Read Southern Rengma Naga 2 RAJANYU 4 Bible Online

2 RAJANYU 4 - Southern Rengma Naga bible

2 RAJANYU 4

¹Sidyükeshanyu nme nu le ryüo Elisha ka, “Kedagü, a nyepvü le sila so! A-le Sunggigü she nshvu kehü nyu nme tse kethyü nle shabin nyo, ai ale a-pu pvü kebin gü le anyu hvu ten pe a-do thyü lola titseo ryü laso,” tsonshü.

²Tsontsin Elisha le a-ka, “Ano n genyu nyuthyü shü mon? Nkanyu nyu le bin yo aka zoshülo?” Tsontsin tsügi le a-ka, “Ngogi kanyu thame ndi, terzü laki nme nti le kebin gwünzin le,” tsonshü.

³Elisha le a-ka, “Gü nka jon nyu hon thakhin kenrun kechon tepu lolo.”

⁴“Lo nnyu dan zen kanyu yülo njüo kakhin lola, tson-o terzü ja pe thakhin aphu ka shüo sülo kela nyu khipe kecha thyü lola tselo,” tsonshü.

⁵Tsüselo tenugi le anyu hvu zen a-ka ki gun gü kakhinlo njüo anyu hvu le thakhin sen ryülo a-le terzü ja pe shü tsebin.

⁶Thakhin dan süla ntsin, a-le a-nyu ka, thakhin kecha sen niryülo tseshü, tsüka anyu güle thakhin kecha ndila sele tson shü ntsin tsun chwiryü mvula.

⁷Tsügi le gü Sunggigü temi güka zoshü, tsontsin a-le, “Gü terzü gü tsü jwe pe npu dan tha lalo, lo nnyu hvu hagun le a-sen tsü sen-o yhun lolo,” tsonshü.

⁸Khenyüme Elisha le Shunem nyu gun, tsünyu tenunyu kenya nyu nme le bin hü. Tsügi le a-no ryü tyütsü lotse ako tenge shü. Tsügenyu a-le tsütson ryülo tsüka tyütsü lolo tsehü.

⁹Tenu tsügi le a-nyepvü ka, “Ngun tson nyu pfüthü zin kehü gü hile Sunggigü temi kenshün nme tse kethyü ale sha tsentsü laso.

¹⁰Tsügenyu ngun kabon nchün-o katsen keshe nme thyülo-o, no nme, miz nme, khün nme lo makenben-i nme tse pe shü njüo a-le ryülo no tsünyu bin lolo tselo,” tsonshü.

¹¹Khenyüme a-le tsünyu ryüo katsen tsünyu sun ryüyü bin.

¹²Tsüka Elisha le a-gogü Gehezi koshüo, “Shunem nyu tenugi ko shülo,” tseshü. Tson-o tsügi koshüo tsügi le ryü a-mhundyü nyu solo,

¹³Elisha le Gehezi ka, “Tenu higi le nnyi genyu mvulo keshvu hi aphu nda nron keshü, genyu ano agenyu nyu thyüshü tiyo. Ano raja güka nmvue rihü dan sokeda güka a-genyu jokegwa zoshü nyübin le yo ketso shülo,” tsonshü. Tsontsin tsügi le, “Ale a npvü atemi dan nyu hü nyo,” tsonla.

¹⁴Elisha le Gehezi ka, “Ale a-genyu nyuthyü shülo gwa tila?” Tsüka Gehezi le, “A-le anyu ndi lo anyepvü le then laso,” tson shü.

¹⁵Elisha le a-ko shülo tsonshüo a-le gü tsügi ko keshü ka tsügi le ryüo khenpvü ka solo,

¹⁶lo Elisha le a-ka, “Tekenki higwünkho ka nle pechenyu nme pen loti,” tsonshü. Tsontsin tsügi le, “Nmvu, a npugü, Sunggigü temi gü ngogi sa nya lo,” tsonla.

¹⁷Elisha le zokeshü hontse tekenche tsügwünkho ka a-le pechenyu nme nnyulo.

¹⁸Ntsenyu gü le po soryülo ntsin, khenyüme a-pvü le logvü nyu dan zen_o low ki kehü a-le a-pvü khoki gü.

¹⁹Tsüka a-le, “Aya, ape, ape!” tson-o a-pvü koshü. Lo a-pvü le gonyu nme ka, “A khipvü gü a-jvü kishü lalo,” tsonshü.

²⁰Tson-o tsügü le a-pvü ryü a-jvü tsüshü, ntsenyu güle a-jvü dinka duntse njüo hokho sika sila.

²¹Tsüselo a-le anyugü pen gü Sunggigü temi gü no ge nzhü la njüo ka khin pe khin lao chwila.

²²Tson-o a-le a nyepvü koshüo a-ka, “Ano Sunggigü temi gü ki güo rani nmhe ryüla nrün genyu gonyu nme lo gada nme nipe atsü shülo,” tsonshü.

²³Tsontsin a-le, “Nthu le shyekeshün nmvue Sabbath jon-e kemvu le, nle nyuthyü gü mon?” tsonshü. Tsügi le a-ka, “Kegwa genyu le,” tsonla.

