Read Southern Rengma Naga 2 RAJANYU 7 Bible Online

2 RAJANYU 7 - Southern Rengma Naga bible

2 RAJANYU 7

¹Ai Elisha le zo, “Npugü jo nyülo lo, senduki hi gwenkho ka Samaria khinrun ka tho kegwatsin rokhu nme le shekel nme lo thoshe rokhu kenyhun le shekel nme ka jwe ti tse Npugü le zohü nyo.” tsonshü.

²Tsontsin raja khwen kehü tsiso kedagü le, Sunggigü temi gü ka, “Npugü le a-npvü tsangge kafüphe dan thyü shü yatselo tsonlo gwa ti ole?” Elisha le, “N npvü nyhütyü le tsü hyu ti ai nle tsü tyü loho,” tsonla.

³Khinrun ngwenzin nyu le ketyü nyu mizi le hü, lo anyugun le khinyu nyu ka, “Ngun nyuthyü hika dun-o kesi khwe bin mon?

⁴Ngun le nyida günyu yü titse-e chenda le tsünyu bin nyo, tsügenyu sikelai; lo hika dun bin-e sikelai so.Tsügenyu je, ngun Siria nyu kamp ki gü tile; anyugun le n nrho shülo ngun le rhünlo tiso nmvu yatselo ndushvula da a-kesha thyü.”

⁵Tson-o anyugun le kheje nyu so-o Siria nyu kesenbin ki gü, laryü temi nme-e tsüka kendi hyulo.

⁶Kechamvule Npugü le Siria nyu rihü dan no rihü danda le keru lo kerugari sen-o tson chü kehü khwenyülo, tson-o anyugun le Israel raja le Hit lo Ijipt nyu raja lo rihü dan zen-o anyugun whe ryü zhü la sele tse rüchün la.

⁷Tsügenyu anyugun phika dan, keru dan, gada dan lo kamp ai tsü gwenzin khelao anyugun keyhun ntsenlo nrün genyu tinla.

⁸Lo nyule ketyü nyu hidan le kensenbin tilo-o, phika nme nyu yügü tyütsülo njüo raka, suna lo phinya dan pfü gun gü kebu lao niryü phika kechanyu yügü tsünyu kanyü dan pfü gun gü kebu la.

⁹Tsontseo anyu khinyu nyu ka, “Ngun le a-kezü thyü bin mvu laso. Nthu hile jolo kegwa jon nme. Keshanyu laka ngun le nra mvutse tsangkeben khwebin yatselo shaja teno lati; tsügenyu ngun ntsoka gü raja gü kaminyu ka zoshü ti le je!”

¹⁰Tson-o anyugun le ryü nyida khinrun kekhwe dan koshüo, “Agun le Siria nyu kamp nyu gü laryü temi nme-e hyumvu lo tha khwe-e nyü lomvu ai keru lo gada dan dyü njü, lo anyugun phika dan le a-gwenzin tse kebin hyulo le,” tsonshü.

¹¹Tsüselo khinrun kekhwe dan le jolo tsü pe raja kanyu kebin dan ka zoshü.

¹²Raja gü le kheje nyu soryüo a-gonyu dan ka, “Siria nyu le nyu teda thyü bin yo ale hagun ka zoshü ti. Ngun le khün kenbin anyugun le shabin nyo; tsügenyu anyugun le kamp nyu chwi gü low nyu kebu tse njüo ngun le ketyüketsü fü chwiryülo ngun kerhün tenlo lao nyida gü nyu yü kela rüchün bin nyo,” tsonshü.

¹³Tsüka a-gonyu dan nyu nme le, “Nyida hinyu temi dan le kesi nyu hontse kenke nyu bin laso. Tsügenyu temi mipvün no keru nsen kebin pvün ge bin lo-o gü dihontse layo shashü lo gwati,” tsonshü.

¹⁴Tson-o anyugun le kerugari kenyhun ndalo lo raja gü le anyugun no Siria nyu rihü dan sithen gü dihontse yo shwishü lotse nishü.

¹⁵Tson-o Jordan keti anyugun sithen gü tsüka Siria nyu le nyhun-o tin kethyü ka tson then anyugun phinya lo terikanyü khi pe shwe kenjü hyulo. Lo lonyu dan le gunryüo raja gü ka zoshü.

¹⁶Tsüselo temi le chwi gü Siria nyu kanyü dan jün lola. Tson-o Npugü jo hontse tho kegwatsin rokhu nme le shekel nme lo thoshe rokhu kenyhun le shekel nme ka jwe.

¹⁷Raja gü le a-khwe kehü tsiso keda gü no khinrun ketsen lo tse kejüshü. Tsontsin me le khinrun ka a-kedü shvula, Sunggigü temi gü le raja le a-ki nshe keryü ka zokeshü hontse.

¹⁸Kechamvule Sunggigü temi gü le raja ka, “Senduki higwenkho ka Samaria khinrun nyu thoshe rokhu kenyhun le shekel nme lo tho kegwatsin rokhu nme le shekel nme ka jwe ti,”

¹⁹tse keshü ka tsiso keda gü le Sunggigü temi gü jokenio, “Npugü le a-npvü tsang kafüphe dan thyüshü yatse-e tson logwa ti ole?” Tsontsin Elisha le, “N npvü n yhütyü le tsü hyu ti ai nle tsü tyü loho.”

²⁰Tson keshü hontse temi le khinrun ka a-kedü shvula.