Read Southern Rengma Naga 1 BINYOH 18 Bible Online

1 BINYOH 18 - Southern Rengma Naga bible

1 BINYOH 18

¹Tsüsiki David le Filistian nyu whe nio anyugun sokvu lola. A-le Gath nyida gü lo tsü tekehun dan lolo.

²A-le Moab nyu dan so ko kvulo la, tson-o tsüdan le a-hensin bin-o khajana pe a-tsü hü.

³Tsüsika, David le Hamath lojvü khoka Siria nyu kazü Zobah ka raja Hadadezer whe, Hadadezer le Eufrates tesozin lojvü gü lolo titse ndo sokela genyu.

⁴David le a-terigari yieme, keru ge kedun temi yie tsenyü lo pha tsokechü shüpahü yie nki tse ten lola. A-le terigari tsime genyu keru pe binla lo kecha dan aphu pha bose la.

⁵Damaska nyu Siria nyu le rihü nipe raja Hadadezer keche keshü ka David le tsüdan wheo temi yie nki kenyhun gala.

⁶Tson-o a-le rihü dan kensenbin thyü pe anyu lojvü nyu shü lola, tsüselo anyugun le a-hensin bin-o khajana pe a-tsü tinla. David le lika hika gü-e Npugü le kvukelo pe a-tsü.

⁷David le Hadadezer hensin kedanyu dan le suna pe kethyü gida pfü kehü khisen-o Jerusalem nyu ryüla.

⁸A-le Hadadezer le a-so gon kehü Tibhath lo Kun nyida nyu lazo ko kechon khilo la. (Kenkhin ki Solomon le lazo hi pe zükhin, kachon lo Kershvuka nyu kesen dan thyü.)

⁹Hamath nyu raja gü Toi le David le Hadadezer rihü aphu sokvulo kela rüla nyülo.

¹⁰Tsügenyu a-le anyugü Joram nipe no Raja David kelushü lo a-le Hadadezer sokvulo kela genyu a-shekerhün zoshü lotse shü, Toi le gwen kechon tsügü zen kega. Joram le suna rakagi lo lazo pe kethyü jwe senryü David tsü.

¹¹Raja David le Edom, Moab, Ammon, Filistian, lo Amelek senye hidan so kvulo-o khikelo rakagi lo suna sin pe kerüshvu gwenkho ka sen rün genyu thyü kenshün lo.

¹²Abishai, a-jvü le Zeruiah , a-le Tsip Ketejon tse kethyü bin nme nyu kebin Edom nyu so kvulo-o temi yie tseryüo tetse gala.

¹³A-le Edom kazü aphu nyu rihü dan kensenbin thyülo la, tson-o tsü nyu temi dan ale Raja David hensin yüryü la. Lika hikae Npugü le kvukelo pe David tsü.

¹⁴David le Israel nyu aphu so gonlo lo a-zintse a-temi dan ge ketsin lo kenjü gü thyü hü.

¹⁵Abishai tsagü Joab le rihü dan so kedagü; Ahitub nyugü Jehoshaphat le kethu gü;

¹⁶Ahitub nyugü Zadok lo Abiathar nyugü Ahimelech au le Püshükeda thyü, Seraiah le Jokera nyu kethu gü;

¹⁷Jehoiada nyugü Benaiah le David rikhun nyu kentsen gü; lo Raja David nyu peche dan le a-lotho ka ketetso nyu thyü.