Read Southern Rengma Naga 1 BINYOH 21 Bible Online

1 BINYOH 21 - Southern Rengma Naga bible

1 BINYOH 21

¹Satan le kenjün kethyü senryü Israel nyu ge shü nyüo David thyü pe no temi swü titse rhilo la.

²David le ahza pe Joab lo a-hensin kedanyu kecha dan tsüo, “Israel nyukazü peha zin gü kechazin keti aphu temi swülo. Temi dikho le bin yo ale shanyü bin nle.”

³Tsontsin Joab le zoshü. “Npugü no Israel nyu thyü pe ntsoka kebin nyeki jüntsi chon kenye shü nda! Raja gü anyugun aphu ngole. Nle nyu genyu hithyüo senye-e apentha no mvu lanyü bin nla?”

⁴Tson-e raja gü le Joab no a-jo zenla. Joab le chwi gü Israel nyu kazü apentha njwen tseo rani Jerusalem nyu ryü.

⁵A-le terithyülo kegwa kerhün keshü le dikho bin yo pe raja David ka zoshü: Israel nyu 1,100,000 lo Juda nyu 470,000 le bin nle tse zoshü.

⁶Joab le raja gü johokeshü tsü le a-kenda mvukela genyu a-le Levinyu lo Benjamin tsipwen swüshü mvula.

⁷A-le thyü kela tsü Sunggigü ale a-kenyü mvukela genyu shaja pe Israel nyu tsüshü.

⁸David le Sunggigü ka zoshü, “Ale hi thyüo kemu kenrin thyü laso! A kemu jü shülo. Ale kemonkenlu tho thyü la sele.”

⁹Tsüselo Npugü le David temi sidyükesha Gad gü ka zoshü,

¹⁰“Gü David ka ale a-no kejülo lo tse tha konshen khishü bin nle. A-le kejükelo gü ale thyü shüti.”

¹¹Gad le gü David ka Npugü le nyu zo yo pe zoshü, “Digü tila?

¹²Chen shen chenda le? Shye shen shwikerüchün nyu rihü mhundyü tin tile? Le jon shen Npugü no a-zhethon sen n ntsun-o kenpen nipe nkazü nyu shüo alilo gü no kesi senryü Israel nyu kazü aphu nyu shü tila? Ano nyu pe Npugü jokenishü mon?”

¹³David le Gad jokenishü, “Ale thyülo shvuritsin kethyü nyu bin laso! Ai ale temi no shaja pe atsü nyü mvu. Npugü no a-npfü shaja pe atsülo, a-le me njün kehü genyu.”

¹⁴Tson-o Npugü le kenpen nipe Israel nyu ge shüo, anyugun temi yie hentsenyü le sila.

¹⁵Tson-o a-le Jerusalem nkela lotse tsangge lonyu nme nishü, ai a-le a-nyu rani lao lilo gü ka zoshü, “Khela lo! Tsü nti-e gwaso!” Tsangge logü le Jebus nyu Araunah shyekenyuh bin ka sobin.

¹⁶David le tsangge logü le Jerusalem nkela titse ndo-o a-zhethon sen-o tsangneki so kebin hyushü. Tsüselo David lo temi sharhi dan le anyugun aphu ronphi ben-o tsenyo-o kazü nyu nkhün rün bin.

¹⁷David le kehi thyüo, “O Sunggigü, thyüzü kela gü tsü le ale. Temi hidan le nyu thyüla ola? Npugü, a Sunggigü, shaja pe ale lo akami tsülo ai ntemi we nrho shü lo.”

¹⁸Npugü lilo gü le Gad no David ka zoshüo no gü Araunah shyekenyuh bin ka kershvubin nme thyü pe Npugü tsülo tse shü.

¹⁹David le Npugü jo zen-o Gad le a-ka zokeshü hontse gü.

²⁰Tsüka Aruanah lo anyu peche mizi ju le thoshye nyu bin-o lilo gü hyushü laryü anyugun le kebu tinla.

²¹Araunah le Raja David le ryükejü hyushü nyemhun shyekenyuh bin nkenryüo nkhün tsügü a-mhun pe kazü rün lola.

²²David le a-ka zoshü, “N shyekenyuh bin hipe aka jwe shülo, tson-o kenpen hi khinla nrün genyu ano kershvubin nme thyü pe Npugü tsülo. Ale a-min thyü pen pe ntsü tile.”

²³Tsontsin Araunah le zoshü, “Khilo, Raja gü, tson-o pe nle nyuthyü nyü bin yo thyülo. Methutse dan pe kershvubin ge rope kershvu thyülo lo tesen genyu shyekenyuh bin pe mah thyülo, lo pe kerüshvu thyülo kegwa tho le hika bin nle. Ale aphu pe ntsü bin nle.”

²⁴Ai Raja gü le a-jokenishü, “Nmvu, ale a-min thyü pen pe ntsü ti. Ale a-min thyü mvutse nhon thame pe Npugü rüshvu loho.”

²⁵Tson-o a-le suna pisa tsi tsero pe shyekenyuh bin gü min thyü pe Araunah tsü la.

²⁶A-le tsüka kershvubin thyü pe Npugü tsüo rope kerüshvu lo kepfüshe kerüshvu thyüshü. A-le kehi thyüshü, lo Npugü le tsangge mah nipe kershvubin ge kerüshvu gü roshü.

²⁷Npugü le tsangge logü no a-zhethon sünilo la lotse shü laryü tsaanagge logü le a-jo zenla.

²⁸David le hige Npugü le a-kehi kenishü kela hyu-o a-le Araunah shyekenyuh bin ka kershvubin ge kerüshvu thyüshü.

²⁹Hi gwenkho hile Mosa le tehen yhunkemvu ki Npugü kehü phika thyükeshü lo a-ge kerüshvu thyü kehü kershvubin tsü le Gibeon ki kerüshvubin ka bin zun;

³⁰ai David le tsüki gü Npugü rüshvu lomvu, Npugü lilo gü zhethon kenshvu genyu.