Read Southern Rengma Naga 2 RAJANYU 3 Bible Online

2 RAJANYU 3 - Southern Rengma Naga bible

2 RAJANYU 3

¹Jehoshafat le Juda raja thyü kelo chen tseryüo tetse ka, Ahab nyugü Joram le Samaria nyu Israel so raja thyülo, a-le chen tseryü kenyhun raja thyü.

²A-le Npugü mhundyü nyu mula; ai gwamvu pe a-pvü lo a-jvü au hontse lamvu, a-le a-pvü le Baal kershvu genyu thyü keshü teromen gü rhola.

³Tson-e a-le Nebat nyugü Jeroboam hontse Israel nyu tsontsin pe no kemu thyü, lo a-le tsünyu ranilo mvu la.

⁴Moab raja gü Mesha le tanyü nkin hü; a-le chen me ka tanyü lak nme lo tanyü tse lak nme hü tse pe Israel raja gü khajana shü hü.

⁵Ahab le sikela siki Moab raja gü le Israel raja gü ntsun sola.

⁶Tsügenyu raja gü Joram le Samaria nyu chwiryüo Israel nyu aphu ko kequenlo.

⁷Lo a-le me nipe Juda raja gü Jehoshafat ki shüo a-ka; “Moab raja gü le a ntsun soryü laso; tsügenyu nle azen gü Moab nyu zen terithyü tile nmvula?” tsonshü. Tsontsin raja gü Jehoshaphat le, “Gü tile, nnyile keme, a temi le n temi lo a keru le n keru hontse le.

⁸Nnyi digü tson chwi tila?” tson ketsoshü. Joram le, “Edom tehen tson gü then gun tile,” tsonshü.

⁹Tson-o Israel raja gü le Juda raja lo Edom raja au zen gun. Lo jon tsenyü anyugun le tsonchüo hun kegun ka rihü dan nmvue anyugun then kehü nyukhu dan genyu-e zü ndila.

¹⁰Tsontsin Israel raja gü le, “Aya! Npugü le raja mishen hidan ko kequen pe Moab nyu ben nyu shüla tiso,” tson sola.

¹¹Tsüselo Jehoshafat le, “Ngun le a-ka Npugü ketsolo kegwa Npugü sidyükeshanyu nme hika ndi ole?” tson shün shü. Tsüka Israel raja gü gonyu nme le a-ka, “Shafat nyu Elisha le hika bin nle, a-le Elijah keche gunryü,” tsonshü.

¹²Tsontsin Jehoshafat le, “A-le sidyükeshanyu ketsin nme le.” Tson-o anyugun raja mishen le Elisha ki nshe.

¹³Tsüka Elisha le Israel raja gü ka, “Ale nzen-o nyuthyü tila? Gü npvü njvü au le nthon kehü sidyükeshanyu dan nthon lochü,” tsonshü. Ai Israel raja gü le a-jokenio, “Nmvu le, Npugü le raja mishen hidan ko kequen pe Moab nyu ben nyu shü güjü laso.”

¹⁴Tsontsin Elisha le, “Danda dan Npugü, ale a-lothyü kehü gü le rhün kehü hontse, ale Juda raja Jehoshafat kerühvu genyu ame ale nnrishü nmvue nhyu kemvui le.

¹⁵Ai lü kethyü nyu nme zen aki ryülo,” tsonshü. Lü kethyü gü le lükhin sen-o lüthyü shü ntsin Npugü kekvu le Elisha ge ryüla,

¹⁶tsüselo a-le, “Npugü le hihontse zohü nyo, ‘Züzhie kesin hi aphu nyu kü tso shülo.

¹⁷Hagun le tsangkenri nmvue tsangkenbu hyumvu yatse-e zü le züzhie sü lati, tson-o hagun, lo nyukhu dan lo tehen thyü dan no tsüti.’ ”

¹⁸“Hile Npugü mhundyü nyu tha kenne nme; a-le Moab nyu ko khipe hagun ben nyu shü lati.

¹⁹Tson-o chwida khwen pe hun kebin nyida kezegwa dan aphu hagun le lolo lati, lo senbin kegwa dan aphu phünla, tso khipe zü kenthün bin dan lo kazü kegwa dan aphu lvü lati.”

²⁰Tsü sinyü, lonyü kershvu gwünkho ka Edom denzin zü le tsun tsüryüo kazü tsünyu kesü kela thyüla.

²¹Moab nyu le raja kenshen le anyugun zen terithyü titse ryükela shalo-o, pechenyu teri kanyü senlo kegwa püshütsin ka tsügü nchetsin keti ko kequenlo, tson-o chwiryü terhi nyu binlo.

²²Moab nyu dan le lonyü so ryü ntsin, yhüko le zü shwe kebin shwi pe tezi hontsela.

²³Tsüselo anyugun le, “Hile tezi so,raja dan le anyugun dan nyu kegao khinyunyu kedushvu la tsentsü so. Tsügenyu gü anyugun hon dan khilo tinu!” tsonso.

²⁴Ai anyugun le ryü Israel dan kebin bin tilo ntsin, Israel nyu dan le anyugun hü pe ranila. Lo anyugun hüo anyu dushvu küla.

²⁵Anyugun nyida dan boren küla, tson-o anyugun le kazü kegwa nme pfüthü tin kejü ka Israel nyu nme me tse tso shwe pe tsü süla kemvuthen shüla; zü kenthün bin dan khinla lo senbin kegwa dan aphu phün la; Kir Hareseth rünyi nyida gü nti pe kenkhin thyüo tso kezevü kepen nyu dan no tsü hun lo njüo whe so.

²⁶Moab nyu raja gü le a-le terinyu me jonho bin kela shalo njüo, zhethon kepen temi tsitsenyü zen lo-o Edom raja gü kentsun kipon chwikela nda so ai thyülo mvula.

²⁷Tsüselo a-le anyu rigü a-sika raja thyü nrün gü khipe chwida ge rope kershvu thyüshü. Israel nyu dan le tsü shwi nshvu lao nyida tsü nyu ranio anyugun kazü ki ryüla.