Read Southern Rengma Naga 1 BINYOH 15 Bible Online

1 BINYOH 15 - Southern Rengma Naga bible

1 BINYOH 15

¹A-npfü a-genyu David le David nyida nyu ka thyülo. A-le Sunggigü zen Kejozenkelo Khinpha genyu ko bin nme nda lo-o tsü genyu phika nme thyüshü.

²Tson-o a-le zoshü, “Levi nyu nti Kejozenkelo Khinpha gü penti, Npugü le anyugun no tsü pen, lo kethonthen a-lothyü titse kejülo kela genyu.”

³Tsüselo David le Kejozenkelo Khinpha gü senryü a-le ndo kebin bin ka shü nrün genyu Israel nyu aphu ko pe Jerusalem nyu shü.

⁴Tsüsika a-le me nipe Aaron tsipwen lo Levinyu dan koshü.

⁵Levi tsipwen Kohath pfüphun ka Uriel le temi 120 so kedagü thyü;

⁶Merari pfüphun ka Asaiah le temi 220 so kedagü thyü;

⁷Gershon pfüphun ka Joel le temi 130 so kedagü thyü;

⁸Elizaphan pfüphun ka Shemaiah le temi 200 so kedagü thyü;

⁹Hebron pfüphun ka Eliel le temi 80 so kedagü thyü;

¹⁰lo Uzziel pfüphun ka Amminadab le temi 112 so kedagü thyü.

¹¹David le püshükeda Zadok lo Abiathar, hvu lo Levinyu mitsero, Uriel , Asaiah, Joel, Shemaiah, Eliel lo Amminadab tse koshü.

¹²A-le Levinyu ju ka zoshü, “Hagun le Levi pfüphun sharhi ju. Hagun lo hagun tsasikezen nyu thyü kenshün lo, tson-o Israel nyu Npugü Sunggigü zen Kejozenkelo Khinpha gü sen ryü ale a-bin nda kebin gü nyu shülo nrün genyu.

¹³Tsü pe kerigü ka hagun le bin mvukela genyu Npugü ngun Sunggigü le ngun le thyü mvulo keshvu gü thyüo a-rüshvu mvukela genyu shaja ape ngun tsü.”

¹⁴Tsüselo püshükeda hvu lo Levinyu dan tsü le Israel Npugü Sunggigü Kejozenkelo Khinpha sen ketu nrün genyu anyugun thyü kenshünlo.

¹⁵Npugü le Mosa ka zokeshü hontse Levinyu dan le tsüpe kepenvü ge shüo pen ryü.

¹⁶David le Levinyu sharhi ju no Levinyu dan kejü pe lüthyü lo harp lo cymbal sen shekerhün khwen thyü lo tse shü.

¹⁷Lü kethyü pfüphun ka temi hidan kejü pe no lazo cymbal sen lo tse shü: Joel nyugü Heman, lo a-shvunye, Berechiah nyugü Asaph lo Merari pfüphun ka Kushaiah nyu Ethan. Anyugun kecheo harp khun tetso nrün genyu Levinyu hidan kejü shü: Zechariah, Jaaziel, Shemiramoth, Jehiel, Unni, Eliab, Maaseiah lo Benaiah. Harp khun tsenyo nrün Levinyu hidan kejü shü: Mattithiah, Eliphelehu, Mikneiah, Azaziah, lo Kershvuka nyu rikhun, Obed Edom lo Jeiel hvu.

²²Chenaniah le lüthyü sha kethyü genyu kejü pe Levinyu lükethyü dan sharhi gü thyüshü.

²³Berechaih lo Elkanah au pe Obed Edom lo Jehiah sin-o Kejozenkelo Khinpha gü rikhun lotse kejülo. Püshükeda Shebaniah, Joshaphal, Nethanel, Amasai, Zechariah, Benaiah, lo Eliezer hidan no Kejozenkelo Khinpha mhundyü nyu shukhun lo tse kejü lo.

²⁵Tson-o Raja David, Israel nyu sharhi dan, lo rihü dan so keda ju le shekerhün thyü Kejozenkelo Khinpha gü senryü titse Obed Edom ka ki gü.

²⁶Anyugun le Sunggigü le Kejozenkelo Khinpha kepen Levinyu dan cheshü nrün sha ntsenla titse methutse tsenyü lo tanyü tsenyü tse pe rora thyüshü.

²⁷David le linen kegwatsin pe keda mirün ketseyho pfü, lükethyü nyu dan, anyugun sharhi gü Chenaniah lo Khinpha gü kepen dan ko tsü hontse pfü. David le linen pe kedo ephod ko ben.

²⁸Tson-o Israel nyu aphu, shekerhün khwen thyü sen, shu lo tanyü tse khun, cymbal ketsin, lo harp sen lüthyüo Kejozenkelo Khinpha gü sen Jerusalem ki nsin ryü.

²⁹Khinpha gü sen nyida gü nyu ryü kelo ka, Saul nyugi Michal le kafüphe ka shwishü laryü Raja David le shekerhün thyü dathyü lo nyhun kebin hyu shüo a-dyü ngwala.