Read Southern Rengma Naga 2 RAJANYU 25 Bible Online

2 RAJANYU 25 - Southern Rengma Naga bible

2 RAJANYU 25

¹Tsontseo a-le raja thyükelo chen tekü ka shye tseryü gü jon ryünyü Babilon raja Nebuchadnezzar le a-rihü dan aphu zen gun ryüo Jerusalem ntsun-o tsü hunpfü lola; tson-o anyugun le chwida khwen pe tsü hun kenthün lola.

²Tson-o nyida gü hunpfü bin-o raja Zedekiah le chen tseryü nme kela ti.

³Lo shye zi gü jon tekü nyü tsü nyida temi dan genyu ketyüketsü ndio chenda thyüsa lola.

⁴Tsüselo Chaldean nyule nyida gü hunpfü bin-e chwida pfüpheo raja gü lo teri temi dan aphu khejenyu raja gü chwinyu tse sen-o chwida hvu janyu khinrun then chwio Arabah kentsun kipon gunla.

⁵Ai Chaldean nyu rihü dan le anyugun hü gun gü Jericho ketejon nyu a-ten lola; tsontsin a-rihü dan le aphu nren nru tinla.

⁶Tsüselo anyugun le a-zen-o Riblah ka Babilon raja kiryüo tsügü le a-genyu jo pen shü.

⁷Anyugun le Zedekiah yhühyu ka a-nyu dan dushvula lo Zedekiah yhütyü tseritho lao ron pe a-phinlo-o zen Babilon ki gunla.

⁸Lo Nebuchadnezzar le Babilon raja thyükelo chen tseryüo tekü shyepvün gü jontsenyü nyü raja gü go, raja khwen kehü tsiso kedagü Nebuzaradan le Jerusalem nyu ryü.

⁹Tson-o a-le Npugü ka gü, raja ka lo Jerusalem nyu temi a-zenkentsen nyu ka aphu ro küla.

¹⁰Lo Chaldean nyu rihü tsiso kedagü zen kehü dan le aphu Jerusalem kehun chwida gütsü bola la.

¹¹Tson-o rikhun tsiso kedagü Nebuzaradan le nyida gü nyu khe kenjü temi dan lo Babilon raja dothyü tin kela dan kesin temi danda zen tinla.

¹²Ai rikhun tsiso kedagü le rhokedyütsin nyu peha no vain low shwi lo lowtsü nrün genyu khela.

¹³Lo Npugü kanyu kebin lazo pe kethyü kachon dan lo lazo zükhin keda gü kerhun dan, Chaldean nyu le boren boryü lao pfüo Babilon ki gunla.

¹⁴Lo anyugun le la kekhinchen, ketsevü, tharün kegwa lo keshü khun lo lazo pe kethyü kershvu kanyu kesen thakhin dan,

¹⁵mahkhun lo khun dan sen tinla. Rikhun tsiso kedagü le suna nmvue rakagi pe kethyü khun, mahketsevü, lo mahgi pen kehü dan-e sin-o sen tinla.

¹⁶Kachon kenyhun, zükhin kedagü, lo a-kerhunbin Solomon le Npugü ka genyu lazo pe thyükeshü hile nsuri tsin-o a-kensu dikho yo shamvu.

¹⁷Kachon nme le a-ketetso le tsu tseryüo tetse lo tsü soge lazo pe kethyü kachon pe kesen pe sin; pekesen a-ketetso le tsushen; lazo pe kheratyüsha zü pe a-pekesen tsü hun. Kachon kenyhun gü ko tsü hontse thyü.

¹⁸Tson-o rikhun tsiso kedagü le püshükengun gü Seraiah, tsüsika Zephaniah lo khenpvü kekhwen mishen tse zen tinla.

¹⁹Lo nyida günyu teri temi dan so kedagü, lo raja mhundyü nyu bin kehü temi mipvün; lo rihü dan so kedagü kethugü, rihü dan rüla thu njü kehü gü; lo temi a-zankentsen nyu kecha temi hentsero hyulo-o tsüdan tenzen tinla.

²⁰Rikhun tsiso kedagü Nebuzaradan le anyugun zenryü Riblah nyu Babilon raja kashü.

²¹Tson-o Hamath kazü Riblah ka Babilon raja gü le anyugun vüo anyugun dushvula. Tsü hontse Juda temi dan tenzen-o me kazü kecha ki gunla.

²²Babilon raja Nebuchadnezzar le Shaphan nyu Ahikam nyugü Gedaliah kejü pe no Juda temi khe pe rünyi nyu shükela dan so Ahng thyü.

²³Lo teri temi tsiso keda dan lo anyugun temi lojvü ki kehü dan le Babilon raja le Gedaliah khi pe Ahng thyü kela rüla nyü kelo ka anyugun temi zen-o Mizpah ka Gedaliah ki ryü, anyugun zan le Nethaniah nyugü Ishmael, Kareah nyugü Johanan, Netophah rünyi nyu Tanhumeth nyugü Seraiah lo Maacathite nyugü Ja-azaniah.

²⁴Tsontsin Gedaliah le swen-o anyugun ka, “Chaldean nyu kedanyu dan genyu hagun nshvunyalo; rünyi nyu yhun-o Babilon raja gü lothyü kebin gü le hagun genyu gwati.”

²⁵Ai shye tsenyü gü ka Elushama nyu Nethaniah nyugü Ishmael raja tsipwen nme le temi mi tseryü zenryüo Mizpah ka Gedaliah wheo dushvula, lo Juda nyu lo Chaldean nyu temi a-zen kehü dan ko dushvula.

²⁶Tson-o anyugun temi keshe keda aphu lo rihü dan so kedanyu-e sin tse Ijipt ki gunla; kechamvule anyugun le Chaldean nyu n shvu kela genyu.

²⁷Lo Juda raja Jehoiachin le me kazü ki dothyü kebin chen shenryüo tsenyü, shyetseryü kenyhun, jon nkio tsenyü nyü Babilon raja Evil-merodach le raja thyü kelo chen Juda raja Jehoiachin shwinjün-o donyu a-hoshü.

²⁸Lo a-shwinjün a-nthon-o a-khipe raja kecha a-zen-o Babilon nyu kebin dan so shüshü.

²⁹Tson-o Jehoiachin le a-dokethyü phinya sen mvula. Lo khenyütsen raja miz ge tyütsü tinla.

³⁰A-le yhun kebin then raja gü le khenyütsen a-genyu mvulo keshvu pe a-tsü.