Read Southern Rengma Naga 2 RAJANYU 19 Bible Online

2 RAJANYU 19 - Southern Rengma Naga bible

2 RAJANYU 19

¹Raja Hezekiah le tsünyülo ntsin a-phi sürhenla, tson-o ronphi benlo njüo Npugü Kershvuka ki gunla.

²Tson-o a-le a-kanyu kedagü Eliakim, a-hensin kethu gü Shebnah, lo püshükeda gü tse nipe Amoz nyugü sidyükesha gü Isaiah kishü. Anyugun ko ronphi ben hü.

³Anyugun le a-ka Hezekiah le hihontse zohü nle, “Nthu jon hile shekese, mele ntsin lo nkenshwe jon nme laso; ntsenyu nnyu gü zhü lo kekvu ndio nnyu shwilo hokebin hontse laso.

⁴Npugü n Sungggü le Assiria raja le no rhünkehü Sunggigü nshwe lotseo nikeshü gü Rabshekeh jo dan aphu nyülo la njüo shaja pe tsü zokeshü dan tsüti tse bin-e shamvü; tsügenyu nsen kebin dan genyu kehi thyü lolo; ” tsonshü.

⁵Raja Hezekiah go dan le Isaiah ki ryü ntsin,

⁶Isaiah le anyugun ka hagun npugü ka zoshülo, “Npugü le hihontse zohü nyo: Asssiria raja le a-kenkhin jo nle nyükelo dan genyu nshvunya.

⁷Hire, ale kapu nme pe a-ge shüti, tson-o a-le jobon nme nyülo njüo ranio a-npvü a-kazü ki gun lati, lo ale a-no a-npvü a-kazü nyu zhethon nyu sila ti.”

⁸Rabshekeh le rani keryü ka Assiria raja le Lachish nyu bin mvu kela shalo; kechamvule a-le Libnah rünyi zen-o kega bin kela genyu.

⁹Assiria raja le Ethiopia raja gü Tirhakah le anyugun zen kega titse chwiryü kela shalo ntsin a-le lilo ni nipe Hezekiah kishüo,

¹⁰Hagun le Juda raja Hezekiah ka hihontse zoshülo: “Hagun Sunggigü nle a-tenyen kehü gü no hagun sao Jerusalem khi pe Assiria raja gü tsüla kemvui le tson zobin nyalo.

¹¹Hire, Assiria raja dan le kazü aphu nyu me nkeshü la kehü hagun le nyülo laso. Tson yatselo hagun kenishü ti ole?

¹²Apvübon nyu dan le nke kela Gazan, Haran, Rezeph, lo Telassar nyu keyhun Betheden temi dan tsipwen tsü dan tero dan le anyugun kenishü ole?

¹³Hamath raja, Arpad raja, Sepharvaim nyida gü raja, Hena raja nmvue Ivvah raja le dikipon tinla ola?”

¹⁴Hezekiah le lilonyu ben ka lesü gü hyulo-o swüshü; tson-o Npugü ka ki nsin gü tsü pe Npugü mhundyü nyu shüshü,

¹⁵Hezekiah le Npugü ka kehithyüo: “O! Israel nyu Npugü Sunggigü, Cherubim so ge n rajakhün le kebin gü, nle n npvü kazü raja aphu ketsen kehü Sunggigü; nle tsang lo kazü thyükeshü gü.

¹⁶O! Npugü n nyetin pfü keyha pe nyü shülo n yhütyü kope shwishü lo; lo Sennacherib le rhün kehü Sunggigü nkhin lo tse nikeshü jo dan nyü shülo.

¹⁷Npugü, Assiria raja dan le tsipwen tsüdan lo anyugun kazü nkela ketsin le,

¹⁸lo anyugun tero dan khipe mah nyu shwe shüla; kechamvule teronyu kemvu ai temi ben lope kethyü tso lo sen genyu anyugun nke laso.

