Read Southern Rengma Naga 2 RAJANYU 18 Bible Online

2 RAJANYU 18 - Southern Rengma Naga bible

2 RAJANYU 18

¹Elah nyugü Hoshea le Israel raja thyükelo chen shen ka Ahaz nyugü Hezekiah le Juda raja thyülo.

²A-le a-keyhun chen nki pvün ka raja thyüso, lo chen nkio tekü Jerusalem nyu raja thyü. A-jvü le Zechariah nyugi, a-zan le Abi.

³Lo a-le a-bon David hontse tha aphu nyu nyule Npugü mhundyü nyu a-züyo tsüthyü.

⁴A-le tero kershvubin da dan boren la, lo tso kesen dan boren la, lo Asherah men gü duthüla. Mosa le lazo pe peri thyükeshü Nehushtan tse ko kehü gütsü borenla, kechamvule tsü keti Israel nyu le tharün kegwa rope tsüka shü kehü genyu;

⁵A-le Israel nyu Npugü Sunggigü tenyen; tsügenyu a-mhundyü-e lo a-siki-e Juda raja nme a-hontse ndi.

⁶Kechagenyumvule a-le Npugü khonni hü; tson-o Npugü sithen kehü nyutsü rani lamvu; ai Npugü le joho pe Mosa ketsü dan thyü zen hü.

⁷Tson-o Npugü le a-zen hü; tsügenyu a-le lihika gü-e gwakenye lo. A-le Assiria raja gü ntsun, tson-o a-lothyü mvula.

⁸A-le Filistian nyu nyishwetsin ka gun gü nyida tsin keti, Gaza lo tsü temhun aphu lolo la.

⁹Hezekiah le raja thyükelo chen zi, tsüle Elath nyugü Hoshea le Israel raja thyükelo chen tsenyü la. Lo tsü chen Assiria raja gü Shalmaneser le Samaria ntsun-o ryü tsü hunpfü lola.

¹⁰Tson-o chen shen ki tsülo lola. Hezekiah le raja thyü kelo chen tsero tsü le Israel raja gü Hoshea le chen tekü raja thyübin laso, tsü chen Samaria lo lola.

¹¹Assiria raja lo Israel nyu tenzen-o Assiria ki gunla, tson-o pe Halah rünyi lo Gozan lojvü Habor züri kho lo Meda rünyi dan ka shüla.

¹²Anyugun le Npugü anyu Sunggigü khwenyümvuo a-le anyugun zen kejozenkelo borho, lo Npugü gogü Mosa le johokeshü aphu nyü-e mvu lo thyü zenmvu kela genyu.

¹³Hezekiah le raja thyükelo chen tseryü pezi ka Assiria raja Sennacherib le ryüo Juda nyida chwida khwen pe hun kethyü dan hüo lokü lola.

¹⁴Tsüselo Juda raja Hezekiah le me nipe Lachish nyu Assiria raja gü ki shüo a-ka, “Ale thyüzü laso; nle akheshüo nitin lalo; nle nyu pe age shü yo ale tsü pfüti.” Tsontsin Assiria raja le raja Hezekiah ka rakagi talent tsishen, lo suna talent shenryü hishü.

¹⁵Tson-o Hezekiah le Npugü ka gü nyu lo raja kenya kequen khin gü nyu rakagi hyukelo aphu pe tsüla.

¹⁶Tsügwenkho ka Juda raja Hezekiah le Kershvuka gü kakhin lo kachon ge a-le suna pe je kenjü tsüe khipe Assiria raja tsüla.

¹⁷Tson-e Assiria raja le Lachish nyu a-rihü dan so kedatsin gü, a-kenya sen kehü kedatsin gü lo a-hensin kedatsin gü tse lo rihü danda nipe Jerusalem nyu Hezekiah kishü. Tson-o anyugun le Jerusalem ki nsin ryüo phikeda nyu ki kegü tsonda nyu zübun tesagü khoka bin lola.

¹⁸Lo anyugun le raja gü koshü laryü, a-kanyu kedagü Hilkiah nyugü Eliakim, a-hensin ka kethu gü Shebnah lo thu pe bin kenjü ketsen kehü gü Asaph nyugü Joah tse le chwi ryü.

¹⁹Tsontsin Rabshakeh le anyugun ka Hezekiah ka zoshülo, Raja kedagü, Assiria raja le hihontse zohü nyo: Nle nyu rüchün-o peche bin nla?

