Read Southern Rengma Naga 1 BINYOH 13 Bible Online

1 BINYOH 13 - Southern Rengma Naga bible

1 BINYOH 13

¹Raja David le yie lo tsiso kedanyu aphu zen kenthon kü shü.

²Tsüselo David le Israel nyu aphu tesha shü, “Hagun le hagun kendo, lo tsü le Npugü ngun Sunggigü kendo yatselo, ngun lilo nipe ngun kazünyu kebin, temi dan lo anyugun rünyi nyu püshükedanyu, Levinyu ka shüo anyu no ryü hika ngun kerhün lo lo tse zoshü tile nu.

³Tson-o gü Saul le raja thyü kebin ka pe lihi kemvu thyükela Sunggigü zen Kejozenkelo Khinpha gü zen ryü la tile.”

⁴Tsüle temi dan kenyü la, tson titse kejo rhünlo.

⁵Tsügenyu David le Kiriath Jearim ka Kejozenkelo Khinpha gü sen Jerusalem nyu ryü nrün genyu tesinzin Ijipt nyu terhi ka gü tesozin Hamath kazü kenchon keti kazü aphu nyu Israel nyu temi ko kequen shü.

⁶David lo temi dan le Juda lojvü Kiriath Jearim ki kegü tson Baalah nyida nyu Cherubim le a-soge kebin Sunggigü Kejozenkelo Khinpha gü penlo titse gü.

⁷Anyugun le Abinadab kanyu Kejozenkelo Khinpha gü sen chwiryü gari keshün nme ge shülo, Uzzah lo Ahio au le gari gü sen,

⁸David lo temi aphu anyugun kekvu aphu sen da thyüo Sunggigü rühvu. Anyugun le lükhin dan- harp, bin, cymbal, lo shu sen lüthyü.

⁹Anyugun le Chidon shye kenyuh bin ka ryü kelo ka methutse gü le a-pha nsüla, tsüselo Uzzah le a-ben keta pe Kejozenkelo Khinpha gü nmhu lo.

¹⁰Tsonshü nyemhun Npugü le Uzzah le Khinpha gü kesü keshü genyu a-nyuntao a-boshvula. A-le tsüka Sunggigü mhundyü nyu sila,

¹¹lo tsü gerho bin tsügü pe Perez Uzzah tse ko tinla. Npugü le a-nyuntao shaja pe Uzzah tsü kela genyu David le nthün lola.

¹²Tson-o a-le Sunggigü nshvuo zoshü, “Ale dihontse ntsoka Kejozenkelo Khinpha khilo tila?”

¹³Tsügenyu David le tsü sen Jerusalem nyu ryü mvula. Tsü sunka a-le tsü khepe Gath nyida gü nyu keyhun nyu a-zan le Obed Edom tse kethyü temi nme kanyu shüla.

¹⁴Tsüle shyeshen tsüka bin, lo Npugü le jochü pe Obed Edom kami lo a-hon aphu so ge shü.