Read Southern Rengma Naga 2 RAJANYU 23 Bible Online

2 RAJANYU 23 - Southern Rengma Naga bible

2 RAJANYU 23

¹Raja gü le Juda lo Jerusalem nyu pelü aphu ko pe a-kishülo.

²Tson-o raja gü le Juda temi, lo Jerusalem nyu keyhun nyu, püshükeda dan sidyükesha dan lo temi aphu zen_o Npugü ka ki nsin; a-le Npugü kanyu hyukelo kejozenkelo lesü gü nyu jo dan aphu swü pe anyugun no nyülo.

³Tson-o raja le kachon khoka solo njüo, Npugü mhundyü nyu a-jozen titse johoshü, a-nyun lo a-keyhun aphu sen-o Npugü tejvü lo a-johokeshü zen ti, lo lesü higü nyu thu kenjü kejozenkelo jo dan thyü zen titse zohoshü. Lo temi aphu kejozenkelo tsü then titse johoshü.

⁴Tson-o raja gü le püshükengun gü Hilkiah lo a-hensin püshükeda dan, lo khenpvü kekhwen dan no Npugü kershvuka nyu Baal, Asherah lo tsangge shyenyü dan genyu kanyü karun aphu sen chwi ryü lotse ahza hoshü; tson-o a-le Jerusalem ngwenzin Kidron nyu rola njüo a-jonbü khü pfüo Bethel ki gunla.

⁵Lo a-le tero kershvu püshükeda dan Juda nyida dan ka lo Jerusalem temhun tero kershvubin da dan ka tharün kegwa rolo tseo Juda raja dan le kejü keshü dan, tharün kegwa rope Baal, Yhüko, Shye lo Shyenyü dan tsü kehü dan aphu khe küla.

⁶Tson-o a-le Npugü kanyu tero Asherah men kezü sen chwiryüo Jerusalem nken gü Kidron ri seki rola njüo tsü jonshwe pe kenphü thyü lo-o shwe pe sika so ge shü la.

⁷Lo a-le kershvuka nyu pechenyu le pechenyu zen-o keyüla kehü ka dan tsü boren la, tsü nyu tsü tenunyu dan le Sherah tero kershvu phinya da hü.

⁸A-le Juda nyida dan ka Püshükeda nyu aphu zen gun ryü, tson-o püshükeda dan le tharün kegwa rope rüshvu kehü bin Geba ka gun gü Beersheba keti aphu bo nshvu la; lo khinrun ka tero kershvubin nyida gü nyu ahng Joshua le thyükeshü dan borenla, tsü le Nyida gü khinrun ngwazin bin.

⁹Tson yatse-e tero kershvu püshükeda dan tsü no Jerusalem nyu Npugü kershvubin ka ryü mvu, ai anyugun no püshükeda kecha nyu dan nyu kebu shü kemvu tensü tyü.

¹⁰A-le Hinnom nyenyu dan kazü ketejon ka tero kershvubin Topheth tsü nkela; temi nme no anyenyu peche nmvue, tenu rope tero Molech rüshvu mvu nrün genyu.

¹¹A-le Juda raja dan le keru thyü kenshün pe yhüko ketsü dan sen tinla, tson-o yhüko kerugari dan rola. (Hidan hi khipe kershvu kanyu keyü chonrha ka kedagü Nathan Melech ka khoka bin nzhü hü.)

¹²Ahaz ka so ge Juda raja dan le kershvubin thyü kebin dan, lo Manasseh le Npugü kershvuka mhun bin hvu ka kershvubin thyü kebin dan, a-le tsü rho pe borenla njüo a-nnyon khü pe Kidron ri ki shwela.

¹³Lo raja gü le Jerusalem yhüko kechwi kagü tesinzin Oliv Kazüthun keti Israel raja gü Solomon le Sidon tero kentsükenche gi Ashetoreth genyu, Moab nyu tero kentsükenche gü Chemosh genyu lo Amon nyu tero kentsükenche gü Milcom genyu kershvubn thyü kebin dan tsü nkela.

¹⁴A-le tso sen kenjü dan tsü borenla lo Asherah men kezü tsü duthü lao temi ru pe bin tsü kesü thyü la.

¹⁵Tsünyeki a-le Nebat nyugü Jerobom, Israel tsontsin pe no mukela gü le Bethel nyu kershvubin thyü keshü gü tsü sürho la, tson-o tso dan jonren pe kenphü thyülo, lo Asherah menkezü rola.

¹⁶Tson-o Josiah le ranishü laryü rinchothun gü ge sika le kebin hyulo, tsüselo a-le me nishüo no gü sika nyu temi ru jün senryü kershvubin ge ro-o tsü nrhula, tsü le Sunggigü temi gü le himhundyü nyu hi rüla Npugü jo nyu zokeshü hontse thyü pen la.

¹⁷Tsüselo a-le, “Ale hyukebin lile segü sika la?” Tsontsin nyida tsügü nyu temi dan le a-ka, “Tsüle Sunggigü temi Juda kipon ryüo Bethel nyu kershvubin gü ntsun-o thyükela dan hi rüla sidyü zokeshü gü sika le,” tsonshü.

¹⁸Tsontsin a-le, “A-no tson bin lo,temi nme a-ru dan bokela nya.” Tson-o anyugun le a-ru kesü mvuo, no Samaria nyu sidyükesha gü ru kho ka bin.

¹⁹Josiah le Samaria nyida dan ka, Israel raja dan tero kershvubin thyü pe Npugü nyu thyü nshvu kehü bin da ka kershvubin dan aphu boren küla, a-le Bethel nyu hontse kecha ki ko aphu ka tsühontse thyüla.

²⁰Lo a-le tero kershvubin da dan ka kershvubin tsü nyu rüshvu kehü püshükeda dan dushvula, tson-o temi ru pe tsü ge rolao Jerusalem ki rani ryüla.

²¹Tson-o raja gü le, “Kejozenkelo lesü higü nyu thu kenjü hontse Nkenkelo Nga thyü pe Npugü ki shülo,” tse ahza khipe temi aphu tsü shü.

²²Kechamvule kerathü dan, Israel lo Juda raja dan gwenkho ka Nkenkelo Nga thyü hümvu kela genyu.

²³Ai Josiah le raja thyükelo chen tseryüo tetse ka Jerusalem nyu nkenkelo nga no binlo.

²⁴Tsünyeki-e Josiah le püshükeda gü Hilkiah le Npugü kanyu hyukelo lesü gü nyu thu kenjü tejvü gü jo dan thyü zen lo nrün genyu Juda kazü lo Jerusalem nyu hyu kebin tero nyu zen kehü dan, temvü nyu, kanyu kebin teromen kezü dan, lo kentsükenchen teromen aphu khipe shwenla.

²⁵A-mhundyü raja nme-e a-hontse, a-nyu aphu, a-keyhun aphu lo a-kekvu aphu sen-o Mosa le tejvü khikeshü aphu then-o Npugü ki rani keryü ndi; lo a-siki-e a-hontse kethyü nme-e soryü mvu.

²⁶Tson yatse-e Npugü le Manasseh le a-nyu thyü nshvu pe Juda ge anyuntasa kela anyun kekhü nyu tsü ranilo mvu zun.

²⁷Tson-o Npugü le zo, “Ale Israel nke kela hontse amhundyü nyu Juda ko nke lati; lo ale kejükelo Jerusalem nyida higü, lo ale azan no tsünyu bin ti tse zokeshü ka gü khe lati.”

²⁸Josiah tha kecha dan lo a-le thyükeshü aphu, tsü le Juda raja dan rüla kethu lesü nyu bin mvu ole?

²⁹A-gwenkho ka Ijipt raja Faroah Neco le Assiria raja kecheo Eufrates züri nyu gü; lo raja Josia le a-teno titse gü ntsin Faroah Neco le Megiddo ka a-hyulo-o adushvula.

³⁰Tson-o a-gonyu dan le Negguddi nyu kerugari nme ka simin pfüryüo Jerusalem nyu a-npvü a-sika nyu sunla. Lo Juda temi dan le Josia nyugü Jehoahaz zen gü terzü pe a-yün pe a-pvü sunka raja thyü.

³¹Jehoahaz le a-keyhun chen nki kenshen ka raja thyülo, lo a-le Jerusalem nyu shye shen raja thyü. A-jvü le Libna rünyi nyu Jeremiah nyugi Hamutal.

³²A-le a-pvübon nyu hontse Npugü mhundyü nyu nyu le gwamvu yo tsü aphu thyü.

³³Lo Faroah Neco le a-no Jerusalem nyu raja thyü mvu nrün genyu a-ten pe Hamath kazü Riblah nyu dothyü la, tson-o Juda no rakagi talent tsi me lo suna talent nme tse pe khajana shü.

³⁴Tson-o Faroah Neco le Josiah nyugü Eliakim pe a-pvü bin ka raja thyüla njüo a-zan kelu pe Jehoi-akim thyüla. Ai Jehoahaz zen tinla, tson-o a-le Ijipt ki ryüo, tsüki sila.

³⁵Jehoiakim le Faroah le hikeshü pisa sen mvulo keshvu kho fülo nrün genyu temi dan kebin kendi rüchün-o khajana shvu.

³⁶Jehoiakim le a-keyhun chen nki pvün ka Juda raja thyülo, lo a-le chen tseryü nme Jerusalem nyu raja thyü. A-jvü le Rumah nyu Pedaiah nyugi Zebidah.

³⁷Lo a-le a-pvübon nyu hontse nyu le Npugü mhundyü nyu gwamvu yo tsüthyü.