²⁰“Nkerüchün le jo kenrun-kenryü le terinyu ntsontsin lo nthyü nkvulo gwa le tse ole? Nle ntsoka segü ge nngüo a ntsun bin nla?

²¹Hire, nle ntsoka Ijipt nngü bin nyo, nbothün ketse nme tsüle temi ligü higü a-ge nngü kebin gü ben tse shüti. Ijipt raja Faroah le a-ge nngü kehü nyu aphu ge tson hü nyo.”

²²Ai keshanyu laka nle, “Agun le Npugü agun Sunggigü n ngü bin nle, tsonlo tsüle Hezekiah le Juda lo Jerusalem ka, hagun le Jerusalem nyu kershvubin higü mhundyü nyu rüshvuti, tson-o a-kershvubin da dan bo nshvu kela gü mvu ole?

²³Tsügenyu ryüo a npugü Assiria raja gü ka johoshülo; nle a-ge kedun temi hyulo gwa yatselo ale keru yiehvu pe ntsüti.

²⁴Tson yatselo nle Ijipt nyuka kerugari lo keru temi rüchün bin nteme a npugü gonyu tsiso keda keshe tsin gü-e zen kendyülo gwa ti ole?

²⁵Tsü nti mvule ale Npugü sin mvuo bin higü nkela titse nsinryü ole? Npugü le aka, nsin gü kazü higü ntsun-o nke lalo,” tsonshü le.

²⁶Tsontsin Hilkiah nyugü Eliakim, Shebna lo Joah le Rabshakeh ka, “Agun le nka hibin nle, Aramaic khwe ki n gonyu dan nthonlo, kechamvule agun le tsü shabin nle; temi dan le chwida ki bin-o nyülo kegwa bin ka Juda khwe ki zo nyalo,” tsonshü.

²⁷Ai Rabshekeh le anyugun ka, “A npugü le anikeshü le ano jo hipe hagun npugü lo hagun nti a-me chwida ki so kebin hagun zen-o a-npvü a-vütyü lo a-kenzun tsüo nkela nrün dan ka zo nyalo tse shü ole?”

²⁸Tson-o Rabshekeh le so-o Juda khwe ki nra sen-o, “Raja kedagü, Assiria raja jo nyü lolo!

²⁹Raja gü le hihontse zohü nyo: Hezekiah no hagun sa nyalo, kechamvule a-le aben nyu hagun keni loho.

³⁰Hezekiah no Npugü le ngun kenishü tsentsü ti lo nyida higü pe Assiria raja tsüla kemvui, tson zo-o hagun no Npugü tenyen bin nya.

³¹Hezekiah khwenyü nya; kechamvule Assiria raja le hihontse zohü nyo. Azen kengü gwa lao aki chwiryü lalo; tson yatselo hagun nme me tse a-npvü a-vainsha tyü, a-npvü a-kherosha tyü lo a-npvü a-zülvu nyu zü tsü ti;

³²ale ryü hagun zen gü hagun kazü hontse kethyü nme shye lo vainsha zü kazü, tensü lo vainsha, oliv bin lo khuzü kazü nyu hagun no simvuo rhün bin loti. Tsügenyu Hezekiah le hagun sao Npugü le ngun kenishü ti tson zoe a-khwenyü nya.

³³Tsipwen nme-e a-tero gü le Assiria raja gü ben nyu a-kazü kenishü ole?

³⁴Hamath lo Arpad tero dan le diki hü tinla ola? Shepharvaim, Hena lo Ivvah tero dan le diki hü tinla ola? Anyugun le aben nyu Samaria kenishü ole?

³⁵Kazü nyu tero aphu dan nyu digü le aben nyu a-kazü kenishü letseo Npugü le aben nyu Jerusalem kenishü ti ola?”

³⁶Ai temi dan le yün tsela, lo a-jo nme kenishü mvu, kechamvule raja gü le, “A-jokeni nyalo,” tson ahza khikeshü genyu.

³⁷Tson-o kanyu kedagü Hilkiah nyugü Eliakim, raja hensin kethu gü Shebnah, lo thu pe bin njü kehü gü Asaph nyugü Joah tse Hezekiah ki ryü anyugun phi sürhen-o Rabshekeh jo dan pe a-ka zoshü.