Read Southern Rengma Naga 1 BINYOH 11 Bible Online

1 BINYOH 11 - Southern Rengma Naga bible

1 BINYOH 11

¹Israel nyu aphu Hebron ki gü David ka zoshü, “Agun le nthyü lo nzi.

²Gükela gwenkho ka Saul le agun raja thyü kebin kanyu nle Israel nyu zen gü terithyü lo Npugü n Sunggigü le nle a-temi dan tsonri lo anyugun so kedagü thyüti tse zo njü.”

³Tsü hontse-o Israel nyu sharhi aphu Hebron nyu raja David ki ryü. Tsüka a-le anyugun zen kejozen lo, lo Npugü le Samuel ka zoshü kenjü hontse anyugun le ter pe a-yün lo-o a-le Israel nyu raja thyülo.

⁴Raja David lo Israel nyu aphu gü Jerusalem when. Tsü pe Jebus tse hü, Kazü tsügü nyu yhun keri Jebus nyu le tsünyu bin hü zun.

⁵Jebus nyu le David ka a-le thame kae nyida gü nyuzin yüryü lohotse zo, ai David le Zion chwida lolo njüo tsü pe “David Nyida,” tse ko tinla.

⁶David le, “Jebus nyu galo keritsin gü no rihü dan so kedagü thyüti,” tse zoshü. Joab a-jvü le Zeruiah gü le rigü whe-o rihü dan so kedagü thyü lola.

⁷David le chwida nyu yügü yhun kelo genyu tsü pe, “David Nyida,” tse kolo.

⁸A-le nphozin nnyo pe lvü kethyü bin ka bin zenlo-o nyida thyüni lo, lo nyida gü thyü ti kemvu dan Joab le thyülo.

⁹David le kvuketsin tsin soryü lo, Kekvutsin Npugü le a-zen kehü genyu.

¹⁰Hile David rihü a-zan kechwi dan. Hidan le Israel nyu temi kecha dan sin-o a-keche pe no raja thyülo; Npugü le zoshü kenjü hontse lo anyugun le a-rajaphen ntsen pe nkolo.

¹¹Keri gü le Jashobeam, Hachmon pfüphun, “Mishen,” ju ka sharhi gü. Teri nme ka a-le mi sen-o temi tsishen zen kenren-o anyugun aphu gala.

¹²Mishen dan nyu a-zan kechwi tsin gü le Dodo nyugü Eleazar, Ahoh pfüphun.

¹³A-le Pas Dammin teri ka David denzin bin-o Filistian nyu ntsun. Israel nyu le tinkela ka a-le Barley low nme nyu bin,

¹⁴tson-o a-le lo a-temi le low lvu nyu bin-o Filistian nyu zen kenren. Npugü le kvukelo keda pe a-tsü shü.

¹⁵Khenyüme David le Adullam tsokü khoka tsonye nme ge kebin ka shüpahü sharhi shenryü dan nyu mishen le a-kiryü, Filistian nyu dan me le Rephaim ketejon nyu nsenbin.

¹⁶Tsügwenkho ka David le rincho ki chwida nme nyu bin, lo Filistian nyu dan me le Bethlehem khinlo la.

¹⁷Tsüka David le ka nnyü ho-o, “Temi peha no Bethlehem khinrun ka zülvu zü pen ryü ano tsülo letse nda tse zoshü!”

¹⁸Tsüselo Shüpahü a-zan kechwi mishen ju le Filistian nyu kensenbin nken gü zülvü gü nyu zü pen-o David ki ryü. Ai a-le tsü tsü mvula; tson-o ja pe kershvu nme hontse pe Npugü ki shüla,

¹⁹a-le zoshü, “Ale thame ka hi tsü loho! Hile aphu hoshü kebin temi hidan zi tsü kebin hontse le!” Tson-o a-le tsü mvula. Hile shüpahü a-zan kechwi mishen ju kepeche tho.

²⁰Joab sikezen gü Abishai le a-zan kechwi shenryü dan nyu sharhi gü. A-le a-mi sen temi tsishen nren-o anyugun galao “Shenryü,” dan nyu a-zan chwilo.

²¹A-le shenryü dan nyu a-zan kechwi tsin thyülo-o anyugun sharhi thyülo, ai a-le “Mishen” ju hontse a-zan chwi mvu.

²²Jehoiada nyugü Benaiah, Kebzeel nyugü le shüpahü a-zan kechwi nme, a-le kepeche tho kechon thyü keshü nyeki Moab nyu teri kekvu keda nyu mihvu gala. A-le gwengwa nme khetso keche gwenkho ka nshe gü tekhün kü nme ka shünyho nme gala.

²³A-le Ijipt nyu temi kethonkeda a-kethon le miter kenyhun nyu nme ko gala, tsü gü le mi keda nme sen hü. Benaiah le sen kethü nme sen a-wheo Ijipt nyu gü mi seü pe tsügü gala.

²⁴Benaiah kepeche tho le tsüdan, a-le “Shenryü,” dan nyu nme.

²⁵A-le “Shenryü,” dan nyu a-zan kechwi nme, ai “Mishen” ju hontse a-zan chwimvu. David le a-lo pe a-rikhun dan kentsen gü thyü shü.

²⁶Hidan hile a-zan kechwi kecha nyu dan: Asahel, Joab sikezen gü Elhanan, Bethlehem ka Dodo nyugü Shammoth, Harod temi Helez, Pelet temi Ira, Tekoa ka Ikkesh nyu gü Abiezer, Anathoth temi Sibbaecai, Hushah temi Ilai,Ahoh temi Maharai Netophah temi Heled, Netophah ka Baanah nyugü Ithai, Benjamin lojvü Gilead ka Ribai nyugü Benaiah, Pirathon temi Hurai, Gaash kho ketejon ka temi Abiel, Arbah temi Azmaveth, Bahurum temi Eliahba, Shaalbon temi Hashem, Gizon temi Jonathan, Harar ka Shagee nyu gü Ahian, Harar ka Sachar nyugü Eliphal, Ur nyu gü Hepher, Mecherah temi Ahijah, Pelon temi Hezro, Carmel temi Naari, Ezbai nyu gü Joel, Nathan sikezen gü Mibhar, Hagrii nyugü Zelek, Ammon temi Naharai, Joab teri kanyü kesen gü Beeroth temi Ira lo Gareth, au Jattir temi Uriah, Hitt temi Zabad, A(...)