Read Southern Rengma Naga 2 RAJANYU 9 Bible Online

2 RAJANYU 9 - Southern Rengma Naga bible

2 RAJANYU 9

¹Tsontsin sidyükesha gü Elisha le sidyükeshanyu nyu nme kolo-o aka, “Nsen phin lo-o terzü pun hi senlo njüo Ramoth-gilead ki gü lo,

²lo gü tilo lo Nimshi nyu Jehoshafat nyugü Jehu fülo lo a-no a-pvünyu dan nyu soryüo a-zen kanyu tsen ki yülo,

³tson-o terzü pun gü khilo, njüo run pe a-pe ge shüo, ‘Npugü le hihontse zohü nyo, ale n yün pe Israel raja thyü laso.’ Tsüselo kakhin sheo tinla; lo sun nya.”

⁴Tsü hontseo ponyu, sidyükesha gü le Ramoth-gilead nyu gun,

⁵lo a-le ryü laryü hire, rihü dan sokeda jule kehun bin; tsüka a-le, “Kedagü ale ngenyu jolo nme sen hü nle,” tsonshü. Jehu le a-ka, “Agun digü genyu.” Tsontsin a-le, “Ngenyu le, kedagü,” tsonshü.

⁶Tsüselo a-le so-o kanyu yü laryü; ponyu gü le terzü ja pe a-pe ge shüo a-ka, “Israel nyu Sunggigü le hihontse zohü nyo, ‘Ale n yün pe Npugü temi Israel so raja thyü laso.

⁷Nle n senkethyü gü Ahab kami nke lati, tsüle ale ago sidyükesha dan lo Npugü gonyu dan aphu zi min Jezebel ge loti.

⁸Kechagenyumvule Ahab kaminyu aphu nke lati; ale Israel dan nyu Ahab kami do metse kemvu metse pechenyu aphu duthü lati.

⁹Tson-o ale Nebat nyugü Jeroboam lo Ahijah nyugü Baasha kami nke kela hontse, Ahab kami nke lati.

¹⁰Tehi dan no Jezreel ki Jezebel thyü tyüti, temi nme no a-sun loho.’ ” tson shüo a-le kakhin sheo tinla.

¹¹Jehu le a npugü gonyu dan ki chwiryü ntsin, anyugun le a-ka, “Tha aphu gwa kü mon? Keshelu temi tsügü le nka nyu thyü ryü ola?” Tsontsin a-le anyugun ka, “Hagun le temi gü lo a-jo shabin nyo.”

¹²Lo anyugun le a-ka, “Shamvu le; agun ka zoshülo,” tson shü. Lo a-le, “A-le zokeshü le, Npugü le hihontse zohü nyo, ‘Ale n yün pe Israel so raja thyü laso.’ ”

¹³Tsonshü nyemhun anyugun nme me tse a-phi pe phalu la shüo Jehu no tsüsa solo, tson-o shukhun shüo, “Jehu le raja le,” tsonshü.

¹⁴Tsü hontse Nimshi nyu Jehoshafat nyugü Jehu le Joram dushvu kela rhilo la.Joram le Israel nyu aphu zen-o Ramoth-gilead nyu Siria raja Hazael nren bin;

¹⁵ai raja Joram le Siria raja Hazael zen teri kethyü ka jün kela tsü no ponlo nrün genyu Jezreel ki raniryü bin. “Tsügenyu Jehu le keshanyu laka hile hagun kenda yatselo temi nme no nyida gü nken chwio jolo sen gü Jezreel nyu zo nyalo,” tsonshü.

¹⁶Tson-o Jehu le a-kerugari ge külo-o Jezreel ki gun, kechamvule, Joram le jün kebin genyu. Lo Juda raja Ahaziah le Joram shwi nshe ryü bin.

¹⁷Jezreel nyu tsokhwen ge rikhun gü le Jehu lo a-zen kehü dan hyushüo, “Ale temi dan me hyu bin nle.” Tsontsin Joram le, “Keru ge kebin temi nme nishüo no gü gwaketho genyu le nmvula tse ketso shülo,” tsonshü.

¹⁸Tsügenyu temi nme le keru ge gü teno-o, “Raja gü le zo laryü, gwaketho genyu le nmvula,” tsonshü. Tsontsin Jehu le, “Nle gwaketho pe nyuthyü tila?” “Ranio asithen lo.” Rikhwe gü le zo-o, “A-le gü anyugun ti laso, ai raniryü jü mvule,” tsonshü.

