Read Southern Rengma Naga 1 BINYOH 10 Bible Online

1 BINYOH 10 - Southern Rengma Naga bible

1 BINYOH 10

¹Filistian nyu lo Israel nyu tse Gilboa kazüthun ge kega. Tsünyu Israel nyu kechon gala, tson-o raja Saul lo a-nyu dan sin-o a-sen dan le tinla.

²Ai Filistian nyu le anyugun hüryüo Saul nyu peche mishen ju, Jonathan, Abinadab lo Malchishua tse gala.

³Saul hun-o kenren salo la tson-o shwikerüchün nyu tholevü tsi le a-jün sala.

⁴Tsüselo a-le terikanyü sen kehü selo gü ka zoshü, “Sunggigü shakemvu Filistian nyu hidan no a-nchün ndyü bin mvu nrün genyu n zhethon tho pe a dushvu lalo,” tsonshü. Ai selo gü tsü le tsü thyü nshvula. Tsügenyu Saul le a-npfü a-zhethon tholo-o tsügü tsü ge yhela.

⁵Selo gü le Saul sikela hyushüo a-ko a-npfü a-zhethon ge yhe-o sila.

⁶Tson-o Saul lo a-nyu peche mishen aphu si kentsin lao a-tsipwen nme-e keda thyü mvula.

⁷Jezreel ketejon nyu yhun kebin Israel nyu rihü dan le tinla tson-o Saul lo a-nyu dan le sila sele tsekethyü shalo ntsin anyugun rünyi khelao kehü tinla. Tsüselo Filistian nyu le ryü nkhen lola.

⁸Terithyüo sendu gü Filistian nyu le simin dan ge kanyü khilo titse gü laryü Saul lo a-nyu dan le Gilboa kazüthun ge si kebin hyulo.

⁹Tsüselo a-nyugun le Saul pe thülo lo a-terikanyü yhünlo njüo lilo nipe Filistian nyu kazü aphu nyu shüo anyugun tero dan lo temi dan ka shekerhün gü zoshü lo tse shü.

¹⁰Anyugun le a-terikanyü pe anyugun kershvuka nme nyu shüla lo a-pe khipe anyugun tero gü Dagon kanyu hüsü la.

¹¹Tsontsin Gilead nyu Jabesh temi le Filistian nyu le Saul ge nyuthyü shüyo nyülo njüo,

¹²temi kepeche tsin dan le gü Saul lo a-nyu dan simin pen ryüo Jabesh ki shüla. Tson-o pe teshobin nme pha nyu sunla njüo jon tsenyü nyün.

¹³Saul le Npugü jozenkemvu genyu sila. A-le Npugü johokeshü zen mvula, a-le kesinyu kapu ka a-tson ketsin hyulo titse fü.

¹⁴Npugü zen kegwensha kethyü sunka. Tsügenyu Npugü le a-boshvulao rajaphen ge ketsen kethyü pe Jesse nyugü David tsüla.