Read Southern Rengma Naga 2 RAJANYU 8 Bible Online

2 RAJANYU 8 - Southern Rengma Naga bible

2 RAJANYU 8

¹Elisha le a-le a-nyuthyü nrhün nikeshü tenugi ka, “Npugü le chenda nipe kazü gü nyu shü laso lo tsü le chen tsenyü thyüti, tsügenyu nkami zen-o liki hiki gülo kegwa bin ki tin lalo,” tsonzoshü.

²Tsügenyu tenugi le Npugü temi gü le zokeshü hontse a-kaminyu zen-o tinla; tson-o a-le Filistian kazü ki chen tsenyü hü tinla.

³Tsontseo chen tsenyü pen kela siki tenu tsügi le Filistian nyu ranio Israel kiryü; tson-o a-le raja gü ka a-ka lo a-kazü khinipe a-tsü lotse hi.

⁴Tsüka raja gü le Sunggigü temi gü go Gehezi zen kenthon-o a-ka, “Elisha le thyü keshü tho keda aphu pe a-ka zoshülo,” tsonzobin.

⁵Lo a-le Elisha le kesi gü thyü nrhün keshü rüla pe raja gü ka zokebin ka, hire, a-le a-nyugü thyü nrhün keshü gi le raja ka a-ka lo a-kazü hishü. Tsontsin Gehezi le, “A npugü, O raja, tenugi lo a-nyu Elisha le thyü nrhün keshü gü le hika hü nle,” tsonshü.

⁶Tson-o raja gü le tenugi ka ketso keshü ka tsügi le zoshü. Tsügenyu raja gü le a-ge nyu kedanyu nme kejü shüo a-ka, “Higi hon aphu lo a-le kazü gü kheo tinkela ka ryüo ntsoka keti low gü nyu hyukelo aphu sin pe a-tsü lalo,” tsonshü.

⁷Elisha le Damaska nyu keryü gwenkho ka Siria raja gü Benhadah le hobin; lo mele a-ka, “Sunggigü temi gü le hika ryü bin nle,” tsezoshü,

⁸raja gü le Hazael ka, “Jwe nme khilo-o gü Sunggigü temi gü zen keteno-o, ale keho higü nyu ponlo tile nmvuyo, Npugü ka ketso shwilo,” tsonshü.

⁹Tsüselo Hazael le a-teno titseo Damaska nyu hyulo kehü thakegwa pe ut henzi khvü thyü pvü gun. Tson-o ryü a-mhundyü nyu solo njüo a-ka, “Nnyu gü Benhadah Siria raja gü le a-le keho hinyu ponlo tile nmvuyo nka ketso shülo tseo anipe nki shü bin nle,” tsonshü.

¹⁰Tsontsin Elisha le a-ka, “Npugü le pe atesha keshü le a-le sila tsentsü ti ai gun gü a-ka, a-le a-keho hinyu ponlo titse zoshülo.”

¹¹Lo Elisha le Hazael le kezha lo kemvuthen a-nri ryü bin. Elisha le chü sola.

¹²Hazael le,“Nyuthyüo a npugü le chühü nla?” Tsontsin a-le, kechamvule nle Israel nyu temi ge thagwakemvu thyü nrün, mah pe anyugun chwida dan rola, zhethon pe selo dan dushvu, ntsenyu keshe dan kedüren lati lo nyuphu kepfü nyu nrhu lati tse kethyü ale shakebin genyu le,” tsonshü.

¹³Tsontsin Hazael le, “Ale dikipon kvu pe tsü hontse lo tila? ale temi lihi kemvu tehi nme hontse gwenzin le.” Elisha le a-ka, “Npugü le tsinpe ahi keshü le nle Siria raja thyüti.”

¹⁴A-le Elisha kheo a-npugü ki gun la ryü a-ka, “Elisha le nka nyu hontse zoshü la?” tse ketsoshü. Tsüka a-le, “Nle gwalo la tsentsü ti tse zoshü le,” tsonshü.

¹⁵Ai sendu gü a-le thyühüphi nme khipe zünyu ntsen lo-o pe a-mhun hen shüo no a-teshye ndi sila. Tson-o Hazael le a-sunka raja thyülo la.

¹⁶Ahab nyugü Joram le Israel raja thyü kelo chen pvün ka Jehoshafat nyugü Jehoram le Juda raja thyülo.

¹⁷A-le a-keyhun chen shenryü kenyhun ka raja thyülo lo chen tetse Jerusalem nyu raja thyü.

¹⁸A-nu le Ahab nyugi tsügenyu Ahab kaminyu tho hontse a-le Israel raja dan tson nyu tsonchü. Lo a-le Npugü mhundyü nyu nyu le gwamvu yo tsüthyü.

¹⁹Tson yatse-e Npugü le a-gogü David genyu Juda nkela nyü mvu, a-le mahkenben nme pe a-e lo kethonthen anyenyu dan tsüti tse zokenjü genyu.

²⁰A-gwenkho ka Edom le Juda nrhi soryü la, tson-o a-raja pen so lola.

²¹Tsügenyu Jehoram le a-kerugari a-phu zen-o Zair nyu gü, tsü ka Edom nyu rihü dan le anyugun hun lola. Kheje nyu a lo kerugari kentsenyu dan le anyugun tson jonphe chwila lo a-rihü temi le a-ka kaki gun la.

²²Tson-o nthu keti Edom le Juda keda nrhi hüzun. Tsügwenkho ka Libnah ko kevü soryü la.

²³Jehoram tha kecha dan lo a-le thyükeshü dan aphu Juda raja dan rüla lesü nyu thu bin mvu ole?

²⁴Tson-o Jehoram le apvübon nyu zen-o sila lo-o a-pvübon nyu hontse David nyida nyu sunla; lo anyugü Ahaziah le a-sunka raja thyülo.

²⁵Ahab nyugü Joram le Israel raja thyükelo chen tseryü kenyhun ka Jehoram nyugü Ahaziah le Juda raja thyülo.

²⁶Ahaziah le a-keyhun chen nki kenyhun ka raja thyülo, lo a-le chen me Jerusalem nyu raja thyü. A-jvü zan le Athaliah; Israel raja Omri nyugü nyu.

²⁷A-le Ahab nyu kaminyu tson then-o anyugun tha hontse nyu le Npugü mhundyü nyu gwamvu yo thyü, kechamvule a-le Ahab mvü gü genyu.

²⁸A-le Ahab nyugü Joram zen-o Siria raja Hazael zen kega titseo Ramoth-gilead ka gun, tsüka Siria nyu le Joram jünla.

²⁹Lo Joram le Ramoth nyu Siria raja Hazael zen kenren kethyü ka Siria nyu le a-jün kela tsü no ponlo nrün genyu Jezreel nyu rani ryü. Tsüka Juda raja Ahaziah, Jehoram nyugü le Ahab nyugü Joram le hokebin genyu shwishü titse nshe.