Read Southern Rengma Naga 1 BINYOH 12 Bible Online

1 BINYOH 12 - Southern Rengma Naga bible

1 BINYOH 12

¹David le raja Saul kebuo gü Ziklag ka yhun hü. Tsüka shüpahü kekvu tenyenlo kekü kechon le ryü a-zen kengü lo,

²temi tsü dan le Saul kami Benjamin tsipwen nyu. Anyugun le a-ben ngwa nzhü tholevü kvu lo tso kezeülo kegwa temi.

³Anyugun le Gibeah ka Shemaah nyu Ahiezer lo Joash au hensin nyu bin. Tsü dan le shüpahü hidan hi: Jeziel lo Pelet, Azmaveth nyu hvu Beracahlo Jehu, Anathoth temi Ishmaiah, Gibeon temi, shüpahü a-zan kechwi lo “Shenryü” dan nyu sharhi nme Jeremiah, Jahaziel, Johannan, lo Jozabad, Gederah temi Eluzai, Jerimoth, Bealiah, Shemariah, lo Shephatiah, Hariph temi Elkanah, Isshiah, Azarel, Joezer, lo Jashobeam, Korah pfüphun ka Joelah lo Zebadiah, Gedor ka Jeroham nyu hvu.

⁸David le kazü kesi ki kebin ka Gad tsipwen nyu shüpahü kekvu a-zan kechwi dan le ryü a-rihü dan zen kengü lo kela dan zan le hidan hi. Anyugun le Gida lo mi sen shasa, Shünyho hontse shwi kenrin thyü lo kazüthun ki thyüje hontse nmhe sa.

⁹Anyugun keda keshe kethen keshü le: Ezer, Obadiah, Eliab, Mishmannah, Jeremiah, attai, Eliel, Johanan, Elzabad, Jeremiah, lo Machbannai.

¹⁴Gad tsipwen nyu temi hidan peha le yie sokeda lo kecha nyu le tsi sokeda thyü.

¹⁵Chen me shyekeri gü ka Jordan züri le da pe a-jen sü kebin ka anyugun le züri gü pfüthü gü züri gü npho lo nkhün ketejon nyu kebin nyu hükezen la.

¹⁶Gwengwa me ka Benjamin lo Juda tsipwen temi dan me le David le kebin chwida ki gü.

¹⁷David le chwi gü anyugun teno-o zoshü, “Hagun le akeche titse kegwa thyü ryü bin yatselo hagun le hika ryü logwa. Ngun kengülo! Ai ale hagun nthyü nnyü titse nda bin mvue hagun le aten pe a shwikerüchün nyu ben ka shüla titse nda bin yatselo, ngun pvübon nyu Sunggigü le shabin lo a-le shaja pe hagun tsüti,” tsonshü.

¹⁸Tsontsin Sunggigü kapu gü le anyugun nme Amasa tse kethyü siki “Shenryü” dan sharhi thyü kelo gü ge ryüo a-le nrao, “David Jesse nyugü, agun le nhon! Nle lo nchekehü dan no gwakelo gü thyülo! Sunggigü le nkipon le.” Tsüselo David le anyugun senlo-o anyugun no a-rihü dan so keda thyülo.

¹⁹Manasseh tsipwen ka shüpahü peha le David le Filistian nyu zen-o raja Saul zen kenren chwikejü ka a-kipon ryü. A-le Filistian nyu che shümvu, anyugun raja jule a-le anyugun sa pe himhundyü a-npugü ben nyu shükela nshvula, tson-o anyugun le a-ninipe Ziklag ki shüla.

²⁰Hidan hile David le raniryü kejü ka a-kipon ryü kela Manasseh tsipwen ka shüpahü dan: Adnah, Jozabad, Jediael, Michael, Jozabad, Elihu, lo Zillethai. Manasseh tsipwen ka anyugun aphu yie sokeda nyu.

²¹Anyugun aphu shüpahü a-zan kentsen nyu genyu David hensin bin-o a-rihü dan sokeda thyü. Kenkhin ki anyugun le Israel rihü dan nyu keda thyülo.

²²Khenyütsen temi keshün le ryü David rihü dan sinlo, tson-o whütse a-rihü le danda thyü lola.

²³David le Hebron nyu kebin ka, shüpahü ndonronlo kela temi kechon le ryü a-rihü dan sin-o Npugü le zoshü kenjü hontse a-no Saul sunka raja thyülo nrün genyu a-che. Temi tsü dan le hikho: Juda: gida lo mi sen-o ndo kegwa thyülo kela le 6800; Simeon: ndo kegwa thyükela temi 7,100; Levi: temi 4,600; Jehoiada sithen kehü Aaron tsipwen; temi 3,700; Zadok shvunye terithyü lokegwa selo: sharhinyu 22; Benjamin (Saul kami): temi 3,000 (Benjamin tsipwen kechon gü le Saul kipon bin); Efraim: anyugun pfüphun ka a-zan kechwi nyu temi 20,800; Manasseh nkhünzin kebin nyu: gü David kejü pe raja thyü nrün genyu kejükelo temi 18,000; Issachar: sharhinyu 200 pe anyugun hensin nyu temi sin (hidan le Israel nyu le nyuthyü mvulo shvuyo lo tsüthyü nrün gwenkho kegwatsin shabin); Zebulun: Joketsin kezo lo kenren titse ndo lo kela tenyenlo kekü, teri kanyü aphu sen shakela temi 50,000; Naftali: Sharhinyu 1,000 lo gida lo mi kesen temi 37,000 sin; <t(...)

³⁸Shüpahü hi aphu teri genyu ndolo-o David no Israel nyu aphu so raja thyülo titse rhilo-o Hebron ki gü. Israel nyu temi a-sen dan aphu kerüchün kerhün.

³⁹Anyugun le jonshen David zen bin-o a-nyu temi dan le anyugun genyu ndo keshü tyütsü bin.

⁴⁰Tsipwen tesozin nithen ki kebin Issachar, Zebulun lo Naftali temi dan le ketyüketsü- tho, kherosha, terashakenko, vainzu, lo oliv ter pe gada, ut, keru, lo methutse dan khvu thyü pfü ryü. Lo dushvu tyü nrün genyu methu lo tanyü ko hü zenryü. Tsü le kazü a-pentha anyugun sherhün kebin tesha shü kethyü.