¹⁹Tsügenyu, kazü nyu raja aphu no Npugü nti le Sunggigü tse shalo nrün genyu a-ben nyu agun kenishü lotse nka hibin nle, O Npugü.”

²⁰Tsontsin Amoz nyugü Isaiah le me nipe Hezekiah ki shüo, “Israel Npugü Sunggigü le hihontse zohü nyo: Assiria raja Sennacherib rüla nle a-ka hikeshü a-le nyülo laso,

²¹a-genyu Npugü le tha zokeshü jo le higü hi: A-le n ntsü a-le nshwinyü Zion nyu phusen gi; a-le nsiki a-pe kejen Jerusalem nyugi.

²²Nle segü nkhin lo kesü la? Nle segü ntsun-o jozo tetso la lo ketekho nmhun penso-o shwila? Israel kenshün gü ntsun!

²³N lilonyu ge nle Npugü nkhin, lo nle akerugari kechon sen-o ale kazüthun ketetso dan ge kü laso, gü Lebanon keti; ale a-sedar bin ketetso tsin phünla, a-cypress bin kegwa dan phünla; ale tsü kentsun tsin, a-chün kezün tsin ki güo ryülaso.

²⁴Ale zülu dan tsolo lo zü kenshün tsü, lo ale aphaje pe Ijipt züri aphu kedü nsin la!

²⁵“Ale nduka nyu tson titse rhilo kela nle nyü lomvu le? Ale ntsoka thyü pen kebin hile nduka nyu nda nron njü, tsüle chwida khwen pe hun kenjü nyida dan tsü nno nkela nrün genyu.

²⁶Rünyi tsünyu keyhun dan le kvu mvula, anyu shese lo anyu kerü shvula, lo low nyu tehen hontse, lo tehen kebwen hontse, ka so ge tehen hontse; yhunlo kemvu ka pho nkola.

²⁷“Ai ale nle dun tsü kethyü, lo nkechwi keyü lo nle age nnyu kenthün sha.

²⁸Kechamvule nle age nnyu nthün lo nketekho le anyentin karyü kela genyu. Ale a hükhuvü pe nmün khen lo-o ale nsükerü pe nle ditson ryü yo tsü tson nyu rani lati.”

²⁹“Lo higü hile hagun zansü nme; nthu nye chen hagun le a-npvü yhun sokeryü tyüti, lo teken chen a-npvü a-tsicheo chwikeryü tyüti, tson-o chen shen chen ntsin shülo lo gvülo. Vain bin sen-o a-sha tyülo.

³⁰Juda kami nsen kelo dan le a-metsen tesoyüo tesinzin a-sha nsha loti;

³¹kechamvule nsen kelo temi le Jerusalem nyu lo Zion ge bin loti. Npugü le hihontse thyüshü nyü kebin genyu.

³²“Tsügenyu Assiria raja rüla Npugü le hihontse zohü nyo, ‘A-le nyida higü nyu yüryü kemvui, nmvue tho nme kvushü kemvui nmvue gida pfüo tsü mhundyü so nmvue tsü whe nrün genyu kesun-e thyü loho.

³³A-le keryü tson nyu rani lati, a-le nyida higü nyu yüryü loho tse Npugü lezo.

³⁴Kechamvule anpvü azan genyu lo a gogü David genyu ale nyida higü nokhin lo-o kenishü ti.’ ”

³⁵Tson-o tsüje tsangge jolonyu nme le chwi gü Assiria nyu kamp nyu temi lak nmeo yie hentetse dushvula; lo rhün kebin dan le lonyü soryü ntsin kesimin nti kebin hyulo!

³⁶Tsontsin Assiria raja Sennacherib le ranio Nineveh ki gun la.

³⁷Tson-o gü a-tero Nisroch kanyu rüshvu kebin ka, anyu Andrammelech lo pe Sharezer au le zhethon pe a-dushvula njüo Ararat kazü ki tinla. LO anyu Esarhaddom le a-sunka raja thyülo.