyugun genyu kershvu thyü.

³³Tsü hontseo anyugun le Npugü nshvu hü, ai tsipwen anyugun le zenbin hüo chwiryü kela dan jvü hontse anyugun npvü anyu tero rüshvu hü.

³⁴Nthu keti-e anyugun le nduka jvütsü thyü hüzun. Anyugun le Npugü nshvumvu, lo a-le a-zan tha pe Israel thyü kela gü, Jakob tsipwen dan no thyülo tse keshü Npugü tejvü lo ahza dan-e then lo mvula.

³⁵Npugü le anyugun zen kejozen, lo ahza khi keshü le, “Hagun tero kecha nme nshvuo nkhün tsügü rüshvu lo a-lothyü nmvue tha rope tsüdan kishü nya;

³⁶ai kvusa tse a-benshwen pen-o Ijipt kazü nyu hagun zen chwikeryü Npugü nshvulo hagun le a-mhundyü nyu nkhün lo tha rope a-rüshvu ti.

³⁷Lo Npugü le thyülo tse thu pe hagun ketsü a-jvü, a-tejvü, lo a-johokeshü dan petsü sao thyüzen hülo. Hagun le tero kecha dan nshvu nya,

³⁸lo hagun le ale hagun zen kejozen kelo gütsü nmhinla loshvu. Hagun le tero kecha nshvu nya

³⁹ai hagun le Npugü hagun Sunggigü nshvulo; lo a-le hagun shwikerüchün nyu aphu ben nyu hagun kenishüti.”

⁴⁰Tson-e anyugun le nyümvuo nduka jvü hontse thyü gwenzin.

⁴¹Tsühontse tsipwen hidan le Npugü nshvu lo anyugun teromen kezü dan ko rüshvu; tson-o anyugun pvübon nyu tha hontse anyugun-e lo anyugun nyenyu-e nthu keti tson hü nyo.