²⁴Tson-o a-le gada ge külo-o a-gogü ka, “Gada no nmhelo kegwa then nmhelo, lo ale nka zoshü kemvu we nyajü nya.”

²⁵Tson-o a-le tson chüo Sunggigü temi gü le kebin Karmel kazüthun ge ryü. Elisha le a-le ryü kejü nithen ki kehü ka hyushüo a-gogü Gehezi ka, “Li Shunem nyu tenugi le ryü jünyo!

²⁶Whütse gü a-teno-o a-le, a-nyepvü lo anyugü aphu gwabin le mvuyo ketso shülo,” tsonshü. Tsügi le Gehezi ka aphu gwa kü bin nle tsela,

²⁷Ai a-le ryü kazüthun ge Sunggigü temi gü tilo ntsin a-mhundyü nyu nkhün tsügü apha sü pen lola. Gehezi le ryüo tsügi chen pe shwela titse so, ai Elisha le, “A-no a-keshathyü, kechamvule a-le a-nyu kenjün thyüsa bin nyo lo Npugü le tsü pe aka zoshü mvuo akebu laso,” tsonshü.

²⁸Tsüselo tsügi le, “Ale a npugü ka pechenyu nme pe atsülo tse hi ole?” A sanyalo tse ale zomvu ole?” tson sola.

²⁹Elisha le Gehezi ka, “N senphin lo njüo athün sen-o whütse gülo. Keshanyu laka me teno ai kelu nya, lo me le nkelushü ai a-jokeni ninya; tson-o gü athün pe ntsenyu gü mhun ge shüshü lo.”

³⁰Ntsenyu gü a-jvü le Elisha ka zo, “Npugü le rhün kehü, lo nle rhün kehü hontse, ale nkheshü loho,” tsonla. Tsügenyu a-le so-o tsügi sithen gun.

³¹Gehezi le gun gü thün gü pe ntsenyu gü mhun ge shüshü, ai thakhwen nmvue kerhün le kebin zansü nme-e ndi. Tsügenyu rani ryüo Elisha teno-o a-ka, “Ntsenyu gü le soryü mvule,” tsonshü.

³²Elisha le ka gü nyu ryüo ntsenyu gü le silao pe a-no ge nzhü kebin hyulo.

³³Tsügenyu a-le kanyu yügü ka khinlo njüo Npugü ka kehi thyüshü.

³⁴Tson-o ntsenyu gü soge zhüo a-mün pe ntsenyu gü mün rünlo, a-yhütyü pe a-yhütyü rünlo lo a-ben hvu pe a-ben so mitse laryü ntsenyu gü thyü le nyenchwiryü lo.

³⁵A-le so-o kanyu nsin nshe gwashüo nigü ntsenyu gü so zhü nishü. tsontsin ntsenyu gü le gwen tsenyü ge nti shüo a-yhüko chwiryüla.

³⁶Tsüselo a-le Gehezi no Shunem nyu tenugi koshü lotse zoshü. Tson-o tsügi le ryü laryü a-le, “Nnyu gü zenlo lo,” tsonshü.

³⁷Tsontsin tsügi le Elisha phaka nkhün tsügü kazü rün shüo a-nyugü pen lo-o chwila.

³⁸Kazü gü nyu chenda thyü kebin ka, Elisha le Gilgal nyu niryü. Sidyükeshanyu dan le a-mhundyü ka dun bin, a-le a-gogü no, la kedagü sushüo sidyükeshanyu dan genyu bon nilo lo, tse zoshü.

³⁹Tsüka anyugun dan nyu temi nme le hen den titse low ki tsügü tsunja yhun hyulo-o benthün gwa den senryüo tsüle nyu yo shamvutse duketso pe henla nyu shüla.

⁴⁰Tson-o anyugun le temi dan no tyü lotse kinshü. Ai anyugun le hentsü ntsin shüo nrao, “O Sunggigü temi gü la gü nyu terün le bin laso!” Tsügenyu anyugun le tsü tyü loshvu la.

⁴¹Tsüselo Elisha le ketyüketsü tsü peha hishüo, tsü shwe pe la gü nyu shü shüo zo, “Temi dan no tyü nrün genyu kin shwilo,” tsonshü. Tsontsin la gü nyu ngwen kenshvu thame ndila.

⁴²Baal shalishah nyu temi nme le low nsha keri shye pe tensü kethyü pon nki lo tsenshün shye tse pfü ryüo Sungggü temi gü tsüshü.“ Lo Elisha le khipe temi dan tsüshüo anyugun no tyü lolo,” tsonshü,

⁴³ai a-gogü le, “Dihontse ano hi khipe temi tsime mhundyü ka shü mon?” Tsontsin a-le zonio, “Khipe temi dan tsüshüo no tyü lolo, kechamvule Npugü le hihontse zohü nyo, “Anyugun le tyü loti, lo peha tyü nsen lati,” tsonshü.

⁴⁴Tsügenyu a-le khipe anyugun mhundyü nyu shüshü. Lo Npugü jo le kezo hontse anyugun le tyülo lo peha nsen la.