¹⁹Tsüselo a-le temi nme ni nishü, tsügü le ryüo a-ka, “Raja gü le zo laryü gwaketho genyu le nmvula?” Tsontsin Jehu le, “Nle gwaketho pe nyuthyü tila! Ranio asithen lo.”

²⁰Rikhwe güle zo-o, “A-le gü anyugun ti laso, ai raniryü jü mvule. Lo a-gari kera le Nimshi nyugü Jehu hontse le, kechamvule a-gari kesen ke kenrin thyü kehü genyu!”

²¹Joram le, “Ndalo lo,” tson zoshü. Lo anyugun le a-kerugari ndashü. Tson-o Israel raja Joram lo Juda raja Ahaziah au a-pepvü pvü a-kerugari ge gülo-o Jehu teno titse chwi, tson-o Jezreel temi Naboth low nyu a-teno lo.

²²Joram le Jehu hyushü ntsin a-ka, “Jehu, gwaketho genyu le nmvula?” tsonshü. Tsontsin a-le, a-jokenishü, “Njvü Jezebel le bin zen keshü teromen kershvu lo temvü kethyü le chosa kebin then nyu gwaketho le bin lo tila?”

²³Tsüselo Joram le a-gari no ranilo njüo tin-o Ahaziah ka, “Che, Ahaziah, ketetsin so!”

²⁴Lo Jehu le a-kekvu thyü a-levü sügin lo njüo pe Joram buthun hvuja shwekha lao a-keru gari ge che tsüla.

²⁵Jehu le a-hensin gü Bidkar ka, “A-sülo njüo pe Naboth low nyu shweshü lalo, kechamvule nnyi le keru ge kehüo a-pvü Ahab sithen kehü ka, dihontse Npugü le a-ntsun-o jo hizoshü yo rüchün lolo;

²⁶‘Ale ndu Naboth lo anyu dan dukeshvu kehyu hontse low higü nyu npu kethun nishü tsen tsüti tse Npugü le zoshü.’ Tsügenyu Npugü le kezo hontse a-sülo njüo shwe pe Naboth low gü nyu shü lalo.”

²⁷Juda raja gü Ahaziah le hi hyu shüo tin-o Beth-haggan denzin gunla. Lo Jehu le a-hüo, “Ako a-shwe lalo.” Tsontsin anyugun le Iblean khoka Gur ki nsin kejü a-kerugari ge a-shwe shüla. Ai a-le tin-o Megiddo nyu gun-o tsüka sila.

²⁸Tson-o a-gonyu le kerugari nme ge a-pvü Jerusalem nyu ryüo David nyida gü nyu a-pvübon nyu sika nyu sunla.

²⁹Ahab nyugü Joram le raja thyükelo chen tseryü nme ka Ahaziah le Juda so raja thyüso.

³⁰Lo Jehu le Jezreel nyu ryükelo ka, Jezebel le tsünyülo njüo, tha pe a-yhütyü nyenlo lo a-pe ketsü kela pfüo kafüphe nyu nrishü.

³¹Tson-o Jehu le chonrha ka yüryü ntsin tsügi le, “Gwaketha le mvula! Zimri a npugü dushvu kela gü?”

³²Tsontsin a-le ngiso gü kafüphe ki niro, “Segü le adenzin tila? Segü la?” tsonshü. Tsüka kedanyu mihvu mishen le a-nrishü.

³³A-le tsüdan ka, “Tsügi sü pe shwe shülo,” tsonshü.Tson-o anyugun le a-shweshü; tsüka a-zi peha le kabon lo kerudan yünla, lo anyugun le a-kedüla,

³⁴tsüselo a-le yügü tyütsülo njüo, “Keswen kesü kepfü tenu higi shwishüo pe sunla lo; kechamvule a-le raja nyu nyu genyu.”

³⁵Ai anyugun le a-sunla titse gü laryü, a-pekhunru, a-pha lo a-benje nti a-me kecha hyulo mvula.

³⁶Tson-o anyugun le raniryü a-ka zoshü ntsin a-le, “Npugü le a-gogü Tishbe nyu Elijah mün nyu kezo le hile, ‘Tsü le Jezreel nyu low ki tehi dan le Jezebel thyü tyü ti;

³⁷lo Jezebel kesi min le Jezreel low nyu methu vü hontse lao temi nme da no hile Jezebel letse zolo nrün ndi lati.’ ”