Read Southern Rengma Naga 1 BINYOH 16 Bible Online

1 BINYOH 16 - Southern Rengma Naga bible

1 BINYOH 16

¹Anyugun le Kejozenkelo Khinpha gü sen David le ndo kenjü phika gü karyüo pe tsü nyuki shüla. Tson-o anyugun le rope kerüshvu lo kepfüshe kerüshvu thyü pe Sunggigü kishü.

²David le kerüshvu thyü pen kela siki Npugü zan nyu jochü pe temi dan tsüshüo

³ketyüketsü kenjün pe temi aphu tsüshü. A-le tensü thün me, thyükero hensi nme lo terasha kenko tse khipe Israel nyu peche, tenu nmeme tse tsü küshü.

⁴David le Levinyu peha no Kejozenkelo Khinpha mhundyü nyu sharhi thyüo Npugü, Israel nyu Sunggigü rüshvu lo lüthyü a-shwe nrün kejülo.

⁵Sharhi gü le Asaph lo A-keche gü le Zechariah. Jeiel, Shemiramoth, Jethiel, Mattithiah, Eliab, Benaiah, Obed Edom, lo Jeiel tse no harp khun. Asaph no cymbal ketsin,

⁶lo püshükeda Benaiah lo Jehaziel hvu no Kejozenkelo Khinpha mhundyü ka shukhun zin lotse shü.

⁷Tsü le David le Asaph lo apfünyu Levinyu no lüthyü Npugü shwe nrün khvu pe tsü keritsin.

⁸Chenkeno pe Npugü tsülo, a-keda rüla zoshü; a-le nyutho thyüshü yo pe senye dan ka zoshülo.

⁹Lüthyü pe Npugü shwelo' a-le thyükeshü nduntho dan zoshü.

¹⁰Ngun le a-hon genyu ngun kenyü lo; a-rüshvu kehü nyu aphu no sherhün lo!

¹¹Npugü ki gü keche fülo, lo a-rüshvu zin bin lo.

¹²Hagun Sunggigü gogü Jakob tsipwen dan, Sunggigü le kejü kelo gü Israel tsipwen dan, Sunggigü le nduntho thyü keshü dan rüchün lo a-le mejün kera pen keshü dan.

¹⁴Npugü le ngun Sunggigü; a-johokeshü le kazü aphu genyu.

¹⁵Sunggigü zen kejozenkelo tsü nmhin lanya, a-le tsü no kethonthen bin rün genyu thyüshü,

¹⁶a-le Abraham zen kejozenkelo, a-le Isak ka zoshwi keshü.

¹⁷Npugü le Jakob zen kejozenkelo, tsü le kethonthen bin ti.

¹⁸“Ale Kanan kazü pe hagun tsü ti,” a-le zoshü. “Tsüle hagun npfü hagun hon thyüti.”

¹⁹Sunggigü temi le kerho, tesin thyüo kanan kazü nyu hü.

²⁰Anyugun le hosen kazü nme ka bin-o nme ki gü, rajaphen nme ka bin-o kecha ki gü.

²¹Ai Sunggigü le temi nme no anyugun nshwe mvu; anyugun ntsenlo raja dan no petsü lolo tse shü:

²²“Ale kejü kelo gonyu dan nthyü nnyü nya; sidyükesha nyu kesü nya.”

²³Lüthyü pe Npugü kishülo, kazü aphu! Khenyütsen a-le ngun kenikeshü jolo kegwa zolo.

²⁴A-zankechwi pe senye dan ka zoshü; a-tho kekvu dan pe temi aphu ka zoshülo.

²⁵Npugü le gon tsügenyu a-shwe sa zü; tero kecha aphu nyeki a-rühvu zü.

²⁶Senye kecha aphu tero le thame kezü nti, ai Npugü we tsang dan thyüshü.

²⁷Zan kechwi lo Terün le a-hun bin, kekvu lo shekerhün le a-Kershvuka sü bin.

²⁸Npugü shwelo, kazü nyu temi aphu, a-zan kechwi lo a-kekvu shwelo.

²⁹Npugü zan kechwi gü shwelo; tha sen-o a-Kershvuka nyu ryülo. Kenshün gü mhundyü nyu nkhün tsülo, a-le me yhühyu thyü ryülo;

³⁰A-mhundyü nyu ndün lo, kazü aphu! Kazü gü pe a-bin ka shü tsekha njü lo ketu la loho.

³¹Hagun kenyülo, tsang lo kazü! Npugü le raja le tse senye dan ka zoshü lo.

³²Nho lo, züda lo tsünyu kebin nyukhu aphu; nkenyülo, low lo nge kebin aphu!

³³Chün nyu senbin dan le shekerhün thyü sen ti Npugü le kazü so gon titse ryü selo.

³⁴Chenkeno pe Npugü tsülo, a-le gwa; a-keso le kethonthen bin hü.

³⁵A-ka zoshü, “Agun kenishü lo, O Sunggigü agun kenikelo gü; agun kho kequen shü; senye dan nyu agun kenishwi shü, tson-o agun no ncheno lo nzan Kenshün shwelo.”

³⁶Npugü shwe, Israel nyu Sunggigü! Ntsoka lo kethonthen a-shwelo! Tsüsika temi aphu, “Amen” tson-o Npugü shwe shü.

³⁷Raja David le Asaph lo a-pfünyu Levinyu dan no Kejozenkelo Khinpha pe shü kebin gü nyu a-zintse kerüshvu ketsen lo tse shüla. Khenyütsen anyugun le tsünyu anyutho thyüti.

³⁸Jeduthun nyugü Obed Edom, lo a-pfüphun ka temi 68 le anyugun cheti. Hosah lo Obed Edom au le chonrha khwe.

³⁹Püshükeda gü Zadok lo a-pfünyu püshükeda dan le Gibeon nyu kershvubin gü ka Npugü kerüshvu ketsen hü.

⁴⁰Lonyü lo khejetsen Npugü le pe Israel nyu tsü keshü tejvü nyu thu kenjü then-o kershvubin ge a-pentha rope kerüshvu thyüti.

⁴¹Anyugun sin-o Heman lo Jeduthun lo Npugü le kethonthen so kehü genyu Lüthyü a-shwe lotse kejükelo kechanyu dan ko anyugun zen hü.

⁴²Heman le Jeduthun au le shu, cymbal lo Npugü keshwe lü kethyü ka sen kehü kanyü kecha dan ko ketsenlo tse shü. Jeduthun pfüphun temi dan no chonrha kekhwe ketsen.

⁴³Tsüselo temi aphu a-ka ki gunla, lo David ko a-ka ki gun gü gwenkho peha a-kami nyu zenbin tinla.