Read Southern Rengma Naga 2 RAJANYU 22 Bible Online

2 RAJANYU 22 - Southern Rengma Naga bible

2 RAJANYU 22

¹Josiah le a-keyhun chen tetse ka raja thyülo lo a-le Jerusalem nyu chen shenryü nme raja thyü. A-jvü le Bozkath nyu Adaiah nyugi a-zan le Jedidah.

²A-le Npugü mhundyü nyu nyu le a-züyo tsüthyü, a-le a-bon David tson aphu nyu tsonchü, tezhü nmvue tegwazin güla mvu.

³Josiah le raja thyü kelo chen tseryüo tetse ka a-le Meshullam nyu Azaliah nyugü Shaphan tse kethyü a-hensin nyu kethu gü nipe Npugü ka gü ki shüo a-ka,

⁴“Nsin gü püshükengun gü Hilkiah ka, a-no temi dan le pisa sen Npugü ka ki keryü, khenpvü kekhwen dan le kequen kelo tsü swü shwilo;

⁵tson-o tsü khi pe Npugü ka gü nyu tha thyü kebin keshwinyu ben ka shüo anyugun no pe Npugü ka gwamvu kela thyüni kebin nyu dan tsü shülo,

⁶tsü le pe Mistrinyu, thakethyü nyu lo tso keyhe nyu chün thyü, lo tesen lo keyhe tso hei pe ka gwamvu kela thyüni nrün genyu.

⁷Ai anyugun le joketsin nyu thathyü kebin genyu pisa pe anyugun ben nyu shükela dan tsü dihontse sen layo ketso ni mvue gwa,” tsonshü.

⁸Püshükengun gü Hilkiah le raja hensin nyu kethu gü Shaphan ka, “Ale Npugü kanyu tejvü lesü gü hyulo le.” Tson-o Hilkiah le lesü gü khipe Shaphan tsüo a-le swü.

⁹Kethu gü Shaphan le raja gü kiryüo a-ka, “Ngonyu dan le kershvuka nyu hyukelo pisa tsü khilo-o pe Npugü kanyu thatho thyü kebin dan keshwi nyu ben ka shü laso,” tsonshü

¹⁰Lo kethu gü Shaphan le raja gü ka, “Püshükeda gü Hilkiah le lesü nme pe atsü le,” tson-o Shaphan le raja gü mhundyü nyu tsü swü shü.

¹¹Tsüselo raja gü le lesü nyu jo gü nyüshüo a-phi sürhenla.

¹²Tson-o raja gü le ahza pe püshükeda gü Hilkiah, Shaphan nyugü Ahikam, Micaiah nyugü Achbor, kethu gü Shaphan, lo raja gogü Asaiah tsüo anyugun ka,

¹³“Gü agenyu, temi dan genyu lo Juda aphu genyu lesü hyukelo higü nyu jo dan rüla Npugü ka ketso shülo; Npugü le ngun genyu a-nyunta sabin laso, kechamvule ngun pvübon nyu le lesü higü nyu ngun no thyü lo tse ngun genyu thu kenjüjo dan aphu thyü zenmvu kela genyu,” tsonshü.

¹⁴Tsügenyu püshükeda Hilkiah, Ahikam, Achbor, Shaphan lo Asaiah tse anyugun gü sidyükesha Huldah, Harhas nyu Tikvah nyugü kershvuka nyu phi ntsen kehü gü Shallum nu zen kenthon. (Higwenkho ka tsügi le Jerusalem nyu ka keshün gü ki bin hü.)

¹⁵Tson-o tsügi le anyugun ka, “Israel nyu Npugü Sunggigü le hihontse zohü nyo, `Hagun nipe aka keshü gü ka zoshülo.”

¹⁶“Hire, Npugü le hihontse zohü nyo, raja le swü kelo lesü gü nyu thagwakemvu thu kenjü dan tsü khipe bin higü, lo hinyu keyhun nyu ge shüti.

¹⁷Kechamvule anyugun le akhe lao tharün kegwa rope tero kecha dan rüshvu, tson-o anyugun ben tho aphu pe anyu thyü nshvula, tsügenyu anyu kekhü le bin higü ntsun ti lo tsü le nmhü loho so.

¹⁸Ai Juda raja hagun nipe Npugü ketso lo tse keshü güka hihontse zoshülo, Israel Sunggigü le hihontse zohü nyo: Nle nyü kelo jo dan genyu le,

¹⁹ale bin higü lo hinyu keyhun nyu ntsun-o anyugun no nrun lati, lo swe tsü lati tse keshü nle nyü kelo ka, nnyu kenjün thyü, Npugü mhundyü nyu nthyü ketsenyu lo nphi sürhen-o amhundyü nyu chü kethyü genyu, ako nkehi nyülo laso, tse Npugü le zo.'”

²⁰Tsügenyu, hire, ale nkhipe npvübon nyu dan kishü lati, nno nnyu bwen-o siti, tson-o nno ale thagwakemvu aphu pe bin higü ge keshü hyu loho,” tsonshü Anyugun le jo sen raja gü ki raniryü.