Read Southern Rengma Naga 2 RAJANYU 20 Bible Online

2 RAJANYU 20 - Southern Rengma Naga bible

2 RAJANYU 20

¹Tsügwenkho ka Hezekiah le ho-o sigü jüla. Lo Amoz nyugü sidyükesha gü Isaiah le ryü a-ka, “Npugü le hihontse zohü nyo, `Nka ketsü kela lalo; kechamvule nle ponlo mvuo sikelai so,” tsonshü.

²Tsontsin Hezekiah le a-mhupfü kerüo sikhozin ntsunlo njüo Npugü ka kehi thyüo,

³“O Npugü ale nka hibin nle, dihontse ale anyu aphu sen-o ketsin nyu nmhundyü ka tsonchü lo nmhundyü nyu nyu le gwayo tsüthyü kehü rüchün shülo.” Tson-o Hezekiah le a-nyu kenjün thyüo chüsa lola.

⁴Lo Isaiah le katsen lvügü nken tin kemvuka, Npugü jo le a-karyü

⁵rani gü atemi dan so kedagü Hezekiah ka zoshülo; “Npugü nbon David Sunggigü le hihontse zohü nyo. Ale nkehi nyülo laso, nyhüphu hyu laso; hire, ale nthyü kesherhün shüti; Jon shen nyü nle Npugü ka gü ki nsin ti.

⁶Lo ale chen tseryü pvün pe nkeyhun sin shüti.Ale Assiria raja ben nyu nkeyhun lo nyida higü kenishü ti, lo ale a npvü agenyu lo agogü David genyu nyida higü sun loti.”

⁷Tson-o Isaiah le, “Khürosha dukekha nme sen ryülo. Tson-o a-no ponlo nrün genyu anyugun no tsü sen gü a-kinthyü shvuka shüshü lo,” tsonshü.

⁸Hezekiah le Isaiah ka, “Npugü le athyü kesherhün shüti, tson-o ale jon shen nyü Npugü ka ki nsin titse kethyü zansü nyuthyü shü tila?”

⁹Tsontsin Isaiah le, “Npugü le a-le zokeshü thyüshüti tse kethyü zansü Npugü kanyu pe nketsü le higü hile: Kengü no phalu tseryü kethün lati le phalu tseryü tesen lati la?” tsonshü.

¹⁰Hezekiah le, “Kengü gü no phalu tseryü kethün chwi kethyü le nne ri; no phalu tseryü tesen kela le gwakvu.”

¹¹Tson-o sidyükesha gü Isaiah le Npugü ka hishü, tsontsin Npugü le yhüko kengü no Ahaz le phalu do kenjün ge phalu tseryü tesen nila.

¹²Tsügwenkho ka Babilon raja Merodach Baladan, Baladan nyugü le Hezekiah le hokebin rüla nyülo-o lesü lo jwe nipe Hezekiah tsüshü.

¹³Tsontsin Hezekiah le a-kenyüo anyugun nsinlo, lo a-kenya kanyu rakagi, suna, tharün kegwa, terzü minketsen, teri kanyü lo tsünyu kebin aphu pe anyugun hishü; a-kanyu lo raja bin nyu anyugun hi kemvu thame ndila.

¹⁴Tsüselo sidyükesha gü Isaiah le ryü Hezekiah ka, “Temi hidan le nyu zola? Lo anyugun le dikipon ryüla?” Tsontsin Hezekiah le, “Anyugun le rünyi nithen ki Babilon nyu ryü le,” tsonshü.

¹⁵Tsüka a-le, “Anyugun le nkanyu nyu hyula la?” Hezekiah le, “Anyugun le akanyu kebin aphu hyu laso; akanyü kequen kanyu ale pe anyugun hi kemvu thame ndi le,” tsonshü.

¹⁶Tsontsin Isaiah le Hezekiah ka, “Npugü jo nyü lolo:

¹⁷Hire, gwenkho nme le ryü zhü nyo, nkanyu kebin aphu npvübon nyu ka ryü nthu keti kequen kenjün pfüo Babilon ki gü lati; thame nsen shü loho.

¹⁸Tson-o nge yhun chwikeryü, n nyenyu peha tenzen tin lati; tson-o anyugun le Babilon raja bin ki eunuch thyüo yhun ti.”

¹⁹Hezekiah le tsü le a-kon le a-keyhun gwenkho ka gwaketho lo kenshvu kendi shalo njüo, a-jokenio, “Nle Npugü kanyu jozo keshü tsü le gwale,” tsela.

²⁰Hezekiah tha kecha dan, a-kekvu, a-le dihontse zi tso shü lo zünye du sen-o nyida gü nyu keryü tsü dan tsü Juda raja dan rüla kethu lesü nyu bin mvu ole?

²¹Lo Hezekiah le a-pvübon nyu hontse sila; lo anyugü Manasseh le a-sunka raja thyülo.