Read Southern Rengma Naga 2 RAJANYU 6 Bible Online

2 RAJANYU 6 - Southern Rengma Naga bible

2 RAJANYU 6

¹Khenyüme, Elisha le shwikehü sidyükeshanyu nyenyu dan le a-ka, “Agun genyu ka le nrün rila sele!

²Tsügenyu agun no Jordan ki nshe gü pelü nme no sen nme me pen ryü ka thyüo tsüki bin logwa le nmvula,” tsonshü. Lo a-le “Gülo,” tsonshü.

³Tsontsin anyugun dan nyu nme le a-no anyugun zen gü lo tse shü; lo a-le gü ti tson-o,

⁴anyugun zen kengü gü. Anyugun le ryü Jordan tilo ntsin sen phen so.

⁵Ai temi nme le sen phen bin laryü a-nri le ntho-o zü nyu chela, tsüselo a-le nrao, “Aya, senkethyü gü! Tsü le me hon tepu sen kehü laryü,” tsonso.

⁶Tsüka Sungggü temi gü le, “Dika chela ola?” Tson-o a-bin tsinshü ntsin, a-le sen nme gwenlo njüo shwe pe tsünyu shüshüo nri gü no zü so phun chwiryü.

⁷Tsüselo a-le, “Khi lolo,” tse ahza hoshü ntsin temi gü le nkhün tsü gü khi so lola.

⁸Siria nyu raja le Israel nyu zen terithyü. A-le a-hensin nyu kedanyu dan zen kenthon-o a-kensenbin thyü nrün bin kejülo.

⁹Ai Sunggigü temi gü le jolo nipe Israel raja gü ki shüo a-ka, bin tsüzin gümvu nrün genyu petsülo, kechamvule Siria nyu le tsü kipon nshela sele,tsonshü.

¹⁰Tson-o Israel raja gü le tsünyu keyhun temi dan no gwen ndalo lo tse zoshüo anyugun le rikhun lola. Hihontse gwenhvu shen la.

¹¹Higenyu Siria raja gü le a-kevü sala, tson-o a-le a-hensin kedanyu dan ko kequen shüo anyugun ka, “Ngun dan nyu segü le Israel raja gü kipon yo zope ahishü tile nmvula?” tsonso.

¹²Tsüka a-gonyu nme le a-ka, “A npugü O raja; temi nme kemvu; ai Israel nyu kebin sidyükesha gü Elisha, nle nzhütsen ki kezo jo dan pe Israel raja gü ka zoshüla la tse hü nle.”

¹³Tsüselo a-le, “Me nishüo a-tenlo la nrün genyu gü a-le dika hüyo shwishülo.” Tsontsin me le a-ka, “A-le Dothan nyu hü nle,” tsonshü.

¹⁴Tsüselo a-le keru, kerugari lo rihü danda nme nishü; lo tsüdan le kheje nyu ryüo nyida tsügü hunpfü lola.

¹⁵Sunggigü temi gü gogü le lonyü nshwe soryüo chwi gü rihü dan me le keru lo kerugari dan zen-o nyida gü hunpfü kebin hyushü. Tson-o rani gü, “Aya, senkethyü gü nnyi nyuthyü ti sela?” tsonshü.

¹⁶Tsontsin a-le, “Nshvu nyalo, kechamvule nnyi kipon kehü dan le anyu kipon kehü dan nyeki chon kvu le.”

¹⁷Tson-o Elisha le kehi thyüo, “O Npugü a-no hyulo nrün genyu a-yhü khinshe shülo,” tsonshü. Npugü le ponyu gü yhütyü khinshe shüo a-no keru lo mah kerugari le kazüthun gü süo Elisha hunpfü kebin hyulo.

¹⁸Siria nyu dan le a-whe ryü ntsin Elisha le Npugü ka, “Temi hidan yhütyü no thahyu nyala lo,” tse kehi thyü shü. Tsügenyu a-kehi hontse a-le anyugun yhütyü no thahyu mvula.

¹⁹Lo Elisha le anyugun ka, “Tson le higü hi kemvu, lo nyida gü-e himvu; asithen lo re, ale hagun zen gü hagun le fü kehü gü ki shü tile.” Tson-o a-le anyugun zen gü Samaria ki shü la.

²⁰Anyugun le Samaria nyu yülo ntsin, Elisha le, “O Npugü nle temi hidan yhü khinshe shüo anyugun no tha hyulo lo,” tse shü. Tson-o Npugü le anyugun yhütyü khinshe shü laryü anyugun le Samaria nyu dan nyu kebin hyulo.

²¹Israel raja gü le anyugun hyushüo Elisha ka, “Apvü, ano anyugun dushvula tile? Ano anyugun dushvula tile?” tsonso.

²²A-le, “Nle anyugun dushvulo nrün ndi. Nle nzhethon lo nlevü sen-o ten kelonyu dushvu lahü ole? Ketyüketsü senryü tsüshüo anyugun no tyütsü lo-o anyugun npugü ki gun lalo,” tsonshü.

²³Tson-o a-le anyugun genyu keho keda nme ndashü; lo anyugun le tyütsü kelo siki a-le anyugun nishüla, tson-o anyu npugü ki gunla. Tsü gerho Siria nyu le Israel nyu hü niryü mvula.

²⁴Tsüsika Siria raja gü Benhadad le rihü dan aphu ko kequen lo-o nsin gü Samaria hunpfülo la.

²⁵Anyugun le hunpfülo kela genyu Samaria nyu chenda thyü sala, gada pe nme le shekel hentetse lo paro vü gram 250 le shekel pvün ka jwe sola.

²⁶Israel raja gü le chwida so ge pfüthü gü zhü ntsi, tenunyu nme le nrao a-ka, “Acheshülo, a npugü, O raja,”tsonshü.

²⁷Tsüselo a-le, “Npugü le ncheshü mvu yatselo ale nyu pe nkeche lo mon? Ale shye nmvue vain zü le bin ole?

²⁸Tson-o raja gü le a-ka, “Nthyülo keshvu le nyu ola?” Tsontsin a-le, “Tenunyu higi le aka, nnyu khishüo ngun nthu tyü tseo senduki ngun anyu tyü tile.

²⁹Tson-o agun anyu nityü la. Lo tsüsinyü ale a-ka, nnyu khishüo ngun tyüta tseshü; ai a-le a-nyu kebu lale,” tsonso.

³⁰Raja gü le tenunyu tsügi jo nyü lo-o a-phi sürhen la, tson-o a-le chwida so ge pfüthü gun kejü ka a-le ronphi pe aphisin thyü ben kehü chwida khoka kehü temi dan le hyu shü.

³¹Lo a-le, “Nthu Shafat nyugü Elisha pe no a-ge bin yatselo Npugü no adushvula lo,” tsonshü.

³²Elisha le a-kanyu bin lo püshünyu dan le a-zen-o dun bin. Raja gü le a-mhundyü nyu temi nme nishü la; ai lilo gü le ryü tilo kemvu ka, Elisha le püshü nyu dan ka, “Me dukeshvu nyu higü hile ape gwen la lotse me nishü laso, shwibin-o lilo gü le ryülo a-no yüryü mvu nrün genyu kakhin ryü lola lo. Raja gü le a-npvü tsügü sika hü nyo.”

³³Lo a-le zothü lo kemvu ka raja gü le a-npvü nshe ryüo a-ka, “Kenjün kethyü higü hile Npugü kanyu le! Ale nyuthyüo Npugü khwesin bin tila?”