Read Southern Rengma Naga 2 RAJANYU 24 Bible Online

2 RAJANYU 24 - Southern Rengma Naga bible

2 RAJANYU 24

¹A-gwenkho ka Babilon raja Nebuchadnezzar le ryü Juda hü, tson-o chen shen Jehoiakim le a-go thyü tseo a-ntsun sola.

²Npugü le a-gonyu sidyükesha dan mün nyu zokeshü hontse Chaldean nyu, Siria nyu, Moab nyu lo Amor nyu rihü dan nishüo no Juda ntsun-o nkela.

³Ketsin hile aphu Manasseh kemu genyu Npugü le a-mhundyü nyu anyugun khi pe shwela titseo nikeshü,

⁴kechamvule a-le kemu kendi nyu dushvu pe a-zi no Jerusalem kesü thyü kela genyu Npugü le a-kemu jüshü mvula.

⁵Jehoiakim tha kecha dan, a-le thyükeshü aphu, tsü dan tsü Juda raja dan rüla kethu lesü nyu thu bin mvu ole?

⁶Tson-o Jehoiakim le a-pvübon nyu hontse sila, lo anyugü Jehoiachin le a-sunka raja thyü lo.

⁷Lo Ijipt raja le a-kazü nken ni chwiryü mvula, kechamvule Babilon raja gü le Ijipt raja hon Ijipt züri ka gun gü Eufrates ri keti khilo kela genyu.

⁸Jehoiachin le a-keyhun chen tseryüo tetse ka raja thyülo, lo a-le shye shen Jerusalem nyu raja thyü. A-jvü ale Jerusalem nyu Elnathan nyugi Nehushta.

⁹Lo a-le a-pvü hontse Npugü mhundyü nyu nyu le gwamvu yo tsü aphu thyü.

¹⁰Tsügwenkho ka Nebuchadnezzar gonyu dan le Jerusalem ki nsin ryüo, nyida tsügü hunpfü lola.

¹¹Tson-o Babilon raja Nebuchadnezzar le a-temi dan le nyida gü hunpfü kebin ka tsü nyu ryü.;

¹²tsüka Juda raja Jehoiachin le a-jvü, a-gonyu, a-nyenyu lo a-raja bin nyu kedanyu dan tse zen-o Babilon raja hensin yüla. Babilon raja gü le raja thyü kelo chen tetse ka a-ten pe dothyü lola,

¹³tson-o Npugü kanyu, lo raja gü kanyu kebin kenya aphu pfü tinla, Npugü le zo pe bin kenjü hontse, Solomon le thyükeshü Npugü kershvuka gü nyu suna pe kethyü khun-honpen tsü aphu boren la.

¹⁴Lo a-le Jerusalem nyu raja tsipwen dan, lo teri kekvu kepeche temi tse yie tseryü tenzen tinla, lo tha thyükesha nyu lo tegi kecha nyu dan ko aphu zen tinla; rhokedyü tsin nyu nyeki temi kecha kheshü mvula.

¹⁵Lo a-le Jerusalem nyu raja Jehoiachin, a-jvü, anunyu dan, a-hensin ka keda nyu dan, lo a-kazü nyu temi kentsen dan tenzen-o Babilon ki gunla.

¹⁶Babilon raja le temi kepeche yietsenyü, lo thathyükesha tegi kecha nyu yie me, tsü aphu nko nki lo teri thyülo kegwa tenzen-o Babilon ki ryüla.

¹⁷Tson-o Babilon raja gü le Jehoiachin a-nyo Mattaniah zan thokela pe Zedekiah thyülo-o pe Jehoiachin sunka Juda raja thyüla.

¹⁸Zedekiah le a-keyhun chen nki nme ka Juda raja thyülo, lo a-le Jerusalem nyu chen tseryü nme raja thyü. A-jvü le Libnah temi Jeremiah nyugi Hamutal.

¹⁹A-le Jehoiachin tho hontse Npugü mhundyü nyu nyu le gwamvu yo tsü aphu thyü.

²⁰Kechamvule Npugü ale a-nyunta kela gü genyu a-mhundyü nyu Jerusalem lo Juda khipe shwenla nrün a gwenkho gü le ryü la. Tson-o Zedekiah le Babilon raja ntsun